PA Bapa Minggu 12 Set Trinitatis 27 Agustus 2023

Nats.                       : Kejadian 31:1-16

Doding                   : Haleluya No. 448:1-2

Tema                      : Perbuatlah segala yang difirmankan Allah

Tujuan                    : Agar kaum bapa senantiasa melakukan firman Allah sekalipun harus berhadapan dengan kecurangan

Penulis                    : Pdt. Ito Belihar Purba

PARLOBEINI

Sada turi-turian na ganjang do anggo manaili hita hu pudi pasal sejarahni si Jakob. Ibagas uhur biar janah gobir halani saninani si Esau do mambahen borhat ia manadingkon tanoh Kanaan hatubuhanni ai. Dob mengalami bagei proses akhirni das ma ia i rumahni tulangni na margoran si Laban. Dokah do ia tondok ijai janah marhorja songon jabolon. Tongon ujungni gabe parsimada do ia bani si Rahel hinaholonganni uhurni ai, age pe parlobei do ia saud pakon si Lea – tapi haganupan ai halani persyaratan humbani bapani sidea aima Laban (1 Musa 29:28–35; 30:3–13, 17–24). Sai na bahat do tong ulah-ulahni simatuani on hubani si Jakob. Songon na bani ambilanta on ma, sai ipolitiki si Laban ai do si Jakob ase bahatan bani anak-anakni biri-biri ai. Tapi sonai pe, sabar anjaha bujur do tong si Jakob on. Ambahni ai tene, sai ihasomani Tuhan do tong ia bani ganup langkahni. Ai do ase anggo iidah hita, lang ongga madabuh atap pe rugi ia halani tindakan atap pe akal-akalni simatuani ai. Totap do sai ibahen Tuhan in dalan bani mambahen totap ia jumpahan buei pasu-pasu. Tongon ma tene, halak na bujur janah dohor hubani Tuhan, sai na hasomananni Tuhan in do janah pasti do ijamini goluhni halak na tongtong marondos Bani.

HATORANGAN

Sada do hulananni biri-birini si Jakob pakon simatuani ai janah si Jakob do na martanggung jawab pasal pemeliharaanni biri-biri ai ganup. Sada panorang ipolitiki si Laban ma si Jakob marhitei sada statemen: “Si rintik ma bam!”. Ibahen songon on halani kemungkinan humbani anakni biri-biri ai, si rintik ma siotikan. Tapi ibotoh Naibata do ganupan na masa ai. Gabe bueinan ma ibahen Naibata sirintik tubuh humbani biri-biri ai. Dob ai igantih ma use: “Sijolang ma bam” nini si Laban. Bujur do tong si Jakob on janah seng manjua ia bani haputusan ai. Age pe ibotoh si Jakob do namin, na manokoh do simatuani ai bani. Tapi ai pe, sai na iurupi Tuhan in do tong ia marhitei na patubuhkon bueinan sijolang humbani anakni biri-biri ai. Hal na sarupa  ibahen use hubani biri-biri Siganding; tapi tong do ihorjahon Tuhan in pangapition hubani si Jakob. Sobali ai, domma sapuluh hali iubah upahni si Jakob. Artini sapuluh ijon sedo angka matematis, tapi patugahkon lang habilangan do maksudni (bdk. Istilah 1001 – na ibahen sebagai gambaran tak terhingga). Lang sungkup sibar ijai tumang, tapi dob ganup na masa ai gabe adong ma barita fitnah use  na pinadasni anakni si Laban (aima lawei ni si Jakob) na mangkatahon bahasa domma iuhur-uhuri si Jakob artani bapa ni ai. Barita fitnah on patugahkon seolah-olah domma curang si Jakob janah berambisi laho mambuat ganup artani si Laban. Hape lang adong uhurni si Jakob na songon ai age otik pe. Anggo iidah hita hun sisi na legan: Si Laban domma irajai uhur simburu janah itug. Domma irajai ambisi haduniaon ia mambahen gabe mubah cara pandangni hubani hela ni sandiri. Hal on tarbukti  humbani pangidahni si Jakob hubani si Laban – lang songon na somal be simatuani ai iidah (ay. 5). Tapi ibagas bulus ampa borsihni uhurni si Jakob, iparuhuri Tuhan in do tong ia janah lang ilopas ia tarbador. Marsahap do Naibata hubani janah mambere sada parentah ase mulak ma lah ia (pakon keluargani) hu hutani bapani aima Kanaan. Tongon gabe songon makan buah simalakama do ahap ni (pepatah Melayu/ Malaysia: makan buah simalakama = dimakan mati emak, tak dimakan mati bapak). Mase? Ai anggo mulak pe ia tong do manjumpahkon abangni si Esau na mardom-dom hubani. Tapi huja ma ia misir? Lang adong pilihan na legan sobali mulak hu huta hatubuhanni – romban hubani suruhanni Tuhan in. Tontu porsaya do ia sai na hasomananni Tuhan in do ia mandalankon ganupan ai. Idilo ma parinangonni si Rahel ampa si Lea janah isahapkon ma ganup na masa ai irik hujai rencana na sihol sidalankononni (aima mulak hu Kanaan). Singkat cerita, sauhur do ia pakon parinangonni ai. Gariada  tene, kecewa do homa parinangonni ai hubani bapani sidea sandiri halani lang adong hak ni sidea be bani parbagiananni bapa ni ai. Hira songon na ijual do sidea janah bolini sidea domma iboiskon (ay. 15). Humbani keadaan na songon ai gabe sipangihut do parinangonni ai bani haputusan na domma itotapkon Naibata hubani si Jakob. Ujungni kisah pasal si Jakob on, gabe mulak ma sidea secara diam-diam manadingkon keluarga besar Laban.

HAHONAAN

Humbani pengalaman ni goluhni si Jakob songon na bani perikopni ambilanta on, boi ibuat hita piga-piga pokok perenungan na talup siteraphononta bani pargoluhanta.

• Bujur janah saluju. Selaku hela i tongah-tongahni keluargani si Laban, sadar do si Jakob bani hajongjonganni selaku boru (iidah hita romban tene hubani adat ta pasal kekerabatan). Lang dong na idah komentar atap pe ajuan keberatan na ipataridah si Jakob hubani keluargani si Laban. Gariada ibotoh pe na ioto-otoi janah iparguak-guak ia tapi anggo sikapni totap do terjaga. Lang halani ketidak adilan ai gabe magou rasa hormatni hubani  simatuani ai. Hita pe bani pargoluhanta porlu do memiliki sikapna bujur janah saluju on. Sedo mararti lang porlu kritis hita bani segala situasi tapi romban hubani situasi atap pe hajongjonganta. Tontu selaku bapa i tongah-tongahni keluarga, age pe pori ni  adong na so beres bani niombah, lang mintor urah manringis atap pe manggilai niombah janah mamukulsi. Porlu do ipataridah janah iteladankon sahalak bapa mengenai ketenangan janah berkepala dingin. Ambahni ai porlu do homa adong paham bahwa age pe sesama anggota keluarga pasti adong do perbedaan, gariada hubani inang sinrumah pe tene. Tontu domu hujai, lang anjai paksaonta homa ase haganupan mardalan songon na ibagas uhurta selaku bapa. Menghargai perbedaan boi do ai meningkatkan kualitas kepribadian. Bayangkon hita ma anggo sai lalap do ibagas kendalinta haganupan gerak-gerik ni niombahta, tontu gabe maol do holi bani niombahta berkembang janah dewasa. Jadi sikap na bujur anjaha saluju aima menggambarhon sikap boi manjalo perbedaan na adong i sekitarta.
• Tangi bani hatani Tuhan. Anggo isobut ma tangi tontu lang pitah persoalan manangar ai tapi das do hubani na mamparimbagaskon pakon manghagoluhkon. Anggo si Jakob, sepanjang pardalananni goluhni, pitah hatani Tuhan do na gabe penuntun bani. Boi hatahonon lang pitah manangihon pikkiranni sandiri ia bani na mandalani pargoluhan on. Tongon pasti do marbeda goluh na ibobai Tonduyni Naibata marimbangkon goluh pitah ibobai pikkiran sandiri. Halak na manggoluh bani hatani Tuhan do na boi manjalo namahol bani pargoluhan on. Misalni ma anggo ialami hita kegagalan – tardompakhon hita do in anggo yakin do hita bani hatani Naibata na boi mangurupi hita luar hunbani kegagalan in. Tapi anggo pikiran sandiri do na ra ma hubani pandoleian ujungni, gariada ra do tene lobih parah hunjai. Ambilan on mangojur bapa ase tangi janah porsaya bani hatani Tuhan. Tontu anggo Tuhan do sitangionkon, lang anjai rarat pikkiran. Hape pikkiran na rarat do na urah patubuhkon naborit.
• Stabilitas aima ketahanan, lang mubah-ubah janah lang iombang-ambingkon na masa. Bani hata na legan boi sobutonta “prinsip iman”. Halak na manggoluh bani hatani Naibata lang anjai maseda ia halani tawaran-tawaran hinajengesni dunia on. Misalni ma ai, i sekitar ta buei halak sihorjahon na so madear, korupsi atap pe pabuei artani marhitei na cara na lang sintong. Anggo marhaporsayaon na sintong do hita, lang anjai milong-ilong hita halani ai. Gariada tene, tubuh do uhur paingatkon nanget-nanget hubani sidea. Na gati masa, halak na mandompakkon na songon ai, sobali paingatkon, malah mangaduhon tapi sedo atas dasar patorsahon tapi halani “sakit hati’ do halani lang dihut hita ibagas. Ibagas Tuhan in maningon tubuh do habayuonni uhur (Roma 12:2). Selaku bapa maningon do pataridahkon stabilitas na kokoh, ase gabe siusihon i tongah-tongahni keluarga sonai age i tongah-tongahni kuria in.