PA SEKSI BAPA GKPS

Minggu, 01 November 2026 (22 Dob Trinitatis)

 

Nas             : Heber 6:9-20 (22 Dob Trinitatis)

Thema        : Harapan adalah Kekuatan

Tujuan        : Agar kaum bapa berpegang teguh pada pengharapan.

Doding        : Haleluya 327:1-2

 

                                                Matoras ibagas Haporsayaon

Parlobeini

Girah sogod sada bapa domma imangasah balati, iboban ma halhalan ni, mardalan ma ia hinsah lahou malopusi lombang, adong ijai piga-piga bagot agatonni na marbah ope. Dob salpu maragat, misir ma ia, itoruskon hu sabah laho pasirsir ianan laho marsuan. Salpu marsuan i sabah, itorih ma juma laho marsuan jagul, sayur pnl. Anggo sanggah lang dong horjani isabah atap ijuma sirsir do bapa on laho marharoan hu juma ni hasoman. Lang pitah marhorja hu juma, bapa on pe rajin do marminggu, halani sahalak parhorja do ia. Bani paradaton pe hadir do bapa on halani tarmasuk do ia pangintuai ni huta ni sidea. Sonai ma bapa on marmudu-mudu keluargani ase boi marhasungkupon, lang apala bayak tapi lang hatadingan ia pakon niombahni bani parsikolahan ni sidea. Aima sada gambaran ni bapa na matoras ibagas haporsayaon, halani taridah hapongkuton ampa hasabaron bani na mangkorjahon horja ari-ari. Hapongkuton ampa hasabaron aima usaha, kerja keras ampa semangat bani pargoluhan siganup ari, totap konsisten mangkorjahon na madear.

Halak na pongkut somalni aima halak na tahan banting, age adong tantangan lang mintor menyerah tapi torus do idugut horjani na madear.

 

Hatorangan

Bani perikop on, panurat ni surat Heber on mangojur halak na porsaya ase manadingkon hajahudion ni sidea janah torus manlangkah hulobei ase matoras ibagas Kristus. Ia paingatkon paboa hataluon laho mangkorjahon na sapari ai gabe mangkorhon na hurang dear bani goluh partonduyonni sidea. Tapi tenger do uhurni paboa ai lang anjai tarjadi bani kuria ai janah singat-singat ai iimbangi marhitei tonah na padearhon ampa na gok pangarapan.

 

Hajongjongan ni Halak Namapansing

Tenger do uhurni panurat Heber on pasal komitmen ni kuria ai paboa na tang sidearan do bani sidea (ay.9). Isisei do sidea gabe ‘nahinaholongan’ na manotapkon tonah na gok pangarapan aima laho pataridahkon sonin ma banggal ni holongni hubani kuria ai. Tontu hata si sonon seng ongga ipadas halak na lang ope ipaluah atap na lang porsaya. Na mangihut isobut, “tenger do uhurnami sidearan ai do bani nasiam”. Hinan, ongga do sangsi panurat on hubani kuria ai, tapi nuan porsaya ma ia paboa sidea sihol do marbanggal humbani na danak ibagas tonduy hubani na matoras ibagas Kristus. Naibata dob mangidah buah ni haluahon sidea, janah Ia seng geduk, lupa bani na dob ihorjahon sidea (ay 10). Ayat on pataridahkon paboa seng ilupahon Tuhan sidea: marhitei pambahenan pakon holong ni uhur ni sidea na ipatuduhkon bani goranNi. Tujuanni sidea aima laho pasangapkon Naibata janah idalankon sidea pe ganupan ai ibagas na satia, mangidangi halak na mapansing. Naibata seng anjai manlupahon pangidangion ni sidea na lang mangarap ulakni ai, halani Ia aima pintor laho mambere upah marhitei pambahenan na madear ni sidea ai.

Halani ai do sapala na dob ipungkah sidea mandalankon na madear, ipindo ase ganup ma sidea patuduhkon porlu ni uhur, marsijoloman botul bani pangarapan in ronsi ujungni (ay.11-12). Sarupa do songon na dob ipadas bani bindu 5:11-14. Marhitei na porlu ni uhur ai, ijalo sidea hasintongan in, ipataridah hasabaron, paimahon pangarapan ni haluahon in. Anggo lang marhitei haporsayaon na sonin, seng anjai adong hatotapan ni haporsayaon ni halak na porsaya in, laho marbanggal janah matoras. Anggo lang toguh haporsayaon, urah ma holi sidea iambung-ambungkon marhitei ajaran na pakahouhon. Halani ai halak na porsaya lang boi rayohan tapi ningon torus do pongkut ibagas tonduy ase marurat ibagas hata ni Naibata. Marhitei na sonai ma, sidea marpangarapan na gok das bani ujungni pardalanan ni sidea.

Dalan na legan laho mangatasi rayoh partonduyon aima “tiru nasiam sitean bagah-bagah ai, marhaporsayaon pakon sabar ni uhur. Hata tiru mararti mangusihi ampa mangirikkon contoh na dob ipataridahkon halak na mapansing ai, na ilopas Naibata. Bani bindu 11 isobut do buei halak-halak na porsaya na boi iusihi. Songon na ihatahon si Paulus, “Irikkon ma ahu, songon ahu mangirikkon Kristus (1 Kor. 11:1).

 

Bagah-bagah Na Totap

Panurat on mamakei si Abraham gabe bukti paboa bagah-bagah ni Naibata ai lang mubah (ay.13-15). Abraham ipilih Naibata halani buei alasan; ia aima tokoh na porlu bani halak Jahudi, isobut selaku bapa ni na porsaya, janah gabe sitiruon na nyata pasal hasabaron ampa haporsayaon. Ia paimahon martaun-taun paima igoki Naibata padanNi. Abraham manjalo padan ai sanggah marumur 75 tahun ia, tapi anakni si Isak tubuh 25 tahun na mangihut. Ia totap sabar paimahon hagogokni padan ai.

 

Hapastion marhitei na ibijahon

Ipatotap marhitei ibijahon (ay.16-18). Naibata sasintong ni lang pala marbulawan, tapi mandalankon ai laho patangkashon paboa bagah-bagahNi pasti. Ia patoguhkon ai marhitei 2 hal na lang marubah aima bagah-bagah pakon bijaNi. Haduasi on lang mungkin gagal halani Naibata lang anjai margeduk. On ma na gabe apoh-apoh na gogoh bani halak na porsaya na marlinggom hubani Tuhan, songon huta ianan parlinggoman ni halak Israel. Sonai ma halak na porsaya boi marlinggom ibagas Kristus na gabe haluahon ampa pangarapan ni sidea. Pangarapan ai sedo pitah rosuh hansa, tapi haporsayaon na pasti marhitei padan ni Naibata.

 

Jaminan na Toguh

Dob ai iuduti use panurat on pataridahkon Kristus songon sauh/jangkar (ay.19-20). Songon sauh/jangkar na boi manahan sada kapal ase ulang mayub, sonai ma halak na porsaya marsijoloman na toguh ibagas Kristus. Paruntolonni pargoluhan on lang boi mandugur hajongjonganta ilobeini Naibata.

Jesus domma masuk ibalikni hirei-hirei ai, laho mambuka dalan bani jolma marhitei parmateiNi. Ia sedo pitah parlobeita tapi Ia aima Sintua ni Malim banta, na patalupkon hita barani mandompakkon Naibata. Marhiteihon ni ai ma, pangarapan ni halak na porsaya in aman janah toguh i nagori atas marhitei Kristus. Hot anjaha toguh ma pangarapanta hubani Tuhanta in.

 

Hohonaanni

Marhitei hatani Tuhan on ipangindo hubani seksi bapa ase pataridahkon horja na madear, pongkut lang rayohan tandani na dob matoras haporsayaonta, gabe siusihan marhaporsayaon ampa marhasabaron. Halak na pongkut, lang marnalajo aima halak na toguh marpangarapan halani domma marhagouhkon paboa Kristus aima parlinggoman bani goluhni, Kristua aima sauh ni pangarapanni, ampa Kristus aim ana parlobeita, Sintu ani Malim na mangapiti janah na mambere hagoluhan ampa haluahon bani. Ganupan ai gabe onjolan ni haporsayaan ase gomos marsijoloman bani haporsayaon in. Haporsayaon na manggoluh in ma na mangurupi hita laho pataridahkon sondang na humbani Tuhan in bani ganup pargoluhanta. Huja pe hita, aha pe na hinorjahonta, sadihari pe ampa mandompakkon na borat pe totap ma marpangarapan bani Tuhan in. Ai ma dingat hita janah dalankon hita bani goluhta on, haporsayai janah poltik ma ijolom hita ai halani sai iparorot Tuhan in do hita bani ganup pargoluhanta. Amen.