Renungan Lansia 25 Januari 2026

Podah : 16:25-32

Tema   : Rambut Putih adalah mahkota yang indah

Buku Podah buei marisi pasal hapentaran na tujuan utamani aima laho mangajarhon hapentaran pasal sonaha manggoluh ibagas hapintoron, marpentaran, janah iharosuhkon Naibata bani goluh siganup ari. Hapentaran na sinobut ijon sedo pitah pasal hapistaran, tapi sonaha do jolma in manggoluh domu hubani rosuh ni Naibata, janah laho paingatkan, Naibata do na markuasa bani haganup goluh ni jolma.

Sada panorang, sahalak bapa na margoran Pintor, hundul-hundul i terasni jabuni.  Ubanan do jambulanni, anjaha lang be songon na hinan gogoh ni langkahni. Ijolom do Bibelni anjaha ibasa do teks ni renunganta sadarion. Irik hujai itaringati  ma haganupan pardalananni goluhni, buei do na mamboan malas ni uhur, anjaha dong homa na manadingkon panosalan. Taringat do ia bani masa haposoonni. Hinan ia mangahapkon, ia ma sipentaran, anjaha ibotoh do pasal haganup. Sadokah on, aha na iahapkonni sintong, mintor idalankonni do, lang porlu ia bani hasoman na legan. Dob dokah pe baru iarusini, lang haganup na sintong i lobei pakon na ipingkirini mamboan bani hadearon. Songon na sinobut bai buku Podah on “Adong do dalan, pintor do ai ninuhur ni halak, hape ujungni gabe hamateian do.” Pengalaman goluhni, buei mangajarhon na madear bani goluhni. Marlajar do ia, haputusan na ibahenni gati manadingkon ugah, bani dirini sandiri sonai age bani uhur ni halak na legan. Hata-hatani na hinan tarluar ibagas marah ampa emosi idingat ni ma nuan haganup. Adong do bani panorang hagoluhanni hata na tarluar humbani pamanganni marotan hum bani podang. Sahali hata tarluar, lang boi itarik be. Hata ni Naibata paingatkon ia, parsahap na lang ijaga boi patubuhkon parsalisihan anjaha boi manirang parhasomanan. Ibotohni do sonaha ahap na magouan hasoman halani parsahap. Tapi ibagas umurni na matua ai, marlajar do ia hata lam-lam boi pamalumhon uhur hasoman na legan. Isadarini do paboa, hagoluhanni boi mamboan halak na legan bani dalan na lang sintong. Ipadas bapa Pintor do hata tarima kasihni bani Naibata, halani ibere do hu bani panorang laho padearhon buei hal na salah na ongga ihorjahonni. Sonari, bani panorang hatuaonni, lambin nanget-nenget do ia laho mambere podah, lang sihol be ia monang bai bueini perdebatan, tapi sonaha ase gok damei ibagas uhurni.

Ibasani do bani ayat 32, na mangkatahon “Dearon do parsabar hun bani puanglima, anjaha na marrajai dirini humbani sipatunduk huta.” Hinan ia menganggap hagogohan ai adong bai energi ampa habaranion. Nuan isadarini ma, hagogohan na sejati ai terletak bani hasabaron, panrajaion diri ampa uhur na ra mengalah. Bagas do ipingkirini, hagoluhan lang haganup urah. Angkula na lemah, pingkiran na urah loja, anjaha emosi na sensitive. Ijon ma Tuhan Naibata mandilo jolma in laho patuduhkon hapentaran na domma ibere-Ni. Hasabaron sanggah boritan, panrajaion diri sanggah adong kesalahpahaman, ampa uhur na lam-lam sanggah marsahap bai halak na legan, bai niombah, sonai age pahoppu na gabe hasaksian ni haporsayaon na jenges.

Renungan on, paingatkan haganupan na lansia, paboa goluhta lang sekedar cerita masa lalu. Tiap ari masih berarti. Dalan na ilopusi sadari on, ibagas sikap na damei ampa sahap na ijaga, mamboan pasu-pasu do ai bani buei jolma. Ihargai Naibata do tahun-tahun na dob ihagoluhkon hita. Lang inilai jolma in humbani hagogohon ni angkulani, tapi humbani lamlam ni uhurta do. Bani usia na lansia on sai totap ma pilih dalan hapentaron, mardalan  rap pakon Naibata, marsahap ibagas holong, janah pataridahkon hasabaron aima sortali na jenges bani hatuaon. Sai i togu-togu Hata ni Naibata on ma hita ase lambin dear mardalan, lambin pentar marsahap, janah manggoluh ibagas panrajaion diri. Ai anggo ibobai hapentaran na humbani Naibata langkahta, dalan sidalankononta, age pe lang sai urah, ai ma mamboan hagoluhan ampa hadameion. Amen.