Renungan Mingguan Seksi Bapa GKPS, Minggu 20 Juli 2025 (5 Set. Trinitatis)
Nas : Ulangan 34:1-12
Usul Doding : Haleluya No. 251:1,4
Tema : Kematian Manusia
Tujuan : Agar kaum bapa mengerti dan percaya bahwa Allah berdaulat atas waktu dan kematian.
“SETIA HUBANI TUHAN RONSI MATEI”
Bapa na hinaholongan ibagas Kristus,
Sada hal na lang boi ilembangi ampa ilanglangi hita bani goluh ni jolma aima hamateian. Sintong buei do na boi iromei hita, misalni pasal na mangan, mangkorja, marjabu, bahkan pensiun, tapi sada pe lang adong hita na boi manromei hamateian. Roh do ia topat bani panorangni, tapi lang panorang ni jolma, tapi sesuai hubani panorang ni Tuhan. Panorang on ibobai do hita marlajar humbani hamateian ni si Musa, sahalak tokoh besar ibagas sejarah ni bangsa ni Naibata, anjaha mangidah sonaha Naibata markuasa pasal goluh pakon hamateian ni bangsa-Ni.
Musa, juakjuak ni Jahowa, ai do pe pasaloseihon pardalanan na ganjang na gok paruntolon pakon halongangan bolon, domma ibobai bangsa Israel luar hun Masir, mangidah laut na tarbolah, roti na turun hun langit ampa bah na luar humbagas batu. Tapi, ijin sihol imasuki bangsa Israel Tanoh Parpadanan, idilo Jahowa ma si Musa ase tangkog hu Dolog Nebo, hu pakpak ni Pisga, tontang ni Jeriko. Dob ai ipatuduhkon Jahowa ma hubani ganup tanoh ai na dob ibulawankon-Ni hinan hubani si Abraham, si Isak pakon si Jakob.
Tapi lang masuk anggo si Musa hu tanoh ai, bani pakpak ni dolog ai do Jahowa mandilo ia mulak. Isuratkon do bani ayat 5: “Jadi matei ma ijai si Musa, juakjuak ni Jahowa i tanoh Moab, tontang ni Bet Peor, anjaha seng dong na mambotoh tanomanni ai ronsi sadari on.” Rimangi hita ma sonaha sahalak pambobai na targoran bani panorang ijia, seng gombur ope matani anjaha seng surut homa ope age gogohni, tapi idilo Tuhan bani ujung ni pencapaian ni pangidangionni, narus das ma namin ia hu Tanoh Parpadanan ai. Sedo sada kebetulan ai, anjaha lang homa pitah pasal uhuman ai, tapi sada peristiwa na pataridahkon pasal otoritas pakon kuasa ni Naibata Jahowa do ai pasal panorang pakon hamateian ni si Musa.
Jahowa mandilo si Musa tangkog hu dolog anjaha hunjai pataridahkon haganup Tanoh Kanaan, tapi si Musa lang bulih masuk hujai, pitah mangidah do hansa. Sipata ra do roh sungkun-sungkun bani uhurta “mase lang ilopas Jahowa ia masuk? Ai lang na dob ipataridahkon si Musa do hasatiaonni dompak Jahowa?” Tapi ijon ma hita mangidah bahasa ise pe lang ilopas Tuhan laho manontuhon ujung ni goluhni sandiri, sonai do homa age si Musa. Tuhan Jahowa Naibata do na manotaphon batas pakon sadihari ujung ni goluhta jolma.
Sada parlajaran na penting do on banta bapa, sintong do boi irancang-rancang hita sonaha pargoluhanta marhitei na pongkut marhorja, adong rencana jangka panjang, marhorja demi masa depan ni niombah, tapi ujung ni goluhta ai aima i tangan ni Tuhan Jahowa, sedo i tanganta sandiri. Maningon marlajar do hita manjalo bahasa lang haganup tujuan ni goluh on boi jumpah atap tercapai, tapi sedo mararti homa bahasa na gagal hita ijai. Si Musa lang saud masuk hu Tanoh Kanaan, tapi domma idobhonni pandiloonni. Setia sampai akhir, ai do porlunan anjaha harganan marimbang das hubani tujuan duniawi.
Hata ni Bibelta tangkas mangkatahon bahasa si Musa matei “songon na dob hinatahon ni Jahowa. On aima sada kalimat na bagas, artini, hamateian ni si Musa sedo sada kebetulan, sedo halani pangkorhon ni halojaon, anjaha sedo pitah halani umur na dob matua, tapi ia matei halani na idilo Tuhan Jahowa. Bani jaman sondahan on, gati do ididah hita hamateian ai sebagai tragedi atap hataluon. Tapi banta halak na porsaya, iajari do hita laho mangidah hamateian ai aima ‘panggilan pulang’ humbani Tuhan Jahowa. Lang adong na matei paima das panorangni, anjaha lang adong homa na manggoluh sadokah ni dokahni anggo domma itotapkon Tuhan Jahowa panorangni.
Gabe sada apoh-apoh pakon palamlam uhur ma on hubanta bapa. Hita lang manggoluh ibagas biar dompak hamateian, tapi haundukon dompak otoritas pakon kuasa ni Tuhan Jahowa. Ia do na mambere hosah, Ia do homa na mambuat bani panorang-Ni na gokan dear ai.
Dob honsi marujung goluh ni si Musa, tampil ma si Josua gabe pambobai na baru. Bibelta manuratkon bahasa gok tonduy hapentaran do uhur ni si Josua, ai domma itampeihon si Musa hinan tanganni bani. On aima sada simbol atap tanda bahasa horja ni Jahowa lang maronti halani hamateian ni sahalak pemimpin. Hubanta bapa, gabe sipaingat do on bahasa goluh on lang pitah soal hita, tapi das do hubani pasal generasi na berikutni. Hita mambangun sedo pitah untuk dirinta sandiri, tapi dihut do homa ijai untuk niombahta, pahompunta, ampa sidea na manoruskon bokasta.
Si Musa marujung goluh, tapi marlanjut do anggo horja ni Jahowa. Totap do bangsa Israel mammasuki Tanoh Parpadanan, hansi pe lang itoruh ni pambobai ni si Musa, tapi itoruh ni pambobai ni si Josua na gabe panggantih ni si Musa mambobai bangsa ai. Halani ai lang porlu haru uhurta anggo pangahapta songon na podas tu mardalan panorang, anjaha lape tuntas iahap hita horjanta. Na tang siporlunan aima, ipastihon hita bahasa domma setia hita bani tugas pakon bagian na iondoskon Tuhan Jahowa hubanta.
Aha ma na gabe perenungan hubanta humbani kisah ni si Musa on? Na parlobei, marlajar ma hita laho mangondoskon panorangta hubani Tuhan. Ulang pala iayak-ayak hita haganup domu hubani ambisi na membabi buta. Dingat hita ma bahasa ‘Tuhan punya waktu-Nya sendiri’. Halani ai pakei hita ma panorang untuk hal-hal na marpardomuan hubani goluh na totap ai, aima pauli-ulihon haporsayaon ni keluarga, gabe siusihan, ampa mangidangi Tuhan. Na paduahon, pasirsir hita ma goluhta hu hamateian na sangap in. Hamateian sedo musuh banta halak na porsaya. Tapi hamateian ai aima labah dompak parsaranan na totap. Musa matei sebagai “juakjuak ni Jahowa”. Pangindoanta, dob marujung holi goluhta, idingat ma homa hita sedo halani jabatan atap habayakonta tapi idingat na ipudinta ma hita halani hasatiaonta dompak Tuhan Jahowa. Na patoluhon, wariskon hita ma warisan iman sedo warisan arta. Ia si Musa, iwariskon do warisan partonduyon hubani si Josua, hita pe idilo do homa laho mewariskon nilai-nilai harajaon ni Naibata hubani anak sonai age pahompunta, mangajari sidea mananda Tuhan, lang pitah mangayaki goluh dunia on hansa.
Hita haganupan,
Tongkin do hansa goluh on, anjaha hamateian sedo ujung tapi bagian humbani ranggian ni horja ni Naibata Jahowa. Si Musa, sipambobai na targoran in, marujung goluh i pakpak ni dolog sedo halani hataluon, tapi ibagas ketaatan. Ia lang masuk hu Tanoh Parpadanan, tapi ijalo Naibata Jahowa do ia hubagas parsaranan na sadokah ni dokahni in. Riap ma hita marlajar humbani goluh ni si Musa. Ibagas kuasa pakon otoritas ni Naibata do panorang sonai homa do pakon hamateian. Tugasta aima manggoluh ibagas hasatiaon, anjaha tongtong porsaya bahasa bani ujungni holi idilo ma hita mulak sesuai hubani panorang ni Naibata, sedo mangihutkon panorangta. Halani ai, marlajar ma tongtong hita ase manggoluh ibagas na pentar/bijak, gok ibagas haporsayaon anjaha setia ibagas pandiloon ni Tuhan in das hubani panorang na dob tinontuhon-Ni banta. Amen.
