Renungan Mingguan Seksi Bapa GKPS, Minggu 10 Agustus 2025 (8 Set. Trinitatis)

Nas                 : Mazmur 23:1-6

Usul Doding   : Haleluya No. 127:1-3

Tema              : Menggembalakan Keluarga

Tujuan            : Agar kaum bapa tetap menggembalakan keluarga menjadi keluarga yang beriman kepada Tuhan.

“Parmahan bani Keluarga”

Hita haganupan na hinarga ni Tuhan,

Riset WHO (World Health Organization) bani tahun-tahun parpudi on pataridahkon bahasa 60% dalahi na dob dewasa tarlobih parbapaon, mengalami stress halani tekanan bani pangkorjanan, halani tanggung jawab ekonomi, sonai homa tekanan halani konflik ibagas keluarga. Sada artikel (Harvard Business Review) manuratkon bahasa buei ma bapa na magouan arah ibagas peran ni sidea sebagai pemimpin rohani bani keluarga halani halojaon, hagobiron pasal finansial, pakon tekanan sosial.

Girah sogod do hita puho, tarolos laho hu juma atap na hu kantor pakon hu ianan pangkorjanan na legan, loja mangkorja, anjaha mulak hu rumah ibagas kondisi na domma loja, gati ma lang adong be gogoh atap energi laho riap hundul pakon niombah, marbual-buali pakon inang sinrumah, apalagi ma riap martonggo. Bani kondisi na sisonai ai, sonaha ma hita boi mandalankon tanggung jawab sebagai ‘parmahan’ ibagas keluarga? Bani situasi na sonai, ai boi ope mungkin mambobai keluarganta hita gabe keluarga na gok ibagas haporsayaon, pangarapan ampa holong?

Sadarion, ipaondos do banta pangajaran marhitei Psalmen 23:1-6, sada psalm na domma somal ibogei hita, tapi totap segar anjaha bagas tumang artini. Marhitei kisah naratif ni si Daud sebagai sahalak parmahan pakon sahalak raja, jumpahonta ma sonaha Tuhan Jahowa mamparmahani goluhni, anjaha ijon ma jumpah hita sonaha hita selaku bapa boi marlajar hunjai gabe parmahan bani keluarganta bei.

Bani bagian na parlobei, ipungkah si Daud do psalm on marhitei deklarasi ni haporsayaonni na mangkatahon: “Jahowa do siparmahan ahu”. On sedo pitah kata-kata puitis, tapi sada pangakuan na personal tumang. Ongga do si Daud gabe sahalak parmahan na sintong-sintong parmahan. Ibotoh do tugas ni sahalak parmahan aima manorihi sampalan na mombur, manjaga biri-biri pinarmahan humbani sorigala panoroh, bahkan das hubani na mamberehon hosahni demi na pinarmahanni ai. Marhitei pangalaman ai, iakuhon si Daud do bahasa: “Tuhan Jahowa do na manjagai, manramoti ampa na manogu-nogu goluhku–songon au sapari mamparmahani biri-biringku.”

Selaku bapa, haganup do hita tardilo laho mamparmahani. Na gabe sungkun-sungkun aima: ise do na gabe parmahan banta? Anggo seng Tuhan Jahowa na gabe parmahanta, sonaha ma hita boi mamparmahani keluarganta? Anggo hita sandiri pe lang adong arah ni pargoluhanta, sonaha ma hita patuduhkon dalan atap membere arah pakon manogu-nogu inang sinrumah ampa niombahta? Sahalak bapa na marsijoloman hubani Tuhan Jahowa sebagai Parmahan, tontu ibagas na sabar anjaha bijaksana/pentar anjaha lebih tenang do ia ibagas na mandompakkon tantangan ni goluh. Lang anjai urah gobir sanggah adong tantangan ekonomi atap sanggah dakdanak mulai lang be manangihon hata.

Bagian na paduahon, itongah-tongah ni hiruk-pikuk ni dunia on, Tuhan Jahowa pasirsirhon “sampalan na mombur” pakon “bah parsaranan”. On aima simbol ni ketenangan, kepuasan, ampa pemulihan. Tapi ironisni, justru buei do bapa na lang ongga menikmati atau mangahapkon ketenangan ai, halani gatinan gobir, tarolos anjaha bulinsah. Hape, sihol do Tuhan mangidah hita soh tongkin anjaha mangahapkon hadameion riap pakon-Si. Sedo damei halani domma lunas utang, tapi hadameion halani porsaya hita dompak Parmahan Bolon na sintong in. Sipata ra porlu do ipaksa hita dirinta laho mambobai keluarganta riap hundul pakon Tuhan, marhitei na riap martonggo laho mangan, riap mangan, atap riap ibagas kebaktian rumah tangga na gabe “bah parsaranan” i rumahta bei. Anggo dunia on torus do sibuk, tapi anggo rumahta maningon do gabe ianan na gok ibagas hadameion atap ketenangan.

Bagian na patoluhon, pasti haganupan do hita ongga mangahapkon na loja, sedo pitah loja angkula tapi dihut do homa loja secara pertonduyon, halani beban batin, mungkin halani konflik ibagas rumah tangga, niombah na mahol iatur, atap halani gagal pangahap gabe bapa atap pargotong na talup. Tapi ijon do barita malas ni uhur ai banta: Sanggup do Tuhan Jahowa laho pahisar tonduyta. Ibotoh do panorang sadihari hita loja, anjaha ipasirsir do hagogohon na bayu. Tapi adong syaratni, maningon sirsir ma hita itogu hu dalan hapintoron, maningon iakuhon hita do ibagas toruh ni uhur bahasa ihaporluhon hita do pambobaion ampa panogu-noguon-Ni. Selaku bapa, banggal do tumang pengaruhta ibagas keluarga. Anggo sintong goluhta, pasti ididah anjaha iihutkon inang sinrumah ampa niombah ma ai. Tapi anggo manlembang do hita, tontu magouan arah ma haganup na sarumah ai. Halani ai torus ma hita marondos hubani Tuhan Jahowa ase goluhta gabe dalan na mambobai keluarganta hu surga.

Na na paompatkon, lang ihatahon si Daud “anggo” tapi na ihatahon aima “age pe”, halani sintong do pasti do roh lombang hagolapan ai bani goluhta, mungkin boi ibagas bentuk naborit, magouan pansarian, konflik atap partinggilan, bapa atap inang na lang setia, atap niombah na terjerumus bani dalan na lepak, pakon satorusni. Tapi anggo si Daud lang mabiar ia, halani Tuhan Jahowa do na mangkasomanisi. Bani parmahan, tungkot pakon simambu aima simbol perlindungan pakon pengendalian, anjaha perlindungan pakon pengendalian aipe boi do homa ibagas bentuk pinsang-pinsang atap lonsing-lonsing na manopa use mulak uhurta hubani na hinarosuhkon-Ni. Sipata maningon ilopusi hita do lombang bagas, tapi ulang ma mabiar janah ulang homa lintun. Tapi dompakkon ma ai riap pakon Tuhan, Parmahan Bolon in, anjaha dingat hita ma tongtong, paboa niombahta torus do mangidah ampa mampardiatei hita, atap na totap do hita porsaya hubani Tuhan atap lang sanggah manlopusi masa-masa na borat atap lombang bagas ni hagolapan ai bani goluh on.

Bagian na palimahon, hidangan i lobei ni munsuh aima tanda ni hamonangan. Tuhan mambere banta damei, age sanggah iinggoti munsuh hita, on aima gambaran ni haporsayaon pakon pangkasomanion ni Tuhan na luar biasa. Bani konteks ni keluarga, munsuh on boi do marrupa parlajouan, tekanan ekonomi, bahkan konflik internal. Tapi Tuhan do na mamampuhon hita laho mambobai, mangkaholongi pakon mangidangi keluarganta hansi pe situasi ni lang songon na iarapkon hita. Sai tongtong ma hita manggoluh ibagas parsaoran pakon Tuhan in. Ulang bere hita meja i rumahta lumei humbani hata ni Tuhan, ulang paturut hita tonggo gabe hal na asing humbani panangar ni niombahta, tapi bahen hita ma rumahta gabe ianan hamonangan ni haporsayaon.

Bagian na paonomhon sekaligus bagian pangujungi ni ayat renungan on, on lang pitah pasal na masa sonari tapi das do homa bani panorang na sihol roh. Ihaporsayai si Daud do bahasa dear layak ampa idopni uhur ni Tuhan torus do ai mangirik-irik ia sadokah goluhni. Yakin do ia laho totap marianan i rumah ni Jahowa sadokah ni dokahni. Selaku bapa, mamberehon warisan rohani na sisonai ai ma homa namin gabe pangarapan pakon sihol ni uhurta. Dob ai ibogei hita ma niombahta mangkatahon: “porsaya do ahu hubani Tuhan halani ipataridahkon bapangku do teladan iman hubannami”, on ma warisan na sintong.

Hita haganupan,

Psalmen 23, sedo pitah sibasaon bahen apoh-apoh, tapi on ma peta bani goluhta. Idilo do hita gabe parmahan, lang halani na gokan dear atap sempurna hita, tapi halani adong banta Parmahan na madear in. Halani ai, bere hita ma ganup goluhta hubani Tuhan Jahowa Siparmahan banta in, boban hita ma hadameion hu rumahtanggata bei, gabe siusihan ma hita bani goluh na sintong, totap ma margogoh ampa marpangarapan age sanggah ibagas lombang bagas ni goluh, manggoluh ma ibagas hamonangan hansi pe dunia torus menekan, anjaha wariskon hita ma haporsayaon na sintong in hubani niombahta. Tuhanta Siparmahan in lang ongga gagal, halani ai pos ma uhurta lang anjai paturuton-Ni homa hita gagal ibagas na mamparmahani keluarganta asal ma totap hita manggoluh ibagas Ia. Amen.