TATA IBADAH PARTONGGOAN JUMAT AGUNG

30 Maret 2018

TEMA:
Ibohali Manghobaskon Horja na Madear. (2 Timoteus 3:17)

SUB TEMA:
Bobai ma kuria in gabe paridop ni uhur songon Kristus paridop ni uhur in tarlobih hubani halak na musil, na marsitaronon  pakon na ibagas odoh-odoh (Jeremia 29:7; Lukas 4:18-19).

1. Persiapan

• Kuria martumpu ibagas na homi
• Anggo boi gareja idekorasi na manggambarhon suasana penyaliban ni Jesus
• Penerangan ruangan gareja ihurangi
• Kuria ibagas suasana saat teduh iiringi musik instrumen secara lembut

 

1. Kebaktian
2. Votum – Introitus – Tonggo
3. Ibagas goran ni Naibata Bapa pakon Tuhan Jesus Kristus ampa Tonduy Napansing Sitompa langit pakon tanoh on.
4. Amen
5. Ise do porsaya bani na pinabogeihon bannami? Anjaha tangan ni Jahowa bani ise do ai talar?
6. Tongon do naboritta Iusung, anjaha hadoyukonta Iporsan; tapi nini uhurta, Naibata do na maminsang, mamukul ampa na mangarsik-Si
7. Hape halani panlanggaronta do Ia hona pantom, binahen ni hajahatonta do Ia ugahan. Tampei huBani do pinsang-pinsang parhiteian ni damei banta.
8. Anjaha binahen ni ugah-Ni malum iahap hita.
9. Haganup do hita kahou songon biri-biri, ganup do hita marsitohu dalanni; tapi hajahaton ni hita haganup do ihonahon Jahowa Bani. Haleluya

Martonggo ma hita!

Ham Tuhan Naibata Parkuasa janah Paridop ni uhur banggal. Roh do hanami marsombah hu lobei-Mu bani na sihol hanami mardingat pangkokopon ni Anak-Mu Jesus Kristus na tarsilang laho manobus hanami pardousa. Kawahkon Ham ma marhasoman idop ni uhur kuria-Mu na bahen haluahonni, Jesus Kristus sirsir manaron janah iondoskon hubani tangan ni pardousa janah manaron hamateian i hayu parsilang. Paahapkon ham ma bannami holong-Mu na banggal in ase boi goluhnami gabe puji-pujian Bamu ibagas Tuhan Jesus Kristus Tuhannami. Amen.

 

 

 

 

2. Mandoding : Haleluya No. 59:1+3+5

      Ganupan na tinompa roh nasiam manatap, hagoluhanmu on.

Gantung bani parsilang manaron hamateian, Sol ingatonmu in tongtong.

Aha do manginsonoh Bamu, sibere tuah, bai hajolmaon in?

Seng ongga Ham mardousa songon hanami jolma; Bamu seng ongga masa in.

 

Tarima kasih ningku Bamu na pala matei Lao pagoluhkon au.

Tong ma paruhuranku, na masik bunuhonku, Sai gok Bamu na mando au.

 

3. Hasasapan ni dousa  (Jongjong Kuria)
4. Martonggo ma hita mansopotkon dousanta.

Ham Jesus na tarsilang, Anak ni Naibata Bapa, na humbani Tonduy Napansing, Hata na dob gabe daging  janah tubuh ibagas hadoyukon laho paluahkon pardousa:

1. Idop ma uhur-Mu sasap ham ma haganup dousa pakon panlanggaronnami
2. Ham Jesus na tarsilang, Naibata Na Pansing, Tuhan janah Siparkuasa, Dalan pakon Hasintongan ampa Hagoluhan, hataridahan ni holong na gokan dear
3. Idop ma uhur-Mu sasap ham ma haganup dousa pakon panlanggaronnami
4. Ham Jesus na tarsilang, sibotoh haganup hauhuron, simada hapentaron ampa sagala parbinotohan, hagogok ni ha-Naibataon na gokan dear
5. Idop ma uhur-Mu sasap ham ma haganup dousa pakon panlanggaronnami
6. Ham Jesus Biri-biri ni Naibata na mamorsan dousa ni dunia on
7. Holong ma Ham bannami
8. Ham Jesus na sirsir mamorsan dousa pakon panlanggaronnami
9. Holong ma Ham bannami
10. Ham Jesus Sipaluah janah Sitobus dunia on
11. Ampeihon Ham ma haluahon pakon damei-Mu bannami
12. Tangar hita ma hata ni Naibata pasal hasasapan ni dousanta:

“Domma iparjabolon ho Ahu marhitei dousamu, domma ilojai ho Ahu marhitei hajahatonmu. Ahu, Ahu sandiri pasaloseihon panlanggaronmu halani Ahu, anjaha dousamu seng be padingat-dingaton-Ku”. Hasangapon ma bani Naibata i babou!

1. Amen

 

4. Mandoding Haleluya No. 322: 1-3

Durus daroh ni Jesus in, dolog Golgata.
Na paubahkon uhurmin, isasap dousamin.
Isasap dousamin, isasap dousamin
Na paubahkon uhurmin, isasap dousamin.

 

Parjahat na i lambungNiin, maluah homa in.

Ge au pardousa banggal in, iuras darohNiin.

Iuras darohNiin, iuras darohNiin.

Ge au pardousa banggal on, iuras darohNiin.

 

DarohNi na madurus in, margogoh do tongon.
Gabe maluah bangsaMu, pansing homa tongtong.
Pansing homa tongtong, pansing homa tongtong.
Gabe maluah bangsaMu, pansing homa tongtong.

 

5. Mambasa Hata ni Naibata (Ibasahon 6 halak pagori ni kuria na dob itontuhon marhitei na jongjong humbani hundulanni)
6. Mateus 27 :1-10

Kuria  Mandoding : Haleluya 238:1+3

            Sai hulobei Mu Tuhanku, hu useihon uhurhon

Sai pasiat Ham tonggongku, pakon ganup iluhkon

 

Sai gati do hutadingkon dalan Mu na pintor in

Kristen au hape hujolom dalan hamagouan in

 

2. Markus 15 :21-22
3. Johannes 19:19-24

            Kuria Mandoding Haleluya No. 61:1+3

            O, Ulu na sab daroh ibaen ugah-Mu in

            Humbani janggar-janggar duri parsilang in

            O ulu hatunggungon hinan sihilapMu

            Itaron Ham madorun; manombah au Bamu

            Au on talup, o Tuhan manaron sisonin

            Dousangku do iporsan Ham na tarsilang in

            Sai tonggor Ham, o Tuhan, au na ilobei-Mu

            Anjaha patuduhkon hu bangku layak-Mu

4. Johannes 19: 25-27
5. Lukas 23 :39-43

Kuria Mandoding Haleluya No. 65:1-2

Ambit iuhir bai uhurhu bohi-Mu laho matei Ham

Ambit hudingat, o Tuhan-ku, pangkopkopMu bangku naman

Ai Ham do paluahkon ahu, dousangku do pinorsan-Mu

Ham manambari naboritku, martuah  au halanin

Sai jalo Ham ma au Tuhanku , baen upah na tinaron-Mu

Sihol ingaton ni uhurhu ganupan nabinahen-Mu

Mangkopkop au pardosa banggal, ibaen holong ni atei-Mu

Halani in tarbaen au sonang lao marayakkon huta-Mu

 

6. Markus 15:33-39

(Anggo memungkinhon boi do homa ikembangkon marhitei semi drama na memerankon 6 (onom) tokoh bibel na tampil hu lobei dob ibasahon masing-masing teks. Na 6 (onom) tokoh ai aima: (1) Judas Iskariot, (2) Simon na hun Kirene, (3) Tentara, (4) Maria, (5) Parjahat na tarsilang, (6) Kopala ni Tentara)

6. Mandoding Haleluya No. 321:1-2

Sai orod bai silang-Mu Jesus iananku

Bah tubuh mabaor ijin in ma inumonku

Silangni Tuhankin in ma pujionku

Anggo das magira au in dodingkononku

 

Lao ma au bai silang-Mu in haporusanku

sai idop na uhur-Mu ulang tulak ahu

Silangni Tuhankin in ma pujionku

Anggo das magira au in dodingkononku

7. Refleksi/ Tonggo Maronjolan bani 7 (Pitu) Parhataan hun Hayu Silang (Jongjong Kuria)
8. “Ham Bapa, marpangulaki ma uhurMu, ai seng ibotoh sidea na binahenni ai!”
9. Ham Naibata Parkuasa, Tuhan na manangihon Anak-Mu na tarsilang roh martonggo mangindo hasasapan ni dousa ni haganup na so mambotoh aha na binahenni sidea. Holong ma uhur-Mu bannami halani hanami pe dihut do bani tonggo ai marhitei dousa na so binotoh ampa na so isangaja hanami. Idop ma uhur-Mu jalo Ham ma hanami ibagas holong ampa damei-Mu, ibagas goran ni Jesus Kristus Sipaluah na manaron halani hanami. Amen
10. “Sintong do hatangkon bam: Sadari on rap pakon Ahu ma ho i Paradeiso!”
11. Ham Tuhan Jesus Kristus na dob mambagahkon malas ni uhur na totap i nagori atas hubani sagala na ra paubahkon uhurni. Pargogohi Ham ma hanami marhitei Tonduy Napansing ase margogoh laho paubahkon uhurnami laho manjalo idop ni uhur-Mu i dunia on ampa i nagori atas. Amen
12. “Andin ma inang, anakmu…. Andin ma inangmu!”
13. Ham Jesus Sipaluah, na tongtong mangkaholongi pakon mansarihon inang pangintubuh-Mu age pe bani panorang borat tumang sitaronon-Mu, ajari Ham ma hanami mangusihi Ham laho mardiakonia marhitei na mampardiateihon na porlu bani hasoman janah mangurupi na marsitaronon. Tangihon Ham ma tonggonami halani idop ni uhur-Mu. Amen.
14. “Eli, Eli, lama sabachtani? “
15. O Tuhan tiap jam, au mamorluhon Ham. Ai ham tumang na boi, pasonang uhurhin.

Bai haganup ianan, Ham do hupindahi. Na roh do au sonari, holong ma Ham.

O, Tuhan tiap jam, sai hasomani au. Ai anggo rapkon Ham, sibolis in pe lao.

Bai haganup ianan, Ham do hupindahi. Na roh do au sonari, holong ma Ham.

O, Tuhan tiap jam, bamu ma goluhkin Anggo daoh do Ham, soya do ganup in.

Bai haganup ianan, Ham do hupindahi. Na roh do au sonari, holong ma Ham. Amen.

1. “ Horahan Ahu “
2. Ham Sipaluah, na manaron horah ni pamangan ampa horsang ni tolonan halani dousanami, useihon Ham ma bah hagoluhan ase hanami na horahan bani hapintoron boi igoki holong ampa idop ni uhur-Mu, janah hanami pe boi gabe pasu-pasu hubani hasomannami. Amen
3. “Domma Salosei!”
4. Ham Tuhan Jesus Kristus, na dob mandobkon horja na niondoskon ni Naibata Bapa, parmaloi Ham ma hanami marhitei Tonduy-Mu Napansing ase pongkut mandalankon pandiloon-Mu. Bere Ham ma hagogohon bannami laho mamorsan silang janah mandompakkon sitaronon ampa hamaholon sadokah goluhnami. Ajari Ham ma hanami manggoluh ampa marholong na totap ase hanami pe boi gabe ambilan na madear bani dunia on, gabe saksi-Mu. Amen
5. “Ham Bapa! Hubagas tanganmu ma huondoshon tonduy-Hu”
6. Ham Bapa na gabe haondosan ni tonduy ni Anak-Mu Jesus Kristus, ajari Ham ma homa hanami mangirikkon usihan na binahen-Ni, ase bani ganup panorang ni goluhnami totap hanami mangondoskon goluhnami hubani tangan-Mu na gok holong pakon hasintongan. Ibagas goran ni Jesus na dob manggalangkon goluh-Ni hubannami. Amen

 

                      ——————( Ipahata Lonceng 7 hali)——————-

 

8. Mandoding Haleluya No. 211:1+3

      Silang na mapansing in ham tongtong baen gantarhin

Lao manlawan dousa in pakon pandoleian in

Bani sitaronon in Ham tongtong baen gantarhin

 

Roh do au nuan Bamu, sai palumbang uhur-Mu!

Domma pala matei Ham ibaen holong-Mu tumang

Jalo Ham na sombuh on, parhioui tonduyhon.

 

9. Ambilan
10. Galangan (Kebaktian Minggu Model A)
11. Tonggo-Panutup-Pasu-pasu (Jongjong Kuria)
12. Martonggo ma hita!

Tarimakasih ma Bamu Tuhan na dob marianan i tongah-tongahnami bani panorang na bolon on, na pabotohkon parhara hagoluhan barang hamateian bannami marhasoman ruji-ruji pasal aha na dob binahen-Mu ampa aha na binahennami. Tarimakasih ma bani sibere-bere hagoluhan na hun Bamu. Tarimakasih pasal Jesus na gabe hasomannami na dob manggalangkon diri-Ni manobus dunia on laho paluahkon hanami. Igalangkon hanami ma dirinami hu Bamu sonai pakon galangan na dob pinatumpunami panorang on. Jalo Ham ma hanami pakon galangannami on.

Barita haluahonta domma ipabotohkon, mulak ma hita hubani goluh ampa horjanta siganup ari irik paimahon

1. Misir ma hita irik paimahon janah manaili hubani pangarapan na padaohkon pandoleian, hubani hagoluhan na padaohkon sorod ni hamateian, hubani parmulaan na mantaluhon sagala parujungan.
2. Sanggah na paimahon, sanggah hagolapan manrungkub luhung ni haporsayaonta
3. Ingat hita ma, lang ipaturut Naibata hita punjung
4. Naibata lang ongga anjaha lang anjai manadingkon hita
5. Tarimakasih ma bani Naibata
6. Riap ma hita martonggo marhitei tonggo na niajarhon ni Tuhan Jesus hubani susian-Ni

P+K. Ham Bapanami…..ps…Amen

1. Jalo ham ma pasu-pasu humbani Tuhan Naibatanta:

Idop ni uhur ni Tuhanta Jesus Kristus pakon holong ni atei ni Naibata Bapa ampa parsaoran ni Tonduy Napansing ma mangkasomani nasiam (hita) haganupan. Amen    

 

 

 

=================*********================