MALUAH JANAH MONANG MARHASOMAN KRISTUS

 Pangungkabon 7:2-9

 Parlobeini

I tongah-tongah ni krisis ekonomi, kemerosotan moral pakon ancaman atap terror, buei do jolma na pessimis pasal masa depan ni pargoluhon on hansi pe dong do na totap optimis homa. Tapi persentase ni na pessimis lambin banggal janah sebalikni na optimis lambin moru domu hubani na masa nuan  baik bani skala nasional sonai homa internasional. Hal sisonai jumpah do homa bani buku Pangungkabon na manggambarhon pasal na sihol masa bani ujungni panorang maronjolan hubani pangidahan ni Johannes i pulau Patmos. I lobei ni ambilan on, khususni ayat parpudi ni bindu 6 jumpah do ungkapan na pessimistis ija ihatahon :” ai domma roh ari ni ringis ni na banggal in; anjaha ise ma na boi manahan in? (6:17). Bani Bindu 7 jumpah hita do sada bentuk peralihan atap transisi. Bani bindu 6 isobut pasal na mambuha 6 (onom) lak na manggambarhon suasana na pessimis na gabe gambaran pasal penindasan atap tekanan dompak harajaon ni Kristus i tanoh on. I tongah-tongah ni suasana na sonai ma mambahen tubuh sungkun-sungkun “ise ma na boi manahan in?”

Hatorangan

Teks ni ambilan on aima na gabe balos bani sungkun-sungkun na sinobut in,  na patalarhon pangarapan i tongah-tongah ni keputusasaan ampa suasana na  mengerikan domu hubani pangidahan ni Johannes na gabe panurat ni buku on. Johannes patalarhon atap mangungkab paboa adong do na  boi tahan atap manahan age pe i tongah-tongah ni situasi na gok habiaran ai janah ipatugah do hubanta sonaha dalan ase totap memiliki pangarapan i tongah-tongah ni suasana keputusasaan na semakin marbanggal. Igambarhon do bani teks ni ambilan on pasal parseda ni dunia on (7:1-2), tapi sekaligus do homa ipataridahkon pasal penyelamatan ni haganup jolma na hinaholongan ni Naibata, aima juak-juak-Ni hun tongah-tongah ni hasedaon atap kehancuran ni tanoh on (ay.3)

Ise do na tahan janah maluah

 Haganup na porsaya

Pasal ise do na tahan janah jumpahan haluahon humbani kehancuran na sihol ipamasa Naibata bani ujung ni panorang, isobut do ijon marhasoman bilanganni. Bani ayat 4-8 jumpah hita do bilangan 144.000 (saratus ompat puluh ompat ribu) pakon 12.000 (sampuluh dua ribu) sonai homa goran-goran ni suku atap marga ni Israel. Aha na isobut ijon sedo ibagas pengertian na harafiah tapi makna simbolis do. Goran-goran ni suku atap marga Israel lang ibagas pengertian harafiah halani lang dong isobut ijon suku atap marga Efraim sonai homa Dan janah Levi pakon Josep lang ongga isobut humbani daftar marga atap suku ni Israel. Ase na imaksudkon ijon sedo ginompar ni Abraham secara daroh tapi aima halak na porsaya songon si Abraham bapa ni sagala na porsaya ai. Bani buku Pangungkabon buei tumang do jumpah bilangan na ipakei secara simbolis. Halani ai, bilangan ni halak na maluah janah masuk hu surga seng pitah 144.000 tumang. Bilangan 12 ipakei laho manggambarhon kuria, haganup kuria na porsaya bani Jesus humbani ganup panorang ampa ianan janah bilangan 10 ipakei laho manggambarhon sesuatu na lengkap atap komplit. Halani ai, 144.000 aima 12X12X10X10X10. Perkalian na marulak-ulak sihol pataridahkon bilangan ni kuria secara lengkap atap na gokan dear. Pakon hata na legan, dob isap haganup juak-juak ni Naibata, sanggah iombuskon logou ai, lang anjai adong age sad ape na dob pinilih janah nahinaholongan ni Naibata na magou. Sagala na porsaya maningon jumpahan haluahon janah “Israel” secara partonduyon totap maluah riap pakon Sipaluah in sadokah ni dokahni.

• Juak-juak ni Naibata na dob isap bani pardompakanni

Isobut do bahasa na maluah ai aima juak-juak ni Naibata na dob isap marhitei sap ni Naibata bani pardomapakanni (ay. 3-8). Bani Padan Nabasaia jumpah do piga-piga hali pasal  na marpardomuan hujon (man-sap) songon  bani 1 Musa 4  ija isap Naibata do si Kain laho melindungi ia humbani pembalasan  dob ibunuh saninani si Abel (1 Mus. 4:15). Paima ipamasa Naibata hamateian ni bunga tubuh ni halak Masir palobei do ibahen sap (tanda) marhitei daroh ni biri-biri bani labah ni rumah ni bangsa Israel. Hunjon taridah bahasa tujuan ni Naibata mambahen sap bani pardompakkan ni juak-juak na hinaholonganni bani ambilan on aima laho melindungi atap manramotkon. Halani ai aha pe  na  masa na idompakkon hita bani goluhta i tanoh on sonari ronsi bani panorang ujung ni dunia on totap do hita ilindungi janah iramotkon Naibata asal ma hita totap setia hu Bani. Tantangan pakon hamaholon ningon do dompakkononta tapi totap do hita ipargogohi Naibata (bdk. Mat. 24:21-22). Halani ai, ise do na boi tahan anjaha monang ? Ai ma anak-anak ni Naibata na totap iramotkon janah iondingi Naibata.

• Humpulan na banggal

Bani ayat 9 selanjutni isobut do paboa Johannes mangidah humpulan na banggal na jongjong i lobei ni Jesus marhiouhon hiou putih anjaha manjolom bulung ni palem. Humpulan na banggal on aima na so tarbilangi jolma bueini, tapi Naibata ibotoh do bilanganni janah itanda do haganup (bd. 2 Tim 2:19). Sidea roh humbani haganup bangsa,suku, marga ampa hata. Sidea aima na dob pinaluah ni Biri-biri ni Naibata na dob marianan bani ianan na istimewa janah terhormat. Sidea aima na totap setia ibagas haporsayaon hubani Kristus age pe mandompakkon bagei ni sitaronon banggal na ilambangkon marhitei na mamakei hiou putih. Sidea manjolom bulung ni palem na gabe simbol ni malas ni uhur ampa parsombahon hubani Naibata. Bulung ni palem aima simbol untuk pesta malas ni uhur ampa hamonangan. Ai ma hamonangan mantaluhon dunia on, hamonangan iman. Ase, ise do na boi mantaluhon dunia on sobali na porsaya paboa Jesus aima Anak ni Naibata ? (1 Joh.5:4-5). Halani ai talup do hatahononta songon na hinatahon ni Apostel Paulus bani 2 Korintus 2:14 :” Tapi tarima kasih ma bani Naibata, na tongtong manogu-nogu hanami ibagas hamonanganni marhitei Kristus”

Hahonaanni

• Dunia on lang totap janah pasti do marujung bani panorangni. Lambin buei do na masa na idompakkon hita bani goluhta i tanoh on na gabe tanda-tanda jaman songon na hinatahon ni Tuhanta Jesus Kristus. Tapi sagala na porsaya totap do ihasomani ampa ipargogohi janah jumpahan haluahon bani panorang parroh-Ni use. Ihatahon do: “Tonggor ma, sai na hasomananKu do hanima ganup ari, ronsi roh ujung ni dunia on.(Mat 28:20b) janah ihatahon do homa : ” Tapi barang ise na tahan das hu ujung, ai do na maluah” (Mat.24:13).
• Pori pe lang ibotoh hita panorang on na masuk atap lang hita hubani bilangan ni na maluah anjaha monang na sinobut bani teks ni ambilan on, tapi sada malas ni uhur aima paboa Naibata ibotoh janah itanda do hita marsada-sada. Halani ai dong do pangarapan banta i tongah-tongah ni sagala na masa na idompakkon hita sonari pakon magira halani itanda Naibata do haganup na Ia simadasi.
• Mangkawahkon bagei ni na masa i tongah-tongah ni pargoluhan nuan on, ra do tubuh ibagas pingkiran hira na so adong be na markuasa mengendalihon segala sesuatu. Tapi ambilan on sihol patangkaskon hubanta paboa adong do Naibatanta na marhotak janah markuasa bani haganup. Hotop do homa iahapkon hita songon na so ipardiatei Naibata hita janah songon na so itanda hita. Ambilan on sihol mambere kepastian hubanta bahasa itanda do hita marsada-sada janah ibotoh do bahasa hita aima milik-Ni. Songon na hinatahon ni Parpsalmen bani Psalmen 139 :13-16.
• Sintong do paboa bani kenyataanni goluh on lambin ari lambin roh maholni. Tapi halak na totap setia marhaporsayaon hubani Jesus, marhitei ambilan on ipabotohkon do paboa sidea pasti do mampu bertahan sonaha pe na masa ampa na sihol masa halani itanda Naibata do sidea, janah totap do sidea iramotkon janah iondingi ronsi ibohali lang pitah i tongah-tongah ni situasi kondisi sisonari tapi ronsi das hubani ujungni anjaha sadokah ni dokahni.

Pdt. R.J. Saragih, MTh.LM