Renungan Mingguan/PA Bapa,  4 Agustus 2024 (10 Set Trinitatis)

Nas                  :Yesaya 55:1-5

Tema              : Carilah Tuhan Maka Kamu Akan Hidup

Tujuan            : Agar Kaum Bapak Memahami bahwa Sumber Hidup Adalah Allah

Usul Doding   : Haleluya 350:1+3 “Holong Na Humbani Tuhan”

Tim Penulis

                                    Sai Rohma bani Tuhan Siboban Hagoluhan

Tim Penulis

Hita haganupan!

Bani panorang tahun 1942-1945 aima panorang sanggah bangsa Indonesia ibagas panjajahan ni bangsa Jepang, bani buku-buku sejarah isuratkon do bahasa masa-masa on aima masa-masa kelam na ijumpahkon bangsa Indonesia. Payah do tumang torihon ruti, indahan, susu pakon bahan-bahan pokok si jualon. Halani ai bahat do bangsa Indonesia namarujung goluh halani loheian, anjaha ipaksa do sidea marhorja padearhon dalan hansipe ibagas naloheian. Bani panorang ai hal na somal mando mangan gadung, jagul ala kadarnya asalma adong isini boltok. Sonai homa hiou, bahat do panorang ai mamakei abit na humbani goni, bulung-bulung pakon nalegan. Sonaima ituliskon sada halak namargoran Anthony Reid bani buku ni namarjudul Revolusi Sumatera Timur.  Golap anjaha ngeri do hape pangkorhonni parjabolonan, songon na seng manusiawi, anjaha seng beradab. Usih sonaima homa na ihadapi ni bangsa Israel sanggah na ihabuangan Babilonia, iparjabolon bangsa Babel do sidea, anjaha harga dirini sidea sebagai bangsaNi-Naibata domma magou, loheian, horahan domma songon hal na somal pangahapni sidea, songon na putus pangarapan anjaha seng margogoh sidea gabe jabolon ni bangsa Babilonia. Bani teks ni ambilanta sadarion bangsa Israel iumpamahon do hubani halak namarhahurangan, nahorahan, anjaha seng marduit (Ay. 1). Horahan ampakon seng marduit aima sada umpama na topat manggambarhon situasi masyarakat na bani habuangan ai. Borit, borat anjaha borot tumang pangahapni sidea ihabuangan ai. Pangalaman naborat ai mangkorhon pangalaman trauma nabagas do ai bani sidea, pangkorhonni seng pitah loheian secara fisik, tapi dihut do homa secara emosi, spiritual, baik secara psikologis. Galek, anjaha seng margogoh sidea i habuangan Babel ai. halani ai seng dong naboi paluahkon sidea hun habuangan ai, anggo pitah gogoh pakon dirini sidea do seng tarharapkon laho paluahkon sidea humbani gomgoman ni bangsa Babel ai. Ibagas situasi naborat aima roh surat ni Yesaya napaduahon on (Deutro Jesaya), sihol panurat ni buku on mangingatkon bangsa Israel ase rohma hubani Jahowa siboban hagoluhan ibagas pargoluhan ni sidea. (Barent A. Jeromi, Commentary on Isaiah 55:1-5, 31 Juli 2011)

Itawarhon panuratni buku Jesaya on do hubani bangsa Israel na ibagas sitaronon ai dalan hagoluhan. Songon sada halak na maningtingkon barita na masa itongah-tongah ni huta, itaurhonni do barita ai hubani bangsa Israel anjaha iojur janah iontang do bangsa ai ase roh ma bani Jahowa Sipagoluh sidea. Ihatahon do: ale hanima, sagala nahorahan, roh ma bani bah on, anjaha hanima na so marduit, roh ma, boli anjaha panganma, roh ma hanima, bolima anggur ampa dadih, lang pala marduit atap lang marpamboli! (Ay 1) Panuratni buku Jesaya on mandilohon bangsa Israel ai ase sipardihut bani pesta malas ni uhurNi Naibata, sipanganon na mantin, siinumon na matobu, marmalas ni uhur anjaha marhasonangan ma sidea anggo roh anjaha tangi sidea hubani Naibata (ay 2). Jadi iumpamahonni panuratni buku  Jesaya on do sipanganon pakon siinumon ai hubani HataNi Naibata (Podah 9:1-5), anjaha HataNi Naibata aima na iharapkon secara rohani (spiritual) pabosurhon lohei pakon horahan ni bangsa Israel hubani holong ni Naibata. Manggoluh sidea ibagas hasonangan, malas ni uhur na seng tarsibar anggo riap sidea ampakon Naibata. (Juliana Caassens, Commentary On Isaiah 55:1-5, 3 Agustus 2008)

Na menarik use humbani teks ni ambilanta on, ipangindo do use bangsa Israel ai ase ulang pala marduit atap mamboli sipanganon pakon siinumon ai, na patorangkon hubanta memang kondisi ni bangsa Israel na ihabuangan ai seng margollei laho mangubah na masa na parngit sijumpakonon ni sidea ai, teks on sihol patugahkon bahasa haluahon na itawarhon hubani sidea ai aima halani idop ni uhurNi Naibata sandiri, seng halani pambahenan atap halani dongni duitni sidea ase dapotan sipanganon pakon siinumon, tapi halani dear layak pakon idop ni uhurNi Naibata do mangidah sitaronon ni bangsa Israel ai. Idop ni uhurNi Naibata do paluahkon sidea hun parjabolonon ai anjaha igogohon do use mangulaki mangindo sidea ase telengma pinggolni sidea manangar hataNi Naibata, roh ma sidea hubani Naibata, anjaha tangi ma sidea hubani sora ni Naibata, ase manggoluh sidea (Ay 3 a). Iharapkon panuratni buku Jesaya on ma bangsa ai berpartisipasi, songon sipanganon pakon siinumon na gabe nutrisi bani angkulanta, nuan sonaima homa HataNi Naibata gabe bagian ni goluhta. Sipardihutma hita mangambilankon, manaksihon holongNi Naibata, mangkamalashon idop ni uhurNi Naibata, manangar anjaha mambaritahon barita malas ni uhur ai hubani hasoman na so mananda holongNi Naibata. (Ay 4-5).

Hita haganupan aha ma na boi sirenungkononta humbani teks ni ambilan on?

1. Bani buku ni si Johannes 6:35 ihatahon do bahasa Jesus, HataNi Naibata in aima ruti hagoluhan, barang ise naporsaya hubani seng anjai loheian be ia bani goluhni. Hita haganupan, gati do hita loheian, anjaha gati do homa hita horahan songon boru Samaria, tapi Johannes mangakui bahasa Jesus sandiri ma bah hagoluhan ai, barang ise namanginum bah ai, seng horahan be ia sadokah-ni dokahni…(Joh 4:14). Pengakuan iman na binahenni si Johannes on sadalan do hubani pangakuan ni buku Deutro Jesaya on, bahasa hagoluhan ai pitah jumpah hita bani Jesus Kristus, HataNi Naibata na gabe jolma in. Tongon bani goluh on halani sipingkirhononta na borat, siporsanonta lambin borat, ra do homa mambahen horahan, anjaha loheian hita bani hataNi Tuhan, marhiteihonni teksni ambilan on iajari ma hita ase tongtong ma hita roh hubaNi, unduk, teleng pinggolta hubaNi hataNi ase jumpahan hagoluhan hita, songon lyrikini dodingta Haleluya No 237 mangarahkon hita ase botul-botul ma hita roh hubani Jesus, ulang sangsi, ulang magang, rohma hubani, ai hagoluhan do anggo riap pakonSi. Pardimata ham ma lyrik ni lagu on, ihatahon sonon Roh ham bai Jesus, roh ham botul, tangar hataNi jalo bujur, na roh do Jesus pagoluh ham, asal porsaya ham. Halani ai podasma hita roh hubani ase jumpahan hasonangan pakon hagoluhan hita.
2. Domma idaihon hita hinamantin ni pambahenan ni Naibata hubanta ibagas Jesus Kristus, halani patut do hita marmalas ni uhur halani domma sipardihut hita bani tumpuan ni anak-anakNi Naibata, halani ai patut do baritahononta barita malas ni uhur ai hubani hasomanta na seng mananda holongNi Naibata. Gabe siparidop ni uhur ma hita hubani hasomanta, songon Bapa na maridop ni uhur in (Luk 6:36).
3. Ibagas pargoluhan on, halani bueini na masa na roh mandorap hita ra do tongon loheian, horahan hita ibagas goluh on, halani loheini, horahni pangahapta sipata ra ma use songon na gayuran dobni. Gayuran na imaksud ijon seng gayuran fisik, tapi lobih manjurus hubani hal na psikis, ibagas situasi sonai maningon panganonta do sipanganon na mantin na humbani Naibata, ase mulak use gogohta, janah malum humbani gayur psikis ai. Maningon sirsirma hita mardingat idopniuhurNi Tuhan, na domma ipadanhonni bani teks ni ambilan ta on, sonon ihatahon “BahenonKu do bannima padan sisadokahni dokahni, aima idop ni uhur nabani si Daud, namanongtong In.” (Ay 3c) Hata on sihol pasingatkon hita ase bahasa ibagas goluh on seng anjai paturuton ni Naibata hita tarsosak, tapi sisir do idopni uhur-Ni mangkasomani hita, manramotkon hita barang aha pe namasa na roh mandorab hita. Toguh do idop ni uhur ni Naibata hubanta, songon toguhNi padaNi hubani si Daud, sonaima homa das bani panorang on, haduan ronsi sadokah ni dokahni totap anjaha seng anjai mose holongNi nabanggal in banta, halani marpangarapan ma bani idop ni uhur Ni Naibata, anjaha ulangma iunsagahkon hita dirinta, naibata nalegan ilobei-lobeiNi. Amen