PA LANSIA

28 Juni 2026 (4 Set.Trinitatis)

Nas        : Johannes 17:21-23

Tema     : Kesatuan dan Persatuan di dalam Kristus

Tujuan   : Agar kaum Lansia menanamkan identitas sebagai bagian dari tubuh Kristus serta menyatakan kasih Allah yang tidak pernah berubah sampai kapanpun.

1. Evangelium Johannes itulis bani ujung ni abad na parlobei Masehi – antara tahun 90 – 100 M. Bani panorang ai, gereja Kristen mandompakkon buei pangodoh-odohon humbani halak Rom ronsi parmasuk ni parpodah na kahou na manggeori hasadaon ni Kuria. Budaya bani panorang ai ipengaruhi filsafat Junani na mangondolhon pambotoh, pingkiran ni jolma. Bani situasi na sonon ma Johannes manuratkon evangelium on ibagas tujuan: “Ase na suratkon pe on, ase porsaya nasiam, Jesus do Kristus, anak ni Naibata, anjaha marhitei na mangkaporsayai ai dapotan hagoluhan nasiam ibagas goran-Ni” (Johannes 20:31).

Johannes bindu 17 on aima na marisihon tonggo hamalimon ni Jesus hu bani Naibata Bapa paima Ia iparsilangkon. Jesus lang pitah manonggohon susian-Ni tapi dihut do manonggohon haganup halak na sihol porsaya Bani halani parambilanon ni susian-Ni. Artini: domma itonggohon Jesus hape hita mulai na hinan – paima porsaya hita hu-Bani.

2. Isi tonggo ni Tuhan Jesus:

• Ase haganup halak na porsaya marsada ni uhur songon hasadaon ni Jesus pakon Naibata Bapa.
• Ase halak na porsaya manggoluh ibagas holong
• Ase talar hasaksian ni halak na porsaya bai dunia on. Taridah holong ni Naibata marhitei hon hita (hasadaonta/ gereja).

Bani tonggo ni Tuhan Jesus on pataridahkon banggal ni holong ni hubanta halak na porsaya, ronsi pangarapan-Ni ase sada paruhuranta, sada haholonganta, sada tujuanta, aima na laho pasangapkon Naibata. Janah mangihutkon tonggo hamalimon ni Tuhan Jesus patangkasahon hubanta:

• Lang ipaturut Tuhan Jesus hita manjolom haporsayaonta. Itonggohon Jesus do hita artini maharga do hita ilobei-lobei ni Tuhan. Age pe domma matua (lansia) na mungkin mangahapkon lang sai maharga be, lang margogoh be, lang boi mambera peran be bahkan mangahapkon gabe beban bani keluarga, tapi bani Jesus harga do hita haganup.
• Porlu ni hasadaon. Sada na mararti do ai: marsijaloan ibagas na hurang, lang dong domdom, marsihaholongan, marsiurupan, janah hasadaon na imaksud aima songon: hasadaon ni Naibata pakon Jesus. Domu hujai porlu tumang sifat na toruh maruhur songon Tuhanta Jesus: “Agepe marupa Naibata Ia, tapi ipalumei do dirini gabe ibuat rupa jabolon”.
• Holong ni Naibata do marianan itongah-tongah ni hasadaon ni halak na porsaya. Artini lang pitah manjalo holong ai hita, tapi ase isondangkon hita ma homa holong ai hubani halak na legan. Lang boi hatahononta: “Ahu domma matua, lang dong gogohku be”. Markuasa do Tuhanta mampargogohi hita, ase hita totap marsinondang. Ibagas hatuaon, lansia boi: mambere podah, tonggo pakon usihan. Ase ginompar, pahompu mambotoh janah mangahapkon habanggalon ni Tuhanta.
• Marosuh do Jesus anggo boi itonggor dunia on hita na gabe saksi-Ni. Marhitei parsahapta, pangabakta, pangarapanta, hasabaronta, holongta mambere panondang bani dunia ibagas hagolapan. Gabe ‘kagum’ halak na legan mangidah pargoluhanta. Tontu boi do ipungkah hita parlobei itongah-tongah ni keluarganta. Age pe dob lansia totap gabe pasu-pasu bani keluarga, goluhni gabe hasaksian pasal haporsayaon hubani Jesus aima na manjaga keluargani totap mardalan ibagas harosuh ni Naibata.

3. Piga-piga hal na gabe parlajaran domu hubani nas on aima:

• Tuhan Jesus manonggohon hita. Ase hita pe maningon do mambahen tonggo gabe hagoluhanta, tonggo gabe hasomalanta. Totap manonggohon keluarga, hasoman Ibagas malas uhur sonai age pusok ni uhur.
• Jesus manonggohon hasadaonta. Gereja na iharosuhkon Tuhanta aima gereja na marhasadaon na marsijaloan gabe angkula ni Kristus. Haganup do porlu bani angkula ai, lang marsigijangan. Halani ai pauli hita ma angkula na manggoluh, aima angkula na gabe hasaksian bani dunia on. Angkula na marhasdaon lang dong parbolah-bolahon. Angkula na marsihaholongan.
• Goluh na ibagas Jesus aima toruh ni uhur na boi manjalo hahurangan ni halak. Boi manjalo halak na manusahi paruhuran. Boi mardamei pakon haganup halak. Sai daoh ma uhur domdom humbani pargoluhanta.

Diskusi:

1. Itonggohon Jesus do halak na sihol porsaya hu-Bani halani parambilanon ni susian-Ni. Sonaha do homa perananan ni Lansia bani horja pararathon Hata ni Naibata? Ase lambin buei halak na porsaya bani Jesus?
2. Sonaha do hubungan antara holong ampa hasadaon songon na isobut Jesus bani ayat 23? Sonaha do ase holong ai boi gabe onjolan ni hasadaonta?

Aha do tantangan banta laho marhasadaon? Aha do pangkorhon ni uhur domdom ibagas hasadaon? Janah sonaha do homa hita mangatasi tantangan ai? Amen