RENUNGAN BAPA
20 September 2026 (16 Trinitatis)
Tema : Bapa yang Pengasih
Tujuan : Agar kaum Bapa senantiasa mengandalkan Tuhan di dalam kehidupannya
Teks : Psalmen 127:1-5
Lang adong soya-soya ibagas Tuhan
Parlobeini
Sasintongni bani goluhta on marpala-pala do hita sonaha ase goluhta sukses janah mardohar. Tapi lang haganup halak bani gogoh pakon pambahenanni maronjolan bani haporsayaon pakon pangarapan bani Tuhan in. Ase psalmen on paingatkon hita pasal sonaha do na patut “goluh, horja pakon rumah tangga” na ipajongjong ibagas Tuhan. Psalmen on idodigkon raja Salomo bani pardalanan laho tangkog hu rumah ni Jahowa i Jerusalem. Raja Salomo marhitei dodingni laho tangkog paingatkon bahasa sonaha pe gogohta anggo lang ipasu-pasu Tuhan, anggo lang ibastui Tuhan, sisoya-soya do ganupan ai anjaha lang saud.
Haganup rumah tangga pasti do manghasiholhon ase gabe rumah tangga na marmalas ni uhur anjaha gok pasu-pasu. Anjaha marpala-pala do buei rumah tangga laho manjumpahkon ai. Marhitei Psalmen 127 on sasintongni laho paingatkon ase haganup rumah tangga mambahen Naibata onjolanni, lang mangunsagahkon gogoh pakon pambotohni sandiri. Rumah tangga na tarpasu-pasu aima rumah tangga na totap mambahen Naibata onjolanni.
Isi
Anggo isahapkon pasal rumah, na gati ibayangkon hita aima bangunan. Bani Padan Nabasaia, anggo isobut “rumah” songon na isobut bani psalmen on aima gabe onjolan goluh rumah tangga. Adong dua pahara na itokanhon parpslamen bani doding laho tangkog on. Naparlobei aima goluh na margantung bani Tuhan. Boi ipardiatei hita bani ayat 1-2; halak na pauli rumah ibagas Tuhan pakon na lang; halak na manramotkon huta ibagas Tuhan pakon na lang; na mandalani ari-ari ni goluhni ibagas Tuhan pakon na lang. Tontu ayat on sedo homa na laho manobut bahasa lang porlu marhorja halak na manukangi rumah sonai age halak na manjaga halani boi do pitah maronjolan bani Tuhan. Tapi marhitei ayat on sihol ipatalar aha do bedani halak na marhorja ibagas Tuhan pakon na lang ibagas Tuhan? Ihatahon do bani Psalmen bahasa anggo seng Jahowa na pauli rumah, soya-soya do halojaon ni halak na manukangi ai. Soya do gogoh sonai age halojaonta laho mangayaki sura-sura ni uhurta bani goluh on anggo lang rapkon Tuhan in hita. On aima usihan na ipatalar parpsalmen bani sisoya-soya ni halojaon ni halak na pajongjongkon rumah lang rapkon Tuhan. Anggo seng Jahowa na manramotkon huta, sisoya-soya do parrundaon ni halak parjaga. Benteng ipajongjong laho mambahen partahanan sanggah parporangan. Halak parjaga marrunda ase aman janah maluah humbani munsuh. Tapi anggo lang ipadihut halak parjaga na ahli strategi, urah do munsuh laho parsedahon huta ai. Sadalan hujai sihol sobutan bahasa rumah tangga na ipajongjong lang ibagas Tuhan aima rumah tangga na urah maseda sanggah mandompakkon bagei parsoalan. Raja Salomo marhitei hapentaranni sihol manghatahon bahasa halak parjaga sonai age halak na manukangi rumah maningon marhorja do sadear ni dearni anjaha mambaen na tang sijengesan. Tapi anggo pitah bani horjani sidea ai hansa ikawahkon sidea lang adong Tuhan marhorja, soya-soya do ganup ai. Haganup na ijumpahkon hita bani goluhta, marhitei rumah tangga, horja, usaha pakon na legan tongon marpala-pala janah marbois gogoh do hita laho mangindahi ai haganupan tapi anggo lang Jahowa na mamasu-masu ronsi na bastu ibagas ai, soya-soya do haganup.
Napaduahon aima goluh na martuah ibagas Tuhan. Pahara na mambaen martuah ibagas rumahtangga aima anak, silayak-layak ni Jahowa. Martuah aima hataridahanni tanggung jawab bani pasu-pasu ni Tuhan in anjaha hasirsiron laho marbagi pakon hasoman. Haganup na binahenta laho pajongjongkon rumah tangga, horja, sonai age hasadaon lang boi martahan anggo lang marhitei pambobaion pakon pangkasomanion ni Tuhan in. Bani goluhta marpala-pala do hita sonaha ase sukses janah mardohar. Tapi lang haganup halak maronjolan bani haporsayaon pakon pangarapanni bani Naibata bani ganup halojaonni. Ipasirsir janah ipasu-pasu Tuhan do bani haganup na porlu bani goluhta on. Bani goluh rumah tangganta, bani horja, bani haganup gulmit ni goluhta, Naibata manramotkon janah mamasu-masu hita. Martuahma rumah tangga na ija Naibata totap ibagas Tuhan in; na lang manadingkon anjaha manlupahon Tuhan. Martuah ma rumah tangga na mambahen Naibata hagogohani.
Haganup na hinorjahonta boi manjadi anggo marhasomankon Tuhan in. Tarbatas do gogoh, pambotoh sonai age panorangta anjaha galek do hita. Hansi pe tongon bani goluhta on marpala-pala do hita sonaha ase sukses goluhta janah mardohar. Parpsalmen paingatkon hita ase bani rumah tangganta bei Tuhan ma na gabe onjolanni goluhta bani ganup panorang. Ase Tuhan ma na totap anjaha gabe onjolan ni goluhta.
Panutup
Rumah tangga na lang ipajongjong ibagas Tuhan aima rumah tangga na urah maseda janah mareong. Anggo lang rapkon Tuhan ini, atap aha pe na ihorjahon jolma in lang adong artini ai anjaha aha pe lang adong na boi tarbahen hita. Parsaoalan na roh bani rumah tangga ai dobni mambaen maseda. Haganup halojaonta gabe mararti anjaha marhasil anggo ibagas Tuhan. Rumah, keluarga, hasadaonta boi manjadi anggo ibagas Tuhan. Bapa aima na gabe sipambobai i tongah-tongah ni keluarga anjaha Kristus na gabe uluni. Ibagas Tuhan ma bapa mambobai ganup pangisi ni rumahni bani ganup langkah ronsi goluhni. Ibagas Tuhan ma hita bani na pajongjongkon rumah ronsi bani na mandalani goluh on. Rumah tangga na tarpasu-pasu aima rumah tangga na ija Naibata na gabe onjolan ni haganupan horja, rencana sonai age age sura-sura ni haganupan. Naibata ma gabe onjolan bani haganup pargoluhanta anjaha Ia na gabe benteng ni rumah tangganta bei ase toguh janah martuah hita. Amen
About the Author
