PA BAPA GKPS

Minggu, 17 Mei 2026

Nas             : Lahoan ni Apostel 4:32-37 (Exaudi)

Thema        : Kepedulian dan Solidaritas sebagai buah persekutuan

Tujuan       : Agar kaum bapa mengetahui dan hidup dalam pola jemaat yang benar sebagai sebuah persekutuan rohani.

Doding       : Haleluya 216:1-4

Gabe Bapa Namaridop ni Uhur

Parlobeini

Bani buei halak adong do istilah ‘yang penting cuan’ ganup ma ihorjahon, sonaha ase marisi dompet, saldo tabungan martambah tiap ari. Domma adong horja tapi buei ope halak manambahi horja sampingan atap na gati isobut passive income (pendapatan tambahan) marhitei na martiga-tiga/agen, marusaha, gabe content creator pakon na legan. Itambah homa bani gaya hidup ampa kebutuhan na lambin meningkat gabe mambahen jolma in marusaha laho mansuhuni ganupan sura-surani.

Hatorangan

Hape bani bahan PA ta minggu on ipatuduh banta sada contoh komunitas na marbeda. Ijumpahkon hita sada huta ni halak karisten, aima gareja na parlobei ai, na berkomitmen sidea laho mambere janah mangondoskon aha na adong bani sidea hubani humpulan ni halak na porsaya ai. Janah adong do homa humbani side ana manjual arta ni sidea asea dong sibereon ni sidea hubani hasoman sahaporsayaon bani hasadaon ai.

Ijon iidah hita sada bagian na luar biasa humbani surat ni Lahoan ni Apostel on, sihol do hita marlajar sonaha idop ni uhurni gareja na parlobei ai. Aha do na mangonjar uhurni sidea ase sonai ma sidea maridop uhur marhitei habayakon na adong bani sidea. Janah anggo ibandingkon hita bani kuria nuan on, adong ope nani idop ni uhur na sonai ai, na sirsir marsibere-bere sedo halani na marlobih-lobihan tapi sirsir manjual aha na adong bani sidea laho mangurupi halak na legan, hasoman sahaporsayaon? Boi ope nani hita ipungkah humbani parhorjani kuria in laho mangusihi pambahenan ni gareja na parlobei ai i tongah-tongah ni trend na masa nuan on ganup halak tarmasuk ma juak-juak ni Tuhan pitah mamingkiri na porlu bani do hansa? Namin halani hatani Tuhan do on, janah ongga do masa ai bani kuria na parlobei, tontu siusihon do ai banta, na ningon sadar hita laho mandalankon ai marhitei na barani mamungkah pambahenan na sonai ai.

Marlajar humbani teks on, iidah hita kuria na parlobei ai mengalami pertumbuhan, marbanggal do bilangan ni sidea. Lambin buei bilangan ni halak na porsaya ibagas panorang na pondok. Naibata marhorja i tongah-tongahni sidea janah Ambilan Namadear pe torus ibaritahon sidea. Sidea torus marsaksi pasal parpuhoon ni Jesus ampa idop ni uhur ni Naibata na tongtong homa marhorja i tongah-tongahni sidea. Luar biasa do sidea ai. Janah lang singgan ijai hansa, iidah karakter na mencolok humbani kuria na parlobei ai aima uhur na maridop ni uhur ampa sirsir marsibere-bere.

Bani ayat 32 ai, ganup do sidea sauhur sapingkiran, lang adong age sada humbani sidea na mangakuhon paboa ai bagian ni sidea sandiri tapi gabe parbagianan rup do. Buahni bani ayat 34, gabe lang adong be na marhahurangan i tongah-tongahni sidea. Bani panorang ai lape adong sistem na ipakei laho mambahen ase sejahtera masyarakat, tapi anggota kuria ai boi mamastihon paboa seng adong na marhahurangan age sada humbani sidea. Samintolah ma manimpan humbani na sinari sidea bani diri ni sidea, justru sidea marinvestasi na banggal bani horja ni Tuhan. Sidea manangar janah mandalankon parentah ni Jesus marhitei na patumpu arta i nagori atas lang i tanoh on.

Idop ni uhur ampa dear layak ni kuria na parlobei ai aima marhitei idalankon sidea ganupan ai ibagas borsih ni uhur, lang halani paksa, sirsir do sidea berkorban, mangusihi Jesus na dob mambere diriNi bahen tobusni dousa ni ganup dunia on. Idop mi ihur ni sidea bebas janah marlobih-lobih. Ganup ihorjahon sidea humbani hasirsiron ni sidea bei. Ai do pilihan ni sidea, gabe sada keluarga bolon halak na porsaya. Ihorjahon sidea ai ibagas malas ni uhur, megah do uhurni sidea daoh humbani uhur gobir, mabiar hurang bani ari patar, lang sonai sidea. Halani ianggap janah ihaporsayai sidea paboa sidea aima sada keluarga harajaon ni Naibata, tontu ningon marsiurupan do sidea janah marsidukungon.

Sirsir berkorban, mangondoskon artani sidea domu bani na porlu bani kuria in, iondoskon sidea do na dong bani sidea ai bani nahei ni apostel. Ipanjuali sidea do rumah ni sidea janah iondoskon bani apostel, dob ai ibere ma bani na marhahurangan domu bani haporluon ni bei. Hunjon taridah hita paboa sidea ai lang mangunsagah hubani arta na adong, tapi mangunsagah ampa marsigantung bani Tuhan do sidea. Iondoskon sidea do artani sidea, ipatumpu domu hubani haporluon ni kuria in. Bani ayat 36, sada contoh, si Josep, sahalak Lewi hun Siprus, na sinobutni apostel-apostel si Barnabas, manjual ganup jumani janah mamboban duit janah iondoskon bani nahei ni apostel-apostel. Lang isangsihon hita be sonaha banggal ni pengorbananni sidea, janah rosuh do uhurni Tuhan Jesus bani galangan na sonai ai.

Hohonaanni

Aha na idalankon kuria na parlobei ai, tontu halani na dob iahapkon janah ihaporsayai sidea do paboa Naibata maridop ni uhur parlobei hubani sidea. Na mangusihi Naibata do sidea, janah namangusihi Kristus Jesus. Aha na mangonjar uhurni sidea mandalankon ai aima halani sidea aima anak-anak ni Naibata. Idop ni uhur ai aima gabe dalan laho martarimakasih bani ganup idop ni uhur ni Naibata na dob ijalo sidea. Naibata Bapa, sirsir mangondoskon Anak sasadani ai laho mambere haluahon banta. Ia mangondoskon na tang siharganan Bani, bahen tobus ni dousa ampa hamateian ai. Tontu anggo isadari sonai, tubuh ma ibagas uhurni sidea mangkorjahon idop ni uhur ai bani goluhni sidea, mangusihi Naibata, gabe sipartarimakasih bani Tuhan. Iondoskon sidea ma na tang siharganan bani Tuhan. Halani arga do homa sidea itobus.

Tonduy Napansing ma na mangajari kuria ai mangkagoluhkon haporsayaon ni sidea. Tontu Tonduy Napansing ma homa na iarapkon hita mambobai ampa mangajari hita laho mandalankon songon na idalankon kuria na parlobei in. Maridop ni uhur. Sirsir ma seksi bapa bani kurianta gabe bapa na sirsir berkorban, mangondoskon na tang siharganan bani harajaon ni Tuhan. Seksi Bapa lambin sada ma, ipungkah ma kegiatan marhitei partonggoan, parguruon koor, vocal group ampa horja pelayanan ampa program na legan tandani na ihatarimakasihkon hita do idop ni uhurni Tuhan in na paluahkon hita. Ulang gap loja hita laho mansarihon goluhta hansa, gabe bois holi panorang lang adong be kesempatan laho pataridahkon haporyaonta na marbanggal janah marbuah bani kuriata bei. Sanggah sompat ope, adong panorang, maridop ni uhurma hita, bere hita ma tang sidearan ai bani Tuhan in. Sadari hita ma paboa ganup na adong banta on marharohan humbani pasu-pasu ni Tuhan do hansa. Paubah hita ma cara marpikirta paboa goluhta on lang marsigantung bani pansarianta, artanta, gogohta tapi bani Tuhan in do. Ulang ipatumpu hita arta i dunia on, tapi patumpu hita ma arta na i nagori atas. Halani tongkin do hita ijon, dokahan do holi hita rap pakon Tuhan in, ronsi sadokah ni dokahni. Ahapkon janah haporsayai hita ma idop ni uhurni Tuhan goluhta on, ase iusihi hita Ia, gabe paridop ni uhur hita bani pargoluhanta dompak Tuhan pakon hasoman jolma. Amen.