ARTIKEL PASTORAL KELUARGA MEI 2022  

Departemen Kesaksian GKPS

Parlobeini

Lang tarbahen lang i tongah-tongahni pargoluhon ni manisia sonai tarlobih bani rumah tangga Kristen pasti do terjadi komunikasi. Artini adong parsahapan antara bapa hubani inang atap paramangon hubani parinangonni bei. Hansa ra do sipata ibagas komunikasi antara paramangon hubani parinangon lang “marsiarusan”. Tapi bani keluarga Kristen pori pe adong konflik, wajar do ai, asalma haduasi sirsir marsipadearan ibagas toruh ni uhur. Ai do ase dong hasoman halak na porsaya manobut paboa humbani pardalananni pargoluhon on do boi dapot hita parlajaran na maharga. Humbani pengalaman-pengalaman, termasuk pasal komunikasinta na lape sempurna, gabe “guru” na terbaik do ai ase boi ibangun komunikasi suami-istri na dear pakon sintong. Tontu porlu ibotoh hita otik lobei pasal aha do na imaksud komunikasi. Dob ai sonaha do hita bani na mampraktekhon komunikasi suami-istri. Sadalan hujin ma ase topik bani artikel Pastoral santorap na ipadas hubanta aima “Komunikasi Suami-Istri: Sarana Membangun Keharmonisan Keluarga”.

Tontu bani proses na padashon sahap parinangon ibutuhkon ma kesabaran humbani suami manangihon ibagas na aktif, sonai homa sebalikni. Artini ai lang sekedar manangar, tapi adong respons. Tontu ibagas hal on aima ekspresi na lang ibahen-bahen atap bersandiwara, tapi humbani malas ni uhur ase boi tarjalin komunikasi na dear janah sintong.

Komunikasi

Arti Komunikasi

Salah sada defenisi komunikasi na lengkap janah jelas aima defenisi menurut Norman Wright, sonon ma ihatahon: “Komunikasi adalah satu proses (baik lisan ataupun tidak lisan) saling bertukar informasi kepada orang lain sedemikian rupa sehingga ia mengerti hal yang Anda katakan. Berbicara, mendengarkan dan mengerti terlibat dalam proses komunikasi”. Domu hujin komunikasi marupahon “proses”.

Laho markomunikasi na dear mamorluhon panorang pakon hasabaron; halani markomunikasi lang sekedar saling marsahap pakon manangar (to hear), tapi saling manangihon (to listen) marhitei mangarusi. Hata “saling” patuduhkon paboa komunikasi aima mardialog dua arah. Janah hata “sedemikian rupa sehingga” pataridahkon suatu kiat na maningon iusahahon, na gabe seni na maningon iparlajari. Anjaha onjolanta aima komunikasi Kristen. Anjaha adong piga-piga langkah-langkah komunikasi Kristen:

• Hita manjalo Kristus, Kristus manjalo hita.
• Hita manjalo pakon mangahapkon holongni Kristus i rumahta janah manjalo dirinta sendiri.
• Jalo janah haholongi hita ma hasoman, ijai domma terjadi komunikasi na Kristiani.

Komunikasi Suami-Istri

Komunikasi aima faktor na porlu laho martukar informasi pakon laho pasaloseihon masalah. Komunikasi na dear pakon sintong mangurupi laho pasaloseihon masalah, tapi komunikasi na hurang, apalagi na lepak boi do use lambin pabanggalhon masalah. Halani ai porlu tumang do iparlajari hita cara-cara na dear pakon sintong markomunikasi suami istri.

Naparlobei, porlu tumang pasangan marusaha mar-empati pakon hasoman saparangguanni. Arti marempati aima porlu mangarusi perasaanni pasangan. On boi terjadi panorang pasangan marusaha pasiathon diri hubani situasini hasoman saparangguanni, sehingga ia lobih mangarusi aha na sedang idompakhonni pakon sonaha pangahapni pasal ai.

Napaduahon aima, sangaja manangihon pandapotni hasoman saparangguanni. Ihaholongi pakon ihargai aima kebutuhan ganup jolma. Pataridahkon holong hubani pasangan aima salah sada cara manangihon. Laho mandalankon ai ibagas na sintong berarti sasahalak maningon secara sengaja padaohkon sagala urusan ni sendiri janah patuduhkon perhatian penuh hubani aha na ihatahon pasanganni. Ase boi hita gabe manangihon ibagas na efektif. Domu hujon Myron D. Rush mamberehon ompat podah:

• Ulang mamotong parsahapan.
• Ulang mencoba manrimpunhon respons hasoman sementara mitra sedang marsahap.
• Padashon sungkun-sungkun untuk kejelasan.
• Ulang mintor manganggap domma mangarusi aha na sihol ihatahon mitranta marsahap.

Cara napatoluhon, markomunikasi aima suami-istri porlu secara sengaja marusaha padashon pangahapni sandiri. Ipadas ma ai secara terbuka pakon ibagas halamlamon. Anggo isi baritani bersifat sensitif, sidearan ipungkah marhitei parlobei patugahkon perasaanni sendiri. Misalni: “Mabiar do au sanggah ham nongkan dokah ase mulak”. Hatana sonin urahan ijalo daripada ihatahon hata na koras sonon: “Ham totap do lang topat waktu. Lang mambotoh martanggungjawab! Lang manghargai halak na legan”.

Domma ipadas hubanta pasal manangihon pakon marsahap na dear i babou, na mararti do pahara na sonin aima komunikasi timbal balik. Halani ai komunikasi na sintong lang monolog, pitah sada pihak tumang na bahatan marsahap; lang homa duo-monolog, na ija haduasi marsahapi tapi marhitei topik na marbeda pakon lang saling terkait. Sobalikni, komunikasi na dear janah sintong aima mardialog. Ase dear pakon menarik ibagas parsahapan porlu ipardiatei aima piga-piga hal.

• Artikulasi maningon jelas.
• Volume ulang karas, holi iagakhon na marah, janah ulang nanget holi lang tartangar.
• Tempo, podas pakon lambatni berirama; ulang malambattu, mambahen halak lang sabar, janah ulang podastu sehingga mahol iirikhon pakon mahol iarusi.
• Nada, tinggi rendahni boi do berpengaruh hubani marah atap lamlam.
• Pause, soh tongkin, ulang torus marsahapi songon senapan masin. Pause mambere kesempatan halak marpingkir pakon mamberehon respons. Pause pe marguna anggo ham sihol manokanhon sesuatu na porlu.
• Gerakan pakon isyarat nonverbal songon mimik, bohi, gerak tangan, pakon jari, anggo tepat igunahon mandukung tumang dompak pesan na ipadas; ulang terlalu kaku, tapi ulang homa marlobihan.
• Timing, aima panorang na topat mangurupi markomunikasi halani mambahen halak siap pakon marosuh laho manangihon. Misalni lang panorang suami atap istri sanggah loja, tartunduh atap sanggah jengkel atap sibuk.

Komunikasi ibagas pernikahan aima hal na porlu tumang, ai do ase porlu iusahahon secara khusus. Langkah na parlobei aima haduasi suami-istri maningon sadar mangkarosuhkon situasi pakon kondisi na maju. Napaduahon aima suami istri boi riap manilai situasi ni sidea sonari, dob ai mamilih cara-cara praktis untuk maju, ase pernikahan lambin indah janah harmonis. Siotikan adong lima cara na na maningon idalankon suami-istri ibagas na markomunikasi:

• Mambere hata pujian na humbani borsih ni uhur, lang marsipakulah-kulah.
• Mambagi panorang na cukup berkualitas untuk kebersamaan.
• Mamberehon sentuhan fisik.
• Mambere hadiah
• Mangidangi secara praktis.

Panutup

Ibagas pargoluhan rumah tangga memang totap do adong masalah, tapi lobih marmasalah anggo antara suami-istri lang boi markomunikasi ibagas na dear pakon sintong; halani komunikasi aima sarana laho pasaloseihon masalah. Halani ai porlu tumang do komunikasi ibagas goluh na marrumahtangga janah boi do mempengaruhi hubungan suami-istri lambin dear ibagas na marrumahtangga. Domu hujin ma secara praktis panulis mangarapkon ase suami-istri boi marlajar markomunikasi janah mulai marlatih untuk markomunikasi sehingga setiap parmasalahan ibagas rumah tangga boi isaloseihon ibagas na dear, tanpa terjadi partinggilan apalagi parsirangan.

Pdt. Fraimen Purba, M.Th

(Kabid. Pastoral Departemen Kesaksian GKPS)