Renungan Mingguan Seksi Bapa GKPS, Minggu 08 Juni 2025 (Pentakosta I)
Nas : Yohanes 14:15-17
Usul Doding : Haleluya No. 80:1-3
Tema : Roh Kudus Diam di Dalam Kita
Tujuan : Agar kaum bapa meyakini bahwa Roh Kudus berdiam di dalam dirinya.
“Bapa na Porsaya, iiani Tonduy Napansing”
Bapa na hinaholongan ibagas Kristus,
Hajongjonganta selaku bapa sedo pahara na urah tarlobih bani panorang sondahan on. Bagei do tuntutan na roh hubanta, humbani keluarga, pangkorjanan, masyarakat, bahkan humbani gareja. Adong do masani iahapkon hita dirinta songon sahalak jenderal na mambobai pasukan, sekaligus gabe supir, teknisi, konsultan keuangan, tukang, bahkan gabe pelawak i rumah. Tarsirom do hita idarat, tapi loja ibagas. Ra mungkin isuba hita do ase taridah songon tirgas anjaha gogoh, tapi uhurta songon na lumei. Anggo roh ma panorang pakon pangahap na sisonai ai, ra do tubuh sungkun-sungkun: “Tarlahoi au do ganupan on?” Pitah ahu do na marjuang on?
Sadarion, marhitei renunganta on, buha hita ma hauhuronta anjaha jumpahkononta ma balos bahasa lang ipaturut sahalak hita, adong do Tonduy Napansing na mangiani hadirionta mangkasomani hita.
Bani ayat 15 isobut, “Anggo na holong do uhurnima Bangku, dalankononnima do titah-Ku.” On aima hata partadingan ni Tuhan Jesus hubani susian-Ni, ibagas hata ai lang isirang holong humbani na mandalankon titah/ketaatan. Buei do jolma mangkatahon bahasa sidea mangkaholongi Tuhan, tapi goluhni otik pe lang pataridahkon na mangkorjahon harosuh ni Tuhan. Holong na sintong ai bersifat aktif, lang sekedar emosi, tapi komitmen. Anjaha ibagas holong ai do Jesus mangkatahon bagah-bagah-Ni na luar biasa aima mamberehon Tonduy Napasing, Sipangurupi ai.
Bapa na hinaholongan, ontangan ma on homa banta, sedo sonaha ase sempurna, tapi sonaha ase manggoluh hita ibagas holong ampa ketaatan. Sanggah hita mamilih laho menaati Tuhan hansi pe dunia on manartawai hita, ijai ma hita mambuha uhurta manjalo parroh ni Tonduy Napansing marianan ibagas hadirionta.
Bani ayat 16, isobut, “Anjaha pindoon-Ku ma bani Bapa in, ase ibere bannima sada Pangapiti na legan, ase Ia ma mangkasomani hanima lalab.” Ibotoh janah iarusi Jesus do bahasa susian-Ni pasti merasa kehilangan atap magouan dob honsi Ia naik hu nagori atas. Iporluhon sidea do guru, pemimpin, pembimbing, na mangkasomani ronsi na mangajari sidea. Sonai do homa hita, tontu iporluhon hita do sipangurupi/penolong banta ibagas na mangajari niombah, mangkaholongi sinrumah, marhorja ibagas na bujur ampa jujur, totap bani hajongjongan sebagai bapa ibagas Kristus. Na gabe barita malas ni uhur aima: lang itadingkon hita! Ibere do banta Tonduy Napansing, on sedo sekedar kekuatan ajaib, tapi Ia aima pribadi ni Naibata na manggoluh ibagas hita, na mangurupi hita. Sanggah ibagas na bingung hita, Ia ma na mambere pengertian/pangarusion banta, sanggah ibagas na galek hita, Ia ma na mambere hagogohon, sanggah ibagas na targoda hita, Ia ma na paingatkon pasal hapansingon banta.
Bani ayat 17 isobut, “in ma Tonduy hasintongan in, na so tarjalo dunia on, ai seng ididah anjaha seng itanda, Tapi itanda hanima do Ia, ai na rap ma Ia pakon hanima, anjaha ibagas hanima ma Ia.” Ihatahon Jesus do bahasa Tonduy Napansing ai lang roh pitah sahali-sahali hansa, tapi Tonduy Napansing ai riap anjaha marianan ibagas hita, tading riap anjaha menetap marianan ibagas hita sedo ‘datang dan pergi’. Artini, anggo porsaya do hita hubani Kristus ampa mangkaholongi-Si, lang be idarat ni rumahta Tonduy Napansing ai paimahon ase iontang masuk hubagas, tapi domma tading anjaha marianan Ia ibagas hadirionta.
Sebagai sahalak bapa, ra do mungkin iahapkon hita lang talup hita ianan ni Tonduy Napansing ai, halani mungkin iahapkon hita gati anjaha urah ope hita manggila, lape gabe siusihan bani niombah, atap maruntol halani dousa, pakon na legan. Tapi maningon tangkas do ibotoh hita bahasa memang Tonduy Napansing ai roh hubanta seng halani talup hita, tapi halani hita mangkaporsayai pakon mangkaholongi Jesus Kristus. Tonduy Napansing ai tading anjaha marianan ibagas dirinta aima laho membentuk/manopa hita sedo laho menuntut kesempurnaanta. Dos songon sada rumah na irenovasi nanget-nanget, dobni gabe jenges, sonai ma Tonduy Napansing membentuk/manopa hita gabe pribadi na lambin dokah lambin songon Kristus.
Anggo marianan ma Tonduy Napansing ai bani hadirion ni bapa, lang sarupa be goluhni pakon na dob in. Adong ma hamubahon na taridah. Bani goluhni, bapa gati maningon mambuat haputusan na borat, mungkin ibagas pangkorjanan, sonai homa ibagas keluarga. Tonduy Napansing pasti mambere hapentaron/hikmat na bahkan melampaui logika ni jolma. Na mangihut, anggo adong ma konflik, tarlobih bani pargoluhan rumah tangga, misalni sanggah manggila inang sinrumah, atap niombah mangalo/membangkang, atap hasoman sahorja gati patubuh ringis, Tonduy Napansing pasti mangurupi hita untuk totap lamlam, tenang janah bijak. Dob honsi ai, marhitei Tonduy Napansing aima Tonduy holong. Urupan-Ni do hita laho mangkaholongi tanpa syarat, bahkan sanggah lang ihargai atap ibagas na loja pe hita. urupan-Ni do homa hita totap pongkut ibagas haporsayaon. Tonduy Napansing mambere hagogohon banta ase totap setia ibagas na martonggo, mambasa ampa mamparimbagaskon Hata ni Tuhan, sipardihut tongtong ibagas pangidangion bahkan age sanggah horah semangatta.
Bapa na hinaholongan ibagas Kristus,
Na gabe tantangan banta aima, isadari hita do adong Tonduy Napansing ibagas dirinta? Ongga do hita marondos ampa mangunsagahkon gogoh ni Tonduy Napansing ai bani goluhta? Jadi na gati persoalan ijon aima sedo soal kehadiran ni Tonduy Napansing, tapi soal kesadaranta do pasal kehadiran-Ni ai bani dirinta. Gati do hita terlalu sibuk, terlalu kuat sendiri, terlalu margantung hubani logika pakon tenaga ni jolma. Usih songon sasahalak na adong genset ni i rumah, tapi lang ongga ipagoluh sanggah listrik padam, buei do bapa na ginoran halak Kristen tapi lang manggoluh ibagas kuasa ni Tonduy Napansing halani lang isadari bahasa Tonduy Napansing ai domma marianan ibagas dirini. Sadari on, ipasingat hata ni Tuhan in do hita: Tonduy Napansing domma marianan ibagas hadirionta, bapa! Pakei ham ma kuasa-Ni! Parsahapkon ham ma Ia! Unduk ma ham bani pambobai ni Tonduy in!
Hita haganupan, boi do loja hita pambahen ni dunia on, mungkin hagoluhan i keluarga pe mungkin boi do menantang, goluh on mungkin boi do gok tekanan, tapi dingat hita ma on: lang ipaturut Jesus Kristus in hita mardalan sahalak hita, tapi ibere do banta Tonduy Napansing marianan ibagas hadirionta. Ase lang be jolma biasa, atap bapa na biasa-biasa hansa hita, tapi hita aima bapa na igoki, ibobai, ampa ipargogohi Tonduy ni Naibata sandiri. Halani ai tongtong ma dingat hita, sanggah lang sanggup hita, adong do pangurupi/penolong ibagas dirinta. Sanggah lungunan hita, adong do Tonduy Napansing na lang ongga manadingkon hita. Sanggah lang ibotoh hita aha na sihol sibahenonta, tenang, marhorja do Tonduy hasintongan in laho mangajari ampa mambobai hita. Padihut hita ma Ia bani ganup haputusan ni goluhta, tangihon ma hata-Ni na manggora uhurta, anjaha paturut hita ma kuasa-Ni paimbaruhon hita gabe bapa na iharosuhkon Tuhan, anjaha gabe harosuh homa age i keluarganta bei. Amen.
