Dep. Pembinaan 
Renungan Mingguan Bapa GKPS, 23 Februari 2025 (Sexagesima)
Nas : Efesus 4:17-32
Doding: Haleluya No. 205:1-4
Tema : Taat pada Firman Tuhan
Tujuan : Agar kaum Bapa memahami bahwa salah satu sifat manusia baru adalah menaati Firman Tuhan
HATA NI NAIBATA MAMPARGOGOHI ASE PATUDUHKON HABAYUON NI GOLUH
Horas ma hubani nasiam seksi Bapa GKPS!
Pangarapannami, sehat jorgit hita ganup itumpaki Tuhan Naibata.
Lambin tambah ari-ari na ibolus hita, lambin matua do homa pakon dagingta. Irik hujai tontu nairapkon aima lambin matoras ma homa haporsayaonta. Haporsayaon na lambin matoras ipataridahkon marhitei habayuon ni goluh. Bukti ni habayuon ni goluh aima pambahenan na ibahen hita na sadalan bani rosuhni Naibata na gabe buah ni haporsayaonta. Ase pargoluhan na domma ipabayu aima pargoluhan na marbanggal ibagas Kristus, manadingkon dousa janah manggoluh bani dalan na hinarosuhkonni Naibata. Ase boi patuduhkon ciri-cirini pargoluhan na bayu maningon do parlobei iambukkon biak-biak dousa aima:
Ulang mamparlahouhon parlahou ni halak sipajuh begu-begu
Kuria Epesus aima kuria na memiliki latar belakang sipajuh begu-begu (kafir). Paima gabe bangsa ni Naibata (na porsaya) sidea, sidea aima orang kafir. Ase ipungkah Paulus podah ni hu kuria Epesus on marhitei hata “sebab itu” na dapot hita bani Alkitab (terjemahan bahasa Indonesia). Hata “sebab itu” memiliki arti penegasan na mengandung unsur perintah yang mendesak bani aha na sihol hatahononni. Irik hujai, taridah do homa on bani terjemahan bahasa Simalungun “ibagas Tuhan in”. Ase aha na sihol sobutonni aima suatu perintah yang mendesak ibagas Tuhan. Parentah na mendesak ai bersifat larangan aima: “Ulang ma nasiam marparlahou songon halak sipajuh begu-begu”. Tontu tangkas do bani sidea sonaha biak ni halak sipajuh begu-begu, halani na hunjai hinan do sidea. Sonari sidea lang be sipajuh begu-begu tapi siirikkon Tuhan do, na porsya do, halani ai maningon do sidea mubah humbani biak hasipajuh begu-beguon ai, halani maningon sintong-sintong do biak ni halak sipajuh begu-begu ai irotap humbani sidea janah lang adong be kaitanni. Sidea aima halak na dob tinobus ni Kristus, marhitei darohni humbani kuasa ni hagolapan (bnd. 2:1-5). Sonari sidea aima angkula ni Kristus, halak na pansing (1:1), halak na idilo ni Jesus (Rm. 1:7), halak na idilo ni Jesus Kristus (Rm. 1:6) halani ai maningon manggoluh do sidea songon pandiloonni sidea ai. Goluh ni halak Kristen marbeda tumang pakon goluh ni halak sipajuh begu-begu. Seng dong hubungan ni on. Halani ai lang boi be toruskonon ni sidea biak sisapari ai. Irik hujai lang boi homa ituruti sidea biak sisapari janah ihorjahon homa biak siirikkon Tuhan Jesus. Biak na madear ai lang pitah ihorjahon sanggah panorang pargantihan ni haporsayaon ni sidea, tapi maningon tubuh do sidea ibagas panandaion na sintong dompak Jesus janah maningon itoruskon do ai das hubanu ujung ni pargoluhan ni sidea. Seng boi ganggang darngos.
Kuria na hinaholongan ibagas Tuhan Jesus Kristus!
Ra, hita pe adong do latar belakangta na lang iharosuhkon Tuhan. Sonari idilo do hita manadikkon biak-biak hasaparion ai, na lang dear janah na sisoya-soya ai. Rotap hita ma hubunganta pakon biak na lang madear, pingkiran na lang madear atap sisoya-soya. Tapi pingkiri hita aha na mambahen rosuh uhur ni Tuhan. Salaku seksi Bapa GKPS, idilo do hita hubani habayuon ni uhur, uhur na sintong-sintong bayu. Uhur na bayu marbuahkon parlahou na bayu. Anggo roh hubagas pingkiranta na masambor, na merencanakan na lang dear dompak hasoman, atap merencanakan perjudian, rayoh, atap merencanakan jalan pintas yang dianggap pantas, dingat hita ma, lang sisapari ai be hita. Domma rotap hita hunjai irotap daroh ni Jesus. Lang be sipajuh begu-begu hita. Tapi halak na porsaya do. Ulang ma pamapir hita uhurta, botoh hita ma na maila, ulang ma iondoskon hita dirinta hubani na marpoya-poya anjaha ulang ma ihorjahon hita sagala habutakon marhasoman uhur haut (ayt. 18-19). Halani seng sonai harosuh ni Tuhan.
Marguru pasal Kristus
Sebagai akibat lang dong ni parsaoran na dear dompak Tuhan, tubuh ma parlahou na masambor. Sonai do homa sebalikni, sebagai akibat ni parsaoran na dear pakon Tuhan, tubuh ma parlahou na jenges. Tuhan ibagas Tonduy Ni in do hansa na boi mambahen hita mananggali biak na masambor janah mamparlahouhon biak na jenges. Halak na porsaya domma marguru pasal Kristus (ayt. 20). Kristus do sumber pakon dasarni perubahan. Kristus aima Tuhan na gok kuasa, na mambere gogoh-Ni bani na porsaya bani ase margogoh manlawan hisap-hisap ni daging pakon biak-biak hasaparion. Anggo domma marguru pasal Kristus, mararti ma ai manangar pakon mamparlajari hatani Tuhan. Hata ni Naibata do hansa na gabe balos bani haganup paruntolonni goluh age bani usaha-usaha na ibahen hita ase totap hita mardalan bani dalan ni Tuhan. Nini do bani 2 Timoteus 3:16: “Ai sagala Surat in sinahapkon ni Naibata do, anjaha marguna mamodahi, maminsang, pauli-ulihon ampa manogu-nogu hu hapintoron”. Hata ni Naibata markuasa mangubah jolma”. Ase anggo sanggah lutu pingkiranta, hubani hata ni Naibata ma hita melarikan diri, sedo hubani tawaran-tawaran ni dunia on na memang menggiurkan. Gabe renungan ma homa on bani seksi Bapa GKPS, mangidah use hubani hasomalan-hasomalanta sanggah borat sipingkirhononta. Hubani aha atap huja do pelarianta? Manggila-gila hubani keluarga? Mar-game na mungkah ni mencari hiburan hape gabe halalapan, rugi materi janah rugi waktu? Sonari ipasingat hata ni Tuhan on do hita, marguru pasal Kristus mambere gogoh na mardapot-dapot. Pangkorhonni na manangar hata ni Tuhan adong damei, tenang mamingkirhon sipingkirhonon, janah efekni jangka panjang. Lang songon efekni hiburan-hiburan na dong i dunia on, na berefek jangka pendek, tartawa atap puas tongkin tumang, bahkan justru bueinan do na mandabuhkon. Parajin hita ma manangar pakon mamparlajari hata ni Tuhan.
Mamakei jolma na baru
Nini bani ayat 24 nas renunganta on: “Anjaha pakei nasiam ma jolma na baru, na tinompa usih hubani Naibata, ibagas hapintoron ampa hapansingon na botul.” Ipakei mararti iboan-boan janah ipatuduh. Anggo iumpamahon hita pamakei on songon pamakeinta bagi baju, sonai ma ai iboan hita janah talar ididah halak. Pamakeinta bani jolma na baru gabe hasaksian na manggoluh na ididah halak. Bukti na domma marguru hita bani Kritus aima mangambukkon ladung, anggo manggila pe lang das mardousa, na sipanangko hinan lang be manangko. Ra ma ia loja mansarihon na bani pakon bani keluarga ni. Lang be ia mamilih jalan pintas yang dianggap pantas. Daulat do ia marparlahou. Lang ra ia pabador dirini marhitei na manangko. Lang ra ia mangankon na tinangko janah mambere ai bani keluargani. Na ulang do bani mambere tangkoan panganon ni niombahni. Irik hujai na domma marguru pasal Kristus marhata na sopan lang na butak. Rosuh do ia manluarhon hata na pauli-ulihon. Ipadaoh do riting ni uhur, gila, marah, sorgang-sorgang. Bapa na domma marguru pasal Kristus lang marosuh manorgangi janah lang homa manrisai (ayt. 26-31).
Bapa na domma marguru pasal Kristus aima bapa na basar, paridop ni uhur, sirsir marsisasapan dousa. Biak ni halak na domma idilo janah mangauhon pandiloon gabe halak siirikkon Tuhan taridah do ai bani goluhni. Marosuh do halak marhasoman pakonsi janah gabe surat ni Tuhan na tabuka do goluhni. Amen.
