MINGGU I SETELAH TRINITATIS, 11 JUNI 2023
Nas : 1 Samuel 21: 1-9
Usul Doding : Haleluya No. 386: 1-2
Tema : Pergumulan di saat-saat sulit
Tujuan : “Ase bapa lambin manghaporsayai bahasa bani panorang hasosakan tongtong do Naibata manramotkon hita”
“Jangan tertipu dengan pujian! Ingat, banyak nyamuk mati karena tepuk tangan”, sada hata bijak na mangajari hita ase pangkei-pangkei merespon halak na mamuji dirinta. Ra do pujian ai iluarhon hasoman sebagai bentuk apresiasi bani sada horja positif na ibahen hita, tapi ra do homa sebalikni, pujian ai sebagai sada siding na sihol mangojabkon hita.
Bani kisah pargoluhanni Daud, buei do prestasi yang ditorehkannya bani bangsa Israel. Sada peristiwa hamonangan na ipuji-puji halak Israel aima keberhasilanni mantaluhon Goliat, puanglima ni halak Palistin. Hunjai nari ipuji halak ma Daud marhitei doding-doding, “marribu-ribu do italuhon si Saul, tapi marlaksa-laksa do italuhon si Daud!”
Malas ni uhur ampa pujian ni halak Israel ai pabangkithon borit uhur ni Saul. Tubuh uhur na simburu, holsoh ampa sogam ni uhur ni si Saul. Domu hujai isurahon Saul ma laho mamunuh Daud halani manurut pingkiranni gabe ancaman do Daud bani tahta harajaonni. Piga-piga hali ilajou Saul ma rencana ni ai, hansa seng ongga marhasil.
On ma kisah ibalik ni peristiwa nas ambilanta panorang on. Dob ibotoh ni na sihol bunuhonni raja Saul ia, maporus ma Daud hu huta Nob, aima sada huta i Selatan Gibea, na gabe huta ni ni para malim.
Bapa na hinaholongan ni Tuhan, seng tarpungkiri hita peristiwa na idompakkon Daud on masa do ai bani goluh ni halak na mardalan ibagas hasintongan ampa hapintoron. Sada sisi buei do hasoman na mengapresiasi tapi bani sisi na legan seng otik homa na masogam ni uhur. Gati do halak na mardalan ibagas hasintongan ampa hapintoron gabe munsuhni halak na menghalalkan segala cara laho pasaudkon sura-sura na lang madear.
Nas ambilanta on gabe sada catatan ponting banta bahasa Bibel pe manurathon “sisi kelam” ni Daud sanggah mandompakkon hasosakan. Daud na dianggap salah sada tokoh sentral bani sejarah ni Israel ongga do maruhur sangsi bani panramotionni Naibata. Ia bertindak sendiri laho paluahkon dirini janah barani do ia marladung i lobei ni malim ase dapotan sipanganon ampa sinjata ia.
“Mase punjung sahalak ham, seng dong hasomanmu age sahalak?” nini malim Ahimelek hubani Daud. Sabotulni sungkun-sungkun ni malim Ahimelek on domma gabe tanda na tangkas bahasa na masa na idompakkon Daud seng be rahasia umum ai. Tontu titah ni raja Saul na sihol menyingkirkan Daud domma gabe hot news ikalangan para pejabat pakon tokoh-tokoh penting harajaon. Seng mungkin sahalak puanglima kepercayaan raja tuluy hu sada huta tanpa difasilitasi protokoler istana. Tapi bani situasi na tertekan Daud “mengarang cerita” seolah-olah ia mandapothon tugas banggal hun raja Saul na sifatni rahasia.
Sebagai sahalak malim, Ahimelek pe lang terperangkap bani hata ladung ni Daud. Nini Ahimelek ma hubani Daud, “seng dong ruti na somal bangku, pitah ruti na mapansing hansa”. Artini sihol botohonni Ahimelek do pasal hasintongan ni “misi rahasia” na ihatahon Daud ai. Tapi sahali nari halani domma irajai uhur biar si Daud, gabe marladung use ia. Sahali nari ipataridahkon Daud do kesangsianni bani panramotionni Naibata bani goluh ni. Saud do ibere malim Ahimelek ruti na pansing ai bani Daud, na ija sasintong ni ruti ai aima sipanganon ni para malim.
Dob dapot ni ruti na pansing ai, ididah si Daud ma si Doeg, kopala ni parmahan ni si Saul, lanjar ipangindo ni ma tanja barang podang hubani si Doeg. Tapi halani sedo bagian pasukan istana na martugas laho marporang si Doeg, tontu seng dong tanja barang podang na ijolom ni. Podang ni Goliat do na saud ibere sidea bani Daud.
Dear ma namin lang mintor iuhumi hita tindakan ni Daud ai. Adong pe sisi na legan na sihol ididah hita humbani kisah pelarian ni Daud on. Salah sada upaya ni Saul laho mamunuh Daud aima marhitei ipabangkit ni Daud gabe pambobai ni sisaribu (1 Sam. 18:13). Marhiteihon bueini pasukan na itoruh kuasa ni Daud, namin berpeluang ma ia manlawan Saul. Tapi lang dalan pemberontakan na ipilih Daud. Justru maporus do ia janah mangondoshon Naibata bertindak mambere hapintoron bani.
Bapa na hinaholonganni Tuhan, tongon ibagas panorang hasosakan somalni hita jolma lambin pentar ni do mangarang sada cerita ase boi maluah humbani hasosakan ai. Seng parduli be jolma in bani hasintongan. Marbagei-bagei do cara na binahen ase survive. Tapi marhitei nas ambilanta borngin on, iojur do hita ase ibagas panorang hasosakan tongtong ma hita mangkaporsayai bahasa na iramoti Tuhan in do hita. Usih songon Daud, dob ilajou ni piga-piga hal iluar kendali ni Naibata, bani ujungni manosal botul do ia bani sikap ni ai janah iakuhonni do bahasa “dohor do Jahowa bani halak paruhur na marosak, anjaha ipaluah partonduy na maropuk (Psalmen 34: 19).
Gabe barita malas ni uhur ma pengalaman Daud on banta. Sanggah magou haganup fasilitas bani goluh ni, sanggah na mandompakkon hasosakan banggal ia, iramothon Naibata do goluh ni, janah ipataridahkon Naibata do hapintoron-Ni. Siusihon ma sikap ni Daud on, janah totap ma hita mangakuhon haganup hahuranganta ilobei ni Naibata ampa mangindo pangurupion humbani Ia, ase Naibata na patorsahon ampa mambere hapintoran banta sanggah ibagas hasosakan. Amen.
