PA LANSIA
Minggu, 20 September 2026 (16 Dob Trinitatis)
Nas : Pilippi 3:1-16
Tema : Melepaskan yang Fana, menggapai yang kekal.
Tujuan : Agar kaum lansia tetap bersukacita dalam Tuhan dan terus berfokus pada Kristus sebagai tujuan akhir.
Doding : Haleluya 266:1-2
Tanggalhon ma ganup Hadagingon
Parlobeini
Anggo musim libur atau weekend huja ma laho jolma liburan? Na dohor humbanta on aima Danau Toba, bahat ma ai tujuanni, humbani na hampit pulau Sumatera ope misalni Parapat, Tigaras, Tongging, Paropo, Muara, Balige pnl atap boi ma homa mandipar gabe das ma hu Pulo Samosir. Anggo iidah hita ma parpudion, sonin ma ianan wisata ai ipadear marhitei hapentaran ni jolma, buei ma penginapan, hotel na jenges tumang, adong homa waterfront, ampa patung ni Tuhan Jesus i Sibea-bea. Mogah janah takjub do hita mangidah ganup na madear na binahen ni jolma, tontu sadalan do homa ai bani haporluon ni jolma dob loja marhorja bani rutinitasni bei adong ma panorang marlibur, marsaran janah mandaihon tinompa ni Naibata na majenges in,
Roh majuni sada ianan songon objek wisata ai, gabe ra do homa patubuh gijang ni uhur bani parhuta ampa jolma na marusaha ijai. Gabe lang be ipingkiri na ibangun ai berdampak buruk do ai bani na tinompa na legan, tao ampa dolog-dolog, bani hasirsiron ni bah, halani anggo ganup dolog-dolog ai itopa sidea gabe ianan panatapan ampa penginapan ampa wahana-wahana na legan sonaha do holi dob ai? Aman do ianan ni sidea irohi tamu atap lang, sai hurang ope gabe perhatian parhuta na ianan na sonai, na porlu maruntung sidea.
Gati do memang jolma songon nokan na isobut ai; mangahap porsaya tu bani kemampuan ni sandiri, status pakon aha na dob itangkap hita gabe urah ma use pangahap bani ganup, halani boi ma hita manggoluh marhitei usaha ampa ganup na ihorjahon hita, gabe iahap hita pasonang pakon paluahkon hita. Songon na lopas ma pangahapta humbani hansunsahan halani doma boi maruntung, boi mansuhuni sinurani uhur. On ma sihol ipatangkas banta marhitei perikop on:
Hatorangan
Bani pamungkah ni perikop on Paulus paingatkon ase jaga humbani baliang, pangajar na jahat, humbani parsunat na lepak. Halani hita aima halak na siparsunat na tongon na dob marsaor ampa siparsombah Naibata janah marmegah ibagas Kristus, janah lang be hita martenger ni uhur bani daging. Hansi pe adong alasan banta laho mangkaporsayai daging. Anggo adong halak na laho mangenjengkon diri ibagas daging, ahu ma tarlobih ni Paulus: isunat bani ari paualuhkon, humbani halak Israel, humbani marga Benjamin, halak Jahudi asli; pasal titah ampa uhum au aima halak Parisei, pasal semangat na tang, si semangatan laho mangarsihk kuria in, pasal hapintoran ni titah ampa uhum in, lang martikas. Tapi aha na hinan hauntungan bangku, sonari on doma harugion ai halani Kristus.
Salah sada tantangan na gati ijumpahkon si Paulus aima kelompok-kelompok na mangkorhon parbolah-bolahon i kuria in. Bani anggapan ni halak Karisten Jahudi paboa halak Karisten non Jahudi ai ningon gabe halak Jahudi lobei, mangirikkon ampa mandalankon ganup aturan ampa uhum ni halak Jahudi, ningon tarsunat. Halani ihaporsayai sidea paboa pambalosion hubani uhum ai do mambere haluahon. Tontu pangarusion sonon marlawanan do pakon Ambilan Namadear na iajarkon Paulus aima hapintoron ai roh pitah marhitei haporsayaon hubani Jesus Kristus.
Ibagas pangarusion ni Paulus, Kristus paluahkon halak Karisten non Jahudi aima marhitei sonaha pardongni sidea, lang pala ningon gabe halak Jahudi. Sidea ai ipintori marhitei haporsayaon sedo halani uhum. Halani kebingungan na sonon ma gati tubuh, ai do ase ipaingat apostel Paulus kuria Pilippi jaga bani sipangajari-sipangajari na pakahouhon na mangkatahon lang sungkup pitah Jesus dalan ase maluah.
Na gabe persoalan ni sidea pakon Paulus aima, sidea ai porsayanan do bani ‘daging’ standar ni manisia. Sidea ai mangajamkon status, ampa aha na dob dapot janah ihorjahon sidea ase maluah. Hape, Paulus mangkatahon, lang boi ipeakkon hita tengerni uhurta bani daging. Anggo ibandingkon aha syarat na ibahen sidea ai, Paulus pe domma talup janah gok idalankon syarat ai, domu hubani standar ni manisia ai. Tapi bani Paulus dob pajumpah pakon Kristus, gabe ganupan ai harugion do bani janah ianggap do ai gabe tompoh.
Iuduti use mangkatahon paboa ganupan ai ianggap harugion ibandingkon pakon panandaion bani Kristus. Ia sihol mandapotkon Kristus ai, janah ipapintor sedo marhitei uhum tapi haporsayaon. Hasintongan na pitah aima marharohan humbani Naibata, sedo humbani jolma. Mase ganupan ai ianggap Paulus gabe tompoh? Halani ganupan ai mambere ahap porsayanan bani dirini sandiri, mangahap aman hape palsu do ai, songon na dob manangkap haluahon ai hape lang. Ganupan na mangajamkon daging, boi gabe paoto-oto dirini sandiri.
Hohonaanni
Sonari on, tontu ra lang boi mintor ihubungkon hita ganup na dapot hita ai bani haluahon. Tapi gati do marhitei bagei na dob dapot hita ai gabe adong ahapta aman goluh on. Habayakon, pambotoh, jabatan, ganupan ai boi mambere ahap na aman janah mangorui hagobiron. Songon na sonang ma gatni pangahapta, halani ganup pencapaianta, songon dear ma ganupan hape horah do hita bani partonduyon ampa haporsayaon bani Tuhan. Ijon ma na boi parsedahon hita. Haadongan ampa kenyamanan na iahapkon hita ai boi padaohkon humbani gobir. Bani Paulus, ianggap do ganupan ai ‘tompoh’, bani bahasa aslini aima sada hal na maningon iambukkon halani boi parsedahon anggo ipaturut. Jadi hunjon iidah hita porlu sensitif, peka laho mangidah aha na dong banta ai parohkon hadearon do atap parsedahon. Anggo iidah hita ai boi parsedahon hita, dearan malah iambukkon, halani lang boi tarjaga-jaga hita holi ai dob ni lang sadar hita domma maseda. Tontu maksudni ijon sedo ase maningon itadingkon hita horjanta atap ningon ijuali hita ma ganup na dong banta. Tapi ningon porlu do isadari hita paboa ganupan na adong banta on sedo manontuhon ijalo hita haluahon ai janah boi do ai manlanglangi hita laho manadai Kristus lambin roh bagasni.
Hasintongan sedo halani na ihorjahon hita tapi na ijalo hita do ai humbani Naibata. Lang boi ijalo hita marhitei gogohta sandiri. Hasintongan ai mambere pangarapan paboa itongah ni pargoluhanta na lang pasti on, adong do goluh na manongtong. Haporsayaon ibagas Kristus marbeda do pakon porsaya bani dirini sandiri. Ganup ai sedo gabe tujuan ujungni, lang ope. Paulus pe mangkatahon ia pe lape das bani ujungni, maningon marusaha ope ia manggoki pandiloon ni Naibata ibagas Kristus. Haporsayaon ai sedo standar ni jolma na mambaen boi hita mangahap puas, sungkup. Tapi haporsayaon ibagas Kristus torus mambobai hita torus marbanggal janah matoras ibagas Kristus, janah ai sungkup banta.
Idilo Tuhan do hita ase luar humbani ‘hasonangan’ na lumei na ibangun hita bani goluhta on marhitei usahanta sandiri, seng anjai boi gabe ‘ajamkonon’ marhitei usahanta sandiri, tapi ipataridah hita ma pambahenan ni Naibata, pataridah kuasaNi. Tanggalkon hita ma ganup na ianggap hita arga bani hadagingon ai, ulang ianggap hita harugion anggo lang dapot hita ganup na itanoh on. Halani ijin itadingkon hita ganup ‘tompoh’ ai ijai ma iahap hita malas ni uhur halani boi ibere hita ruang na bolag hubani Tuhan, janah iahapkon hita gane anak hinaholonganNi hita. Lang na magouan hita anggo itadingkon hita ganup na adong i dunia on, tapi bueinan ope na dapot hita marhitei pasau-pasu ibagas Kristus aima goluh na sasintong ni ai.
Halani ai anggo domma idilo Tuhan hita bani kuria ni in, paubah hita ma uhurta lang be mangkaporsayahon goluhta on bani dirinta sandiri tapi porsaya bani Tuhan ma hita. Marsigantung ma hita bani, janah ganup pangarapanta ompaskon hita ma Bani. Halani ai duguti hita ma torus manlangkah. ani pandiloon ni Tuhan in ibagas Kristus. Jolom hita ma poltik haporsayaon ampa pangarapanta, taluhon hita daging na dong banta, parayak hita hagoluhan na dob pinasirsir ni Tuhan in banta. Amen.
About the Author
