RENUNGAN BAPA 15 NOVEMBER 2026

RENUNGAN SEKSI BAPA

15 November 2026 (24. Setelah Trinitatis)

Nas : Roma 5:1-5

Tema : Buah-buah Pengharapan

Tujuan : Agar kaum Bapa menunjukkan sikap hidup sebagai orang yang berpengharapan

Parlobeini

Nuan on, hita manggoluh itongah-tongah ni dunia na lang pasti. Sadari on boi tartawa tapi patar haduan ra ma tangis. Sadari on songon namargogoh, sehat tapi patar haduan ra ma galek janah ibagas parnaboriton. Janah gati ma itangar hita nini halak “na penting totap marpangarapan”. Surat Rom on aima humbani apostel Paulus naitujuhon hubani kuria Rom-kuria na unik halani lang pitah halak Jahudi tumang tapi adong do homa na hun luar ni halak Jahudi. Tontu latar belakang ni sidea na marbeda, mambahen cara marpingkir pe marbeda ma sonai homa cara ni sidea mangidah atap mangartihon haluahon.

Halak Jahudi domma tarbiasa bani pola pikir: au maluah halani titah. Hape non Jahudi na manggoluh ibagas pargoluhan na lang mananda Naibata. Itongah-tongani perbedaan on, Paulus manurathon sada hasintongan bani pasal 1-4, “lang adong na boi maluah halani nabinahenni, haganup jolma maluah halani haporsayaonni. Janah puncakni, aima pasal 5 on “halani domma ipintori hita halani haporsayaon……” Paulus sihol patugahkon bahasa anggo domma ipintori marhitei haporsayaon, adong ma nataridah bani pargoluhanni aima naisobut “BUAH”.

Hatorangan

“Maksud hati memeluk gunung, apa daya tangan tak sampai”, hata on sihol manobut bahasa bani goluh on lang haganup songon na isurahon uhurta. Sipata gogohta lang suang, tonggo lang songon namarbalos. Bani situasi nasongonon, aha ma namambahen bapa boi totap margogoh? Ambilan on mambere balos na sederhana tapi mampangkorhon aima “pangarapan”. Bani Roma 5:1-5 on lang pitah patugahkon pasal pangarapan tapi das do homa patugahkon pasal buah-buah ni pangarapan ase marhiteihon ni ai boi bapa manggoluh ibagas buah-buah ni pangarapan.

Buah ni pangarapan adong 4 bani ambilan on, aima:

Mardamei pakon Naibata (ayat 1)

Ayat sada on mangajarhon sada hal na porlu banta, bahasa pangarapan ai ipungkah humbani namardamei pakon Tuhan.

…mardamei ma hita pakon Naibata marhitei Tuhanta Jesus Kristus. Dousa mambahen maseda parsaoranta pakon Tuhan Naibata, gabe adong jarak janah mabiar manjumpahkon Tuhan Naibata. Tapi, Pardameian pakon Naibata padearhon parsaoranta pakon Tuhan Naibata, gabe lang dong be jarak janah lang adong be habiaran manjumpahkon-Si. Porlu do botohonta homa bahasa pardameian ai, sedo horja pakon usahanta, tapi marhitei Tuhan Jesus Kristus na sir-sir mamberehon diri-Ni gabe tobusan ni dousanta. Janah pardameian on pe lang pitah konsep tumang, tapi boi iahapkon janah taridah bani pargoluhan siganup ari. Halani, anggo dear parsaoranta pakon Tuhan, tenang ma hita mandalani pargoluhan age pe memang totap do adong namambahen loja, marsitaronon pakon bueini tanggung jawab na borat selaku bapa itongah-tongah ni keluarga.

Masuk hubani idop ni uhur (ayat 2)

…..masuk ma hita hubani idop ni uhur halani haporsayaon, artini bapa gabe sipambobai itongah-tongah ni keluarga lang ipangindo gabe halak na sempurna tapi iparentahkon gabe sada halak namarpangunsandean hubani Tuhan Naibata. Anggo dunia on, gati do manuntut, mamunten janah manguhumi hita tapi ilobei-lobei ni Tuhan hita ijalo, ialo-alo janah lang ongga itulak apalagi iuhumi. Pangarapan aima namangajari hita ase sadar “adong do Tuhan”. jadi aha pe lang habiaran ibagas namandompakkon pargoluhan on. Boi do loja, tapi ulang putus asa, boi do madabuh tapi puho use janah boi do ibagas tekanan tapi jongjong use. Jadi, sada bapa namarpangarapan sedo halani lang adong sitaronon bani golihni tapi bapa na totap dohor hubani Tuhan, na marpangunsandean bani idop ni uhur ni Tuhan janah namanghaporsayahon masa depanni hubagas tangan ni Tuhan.

Tahan ibagas hamarsikon (ayat 3)

Lang ongga ipadanhon hubanta pargoluhan na urah, tapi ibagas hamaholon ni pargoluhan, hata ni Tuhan patugahkon bahasa boi do hita ”tahan”, halani pangarapan ai. Jadi, sada bapa namarpangarapan tahan do mandompakkon bagei-bagei namasa i tanoh on, lang mintor menyerah janah lang lintun humbani masalah na idompakkonni. Sahali nari halak namarpangarapan lang mintor magous sitarononni tapi dong bani cara pandang na marbeda ibagas namangidah namasa bani. Megah ibagas sitaronon, lang mararti marosuh ia bani sitaronon janah inikmati sitaronon ni ai. Halak namarpangarapan boi ia mangidah sitaronon ai gabe sada dalan / proses bani goluh na lambin dewasa ibagas haporsayaon. Lambin sabar, lambin margogoh janah lambin tahan uji bani namasa.

Pangarapan membentuk karakter na tahan uji (ayat 4)

Lang pitah “tahan” na ihasiholhon Tuhan humbani goluhta, tapi maningon taruji do homa “ketahananta”. Halak na lang tahan uji, urah putus asa, urah manringis, urah menyerah. Tapi halak na dob tahan uji, tenang, pentar/bijaksana janah stabil bani pargoluhanni. Ibobai pangarpan ai do hita hubani proses, janah dob ilopusi hita proses ai, lambin gogoh ma pangarapanta ai. Halani ai, ulang ihabiari hita proses, ulang marungut-ungut anggo proses ta ai lang urah janah borat. Halani marhiteihon ni ai, marhorja do Naibata membentuk karakterta, patoguhkon uhurta janah pabagsahon pangarapanta.

Anggo domma sonai ayat 5 mangkatahon lang be parohkon habadoron pangarapanta ai halani damei, idop ni uhur, tahan janha karakter na domma tahan uji na isobut bani ayat 1-4.

Refleksi

Seksi Bapa aima tulang punggung keluarga, namanjaga keluarga, sipamboai, pambuat haputusan janah halani ai ituntut ase margogoh, lang boi galek janah lang boi madabuh hubagas dousa. Tapi fakta patugahkon bapa pe ra do galek, lang boi mambuat haputusan na dear janah gati do homa madabuh hubagas dousa. Agepe songon na togar idahon hundarat, tapi ibagas galek halani mamingkirhon kebutuhan ni keluarga, tekanan ni horja ampa tanggung jawab na lang marna salosei.

Tapi ambilan on paingthon seksi bapa bahasa hadameion ai, lang kerja kerasta tapi roh humbani parsaoran na jenges pakon Tuhan. Halani ai, anggo sihol damei itongah-tongah ni keluarga padearma hubungan pakon Tuhan Naibata. Marpangunsandeian ma bani idop ni uhur ni Naibata, ulang bani sinadongan, jolma pakon situasi. Porini pe idompakkon ham sitaronon, sedo tandani gagal ham gabe bapa. Tapi, gabe proses ma ai ase terbentuk karakter na tahan uji.

Janah ingat ham ma, usaha boi do gagal, sura-sura boi meleset, janah hasoman boi do manadingkon hita tapi holong ni Tuhan lang ongga gagal. Lang tarbador halak marpangarapan hubani Tuhan Naibata.

Jadi ma gabe bapa

Tidak hanya punya penghasilan, tapi juga punya damai

Tidak hanya punya rencana, tapi juga pengharapan

Tidak hanya punya kekuatan, tapi juga ketekunan

AMEN