PA Bapa 10 Mei 2026
Lahoan ni Apostel 2:4-47
Tema : Persekutuan dalam jemaat
Sub Tema : Agar kaum bapak mengerti dan hidup dalam persekutuan jemat yang
diharapkan oleh Kristus
Pengantar :
Sonaha do parsaoran na masa i tongah-tongah ni bapa panorang on? Adong do na sirsir marsiurupan, marsitungkol-tungkolan mandalani pargoluhan on? Atap ra do adong parbolah-bolahan atap mulai ma jolma homa pitah mamingkirhon dirini sandiri tumang, lang pala porlu be mamingkirhon hasoman na legan (Individualis). Tontu boi ma hita marlajar sonaha pargoluhan ni kuria na porlobei ai. Taridah do malas ni uhur janah hasadaon na jenges tumang bani parsaoran ni sidea. Sonaha do ase boi sonai dearni parsaoran ni sidea? Paima teks ta on, ija martumpu buei halak manangar ambilan ni si Petrus na igoki Tonduy Na Pansing. Jadi tardidi ma haganup na manjalo hatani ai, anjaha adong do hira-hira tolu ribu halak na tambah bani na sadari ai. Hunjon taridah ma sonaha pangkorhon ni goluh na igoki Tonduy Na Pansing janah na sirsir manjalo hata ni Tuhan, Masa ma hamubahon ni uhur na sonin banggalni.
Hatorangan
Parsaoran ni Kuria na parlobei ai gabe sitiruan ma ai sonaha do sasintongni hajongjonganta gabe halak na porsaya tanda ni na igoki Tonduy Na Pansing. Kuria na parlobei ai totap pongkut bani 4 hal :
Parsaoran bahasa Yuhani: “koinonia” aima na pataridahon “tindakan saling berbagi antar sesama”. Pangarusion on marojolan hubani Jesus Kristus na sirsir mamberehon diriNi gabe tobus ni dunia on. Anggo sonai ma hasirsiron na dob mamngkopkop hita, sonai do homa hita patut maniru Pambahenan Ni Jesus ase boi saling marbagi marhitei aha na adong banta. Jadi PA ta on ai lang pitah persoalan pataridahkon bohi atap ianan mar kebaktian. Ibagas partumpuan Bapa on sonaha do hita pakoskoshon hasadaonta lambin sari janah parduli bani hasoman.
Parsaoran na sasintongni lang pitah ibagas na marsisisean tumang tapi parsaoran ai igambarhon songon ikatan hasadaon ibagas parumahtanggaon. Pataridahkon parsaoran na bulus janah sari jadi lang pitah hasadaon na somal-somal tumang songon na taridah sipata ibagas sada gareja, ra do lang pala parduli bani halak na legan. Ra do sipata gareja ai pitah ihatahon hita songon horja sosial, marbagi sembako atap pitah marsisalaman anggo jumpah. Tapi sasintongni parsaoran ai maningon lambin bagas do iarusi hita aima parsaoran na riap marsihol ni uhur laho marhasadaon songon sada keluarga.
Halani ai do sonaha do ase boi jongjong parsaoran na sasintongni aima maningon do Si sada Tonduy aima ibagas Tonduy Na pansing pakon sada pangajarion (podah ni apostel). Jadi kuria na parlobei ai jumpahan pangajarion pakon sura-sura na dos. Halani aido tujuan ni parsaoran ai aima laho pasangapkon Tuhan. Sonai age mangidah parbagianan marhitei aha na adong bani sidea. Isobut do age marhitei arta na adong bahasa rup do ihira sidea arta ni sidea. Sogop do uhur na mabiar bani haganup; buei do halongangan ampa tanda ibahen apostel ai. Ijuali sidea do arta ampa barang-barang ni sidea, ibagihon ma ai bani haganup, domu hubani haporluanni bei. Memang humbani sisi hajolmaonta songon na lang pas do pangahap sonaha ase tubuh ibagas pingkiran laho marbagi marhitei arta na adong banta. Halani memang biak ni hajolmanta sihol patumpuhon janah ulang namin mamot aha na dob itanganta. Songon na mambangun sada menara Babel anggo boi roh gijangni pala namin das hu langit. Sonai ma biak ni hajolmaon. Hal on ma homa na porlu tumang laho mambangun parsaoran ibagas Tuhan. Isobut bani teks ta on, anjaha ganup ari do sidea sauhur i rumah panumbahan; jojor rumah do sidea manopiki ruti, anjaha ibagas malas ni uhur ampa uhur na bulus do ijalo sidea sipanganon sai.Ipuji sidea do Naibata anjaha rosuh do uhur ni simbuei mangidah sidea. Anjaha ganup ari do itambahi Tuhan in na dapotan haluahon bani kuria ai.
Goluh ni sidea saling berbagi janah saling perduli. Jadi tambah ma bilangan ni na porsaya. Jolma boi marubah anggo domma marubah cara pandang marhitei podah na ijalo bani goluhni. Halani ai ase porlu tumang do mangidah haganup na adong banta ipakei hita ai laho pasangapkon Tuhan. Sahali nari paruhuranta ma lobei ipareksa hita, bahasa anggo ipasu-pasu Tuhan ham dongdo ganup parbagianan ni ai homa na maningon ibagihon ham bani halak na legan, Ai do ase konteks manopuki ruti (perjamuan Kudus) aima mangan riap. Ija mandaihon riap idopni uhur ni Tuhan marhitei aha na adong banta. Anggo Kristus domma matei mangkopkop hita, sonari boi do ham mamberehon na adong bamu laho mambagihon ai ibagas parsaoranta? Sipata on ma biak ni jolma anggo manobut pasal pengorbanan tontu borat tumang ma ai ibagas pingkiran, halani ai marlajar ma hita marhitei hata ni Tuhan on mangubah paruhuranta ase boi taridah parsaoran na jenges songon kuria na parlobei ai, sari janah gabe pasu-pasu bani hasoman.
Diskusi :
