Parambilan 3:1-14

Parlobeini

Anggo ibasa hita bani bindu 1:1,12 ni buku Parambilan on taridah do hunjin, ia hata on  aima na humbani si Salomo, raja i Israel, raja na dapotan uhur na pantas humbani Naibata domu hubani pangindoanni (1 Raja-raja 3:9-12). Marulak-ulak do isobut bani buku on paboa sisoya-soya do haganup bani goluh on, anjaha bani bindu 12:8 ihatahon do: “Sisoya-soya do tongon nini parambilan ai, sisoya-soya do haganup.” Sonai pe, anggo iparuhurhon bani panutup ni buku on, tangkas ma, sedo na laho mangajari atap mangarahkon  ase apatis hita jolma bani goluh on, maruhur janah bersikap ‘in ma hujin, paturut ma sonin’, tapi sabalikni do: ase marhapentaran, ‘berhikmat’ hita bani goluhta janah mabiar bani Naibata. Hikmat atap hapentaran in aima hapentaran na roh humbani biar mangidah Naibata Jahowa. Marhitei hata ni Naibata pinargogohan ni TonduyNi do jumpah hita hapentaran in. Pangarusion na sonin do homa na itokanhon bani Psalm 111:10: “Biar mangidah Jahowa do parmulaan ni hauhuron, dapotan pangarusion na madear do sagala na mandalankonsi, totap do baritani ronsi sadokah ni dokahni.” (Pausih Podah 1:7). Age bani  panutup ni buku on isurathon do: “Pangibulan ni haganup na dob binogei ai: Habiari ma Naibata anjaha dalankon ma titahNi, ai do hawajiban ni ganup jolma. Ai boanon ni Naibata do sagala pambahenan hu paruhuman, haganup na ponop, na dear atap na sambor pe ai (12:13-14).

Khusus bani teks ambilanta itarsingati do pasal panorang, paboa marpanorang do ganup bani goluh on. Halani ai, sihol do ase hita pe pentar ibagas hal na mardomu hubani panorang in.

Hatoranganni

Bani ayat 2-8 isobut do 14 hal na masa atap na boi masa ibagas panorang na adong. Ipungkah humbani ‘adong panorang tubuh, adong panorang matei’. Sada kepastian! I holang-holang ni haduasi ai buei masa bani goluh on hal na madear pakon na lang madear idalankon jolma. Marpardomuan do ai deba hubani horja, umpamani manuan  pakon pakon mangumpat. Dong na marpardomuan hubani ahap pakon suasana hati, umpamani tangis pakon tartawa, manghaholongi pakon mardomdom pakon na legan. Tontu buei ope na boi sobuton ambah ni na tarsurat ijin. Haganupan ai masa atap tarjadi ibagas panorang anjaha buei hunjin mamboiskon panorang. Anggo mambahen na madear atap na marguna do bois panorang, dear do ai, hape gati do bois panorang  manghorjahon  atap manlahoi na lang madear atap na lang marguna, janah marhangaluton do jolma bani na manghorjahon ai. Tongon domma gabe rupei ni jolma na dob mardousa hangaluton ai. Sonai pe ibere Naibata do sihol ni uhur pasal sisadokah ni dokahni bani jolma. Tong ope sura-sura na madear sura-sura ni Naibata pasal jolma in. Halani ai seng dong sidearan bani jolma in humbani na marmalas ni uhur ampa pasonangkon dirini ibagas panghasomanion ni Naibata sadokah ni  goluhni, anjaha ia boi jolma mangan pakon minum, mangidah na madear ibagas sagala halojaonni, ai pe sibere-bere ni Naibata do. Haganupan ai sihol mambobai jolma bani biar dompak Naibata, songon na isurathon bani panutup ni buku on: Habiari ma Naibata anjaha dalankon ma titahNi.

Hahonaanni

1. Marsintig do panorangta i tanoh on. Dong panorang tubuh, dong panorang matei. Gati do hita mangisi formulir panorang partubuhta. Tangkas do idingat hita ai. Tapi seng dong sada pe na mambotoh panorang parmateini. Sandihari, ija, sonaha ai, seng dong na bersangkutan mambotoh ai. Paima matei ai do hansa jolma boi mambahen mararti goluhni bani hagoluhan on. Pangkorhonni lang pitah bani goluh si sonari na tongkin on, tapi das hubani goluh na sihol roh, na manongtong ai. Naibata sandiri mansurahon ase mararti goluhta i tanoh on marhitei hadearon-hadearon na boi ibahen hita. Dong sada doding na jenges pasal in: “Dari semula telah Kau tetapkan hidupku dalam tanganMu, dalam rencanaMu  Rencana indah telah Kau siapkan bagi masa depanku yang penuh harapan. Semua baik, semua baik, apa yang telah Kau perbuat di dalam hidupku. Semua baik, semua baik, Kau jadikan hidupku berarti.”
2. Pargunahon panorang! Mardalan do torus panorang janah ibagas in do hita manggoluh. Putaran ni jam do mulak tong hu sogod-sogod, tapi anggo goluhta na marsintig on mardalan do mangayaki ujungni, atap piga sogod pe ai. Ibagas pangarusion na sonin ma ningon pentar hita manggunahon panorang ibagas biar dompak Naibata. Marbagei do tantangan pakon godaan bani na mamakei panorang in. Deba ma ai ‘manunda’ panorang atap kesempatan, sonai homa marsoya-soya panorang. Manunda-nunda sada horja na patut horjahonon tarmasuk do bani  sikap na hurang bijak manggunahon panorang. Bani tahun onom puluhan dong do singat-singat na maharga pasal ai bani lambak ni buku tulis ni parsikolah: “Jangan tunggu sampai besok, apa yang dapat anda kerjakan hari ini. Jangan lupa!” Agepe lang kutipan humbani hata ni Naibata hata ai, tapi seng marlawanan ai hubani rosuh ni Tuhanta, halani tarmasuk na manggunahon panorang secara berhikmat do hita anggo ijolom hita prinsip na sonai ai. Mararti tumang do singat-sinat ai anggo bagas iparuhurhon anjaha idalankon. Bani na marsoya-soya panorang, mardalan do panorang ai, janah ra dong do kegiatan bani ai, tapi na lang atap pe na hurang mararti, bahkan sipota na maboan hasedaon. Porlu do dingaton ‘skala prioritas’ age bani na mamakei panorang: manghorjahon na porlu, na lobih porlu pakon siporlunan. Halani ai porlu do na mangadongkon perencanaan, agepe ibotoh hita do homa, seng haganup rencananta, age na madear boi saud songon na iranggi hita. Pori pe lang saud songon rencananta na dear ai nini uhurta, lang halani ai mundur semangatta, halani ijolom hita do hata ni Tuhanta: “Haganup do manumpak hubani na madear bani sagala na marholong ni uhur bani Naibata, na nidiloNi humbani sura-suraNi hinan.” (Rom 8:28) Sadokah ibere Naibata ope banta panorang, humbani gok ni uhur ma horjahon hita sagala horjanta, songon na bani  Tuhan in, sedo bani jolma (Kolosse 3:23). Ulang itunda-tunda, sanggah dong ope panorang horjahon hita ma na madear. ‘Sonari’ ma panorang ai! Ibagas pangarusion na sonin ma sihol hita bertumbuh, marbanggal ibagas haporsayaon pakon pandalankonon.

Bani ujungni dong do ‘penilaian’, na igoran paruhuman. Age bani hata ni Tuhan Jesus torang do pasal ai. Tongon, sedo halani paruhuman ai ase mabiar hita bani Naibata anjaha idalankon hita hataNi. Tapi halani hal na patut do ai, halani pambahenanNi na dob manobus janah paluahkon hita. Lang homa balas jasa ai. Tapi songon ojur ni Johannes ai do: “Maruhur holong ma hita, ai  parlobei do Ia manghaholongi hita” (1 Johannes 4:19); manghaholongi Naibata pakon hasoman jolma ampa tinompa na legan gabe tanggungjawab ni hita na tinobus  janah na porsaya. Manghaholongi, mangidangi, padear-dearhon tinompa ni Naibata dihut do in tanda ni hita na manghaholongi janah mangidangi Tuhan. Pargunahon hita ma panorang laho mangidangi, songon hata ni doding on: “Hidup ini adalah kesempatan, hidup ini untuk melayani Tuhan, jangan sia-siakan waktu yang Tuhan bri, hidup ini harus jadi berkat. O Tuhan, pakailah hidupku, selagi aku masih kuat; bila saatnya nanti ‘ku tak berdaya lagi, hidup ini sudah jadi berkat.” Lang sisoya-soya goluh pakon panorang bani halak na porsaya. Manggoluh laho mangidangi Tuhan.

Pdt. SA. Girsang