PA Bapa, 03 Desember 2023 (Advent I)
Nas : Yesaya 9:1-6
Usul Doding : Haleluya No. 26:1-3
Tema : Yesuslah Terang Dunia
Tujuan : Agar kaum bapa mengingat kembali bahwa Yesuslah Terang Dunia
NAIBATA DASSA PANGARAPAN
Horas ma hubani nasiam bapa, arap uhur ibagas malas ni uhur ronsi hasehaton nasiam bani panorang on.
Bani sada panorang adong ma sahalak bapa na marpingkiri pasal pargoluhan ni. Ia marpingkiri pasal borat ni pardalanan ni goluh na idalanisi riap pakon keluargani. Bani panorang ai memang sanggah borat do sitaronon ni. Domma buei usaha-usaha na binahen ni domu hubani na pasungkuphon na porlu bani pargoluhan ni keluarga ni. Ia domma marjuma ibagas na pongkut, tapi lang ope boi hatahonon marhasil. Arga ni hasil juma lalap ope murah. Isuba martiga-tiga, aipe lang ope songon na niarapkonni uhur na masa, bahat barang na tarbuang halani lang laku. Akhirni modal pe lang mulak. Golap ma pangahapni bapa on, ia merasa gagal, irik hujai homa niombah pe inunut marbanggal janah maningon marsikolah. Tontu marpingkiri ma use ia pasal uang sikolah ni niombahni. Bapa on marpingkiri pasal aha ma use sibahenonni, ija do nani salah ni, mase gagal haganup usahani. “Naha ma nani ujung ni on haganupan?”. Ai ma lalap marhusor-husor ibagas uhur ni bapa on.
Nasiam bapa, tontu ra do songon cerita na i atas ai pargoluhan nasiam. Abara ni bapa mamorsan tanggungjawab na banggal tumang laho manghopkop haganup anggota keluarga. Sanggah golap pangahap nasiam, bani panorang on, roh do Tuhan Naibata sandiri mambere pangarapan na baru. Bani panorang ai, bangsa Israel ibagas sada kondisi na golap. Tapi porlu do homa ibotoh hita bahasa keadaan ni sidea ai marhalanihon pangabak ni sidea na lang talup i lobei-lobeini Tuhan. Israel Selatan atappe Juda bani panorang ai adong bani posisi na berbahaya. Juda bani panorang ai iserang Harajaon Assur. Sebelumni namin, Juda pakon Assur aima sada sekutu, tapi marbalik ma use Assur sihol manguasai Juda. Sasintong ni namin, roh do Naibata laho mangurupi sidea, tapi itulak Raja Ahas do pangurupion na humbani Naibata. Artini bangsa Israel bani panorang ai lobih mamilih pangurupion na humbani jolma pakon sombah-sombahan na legan (Jes. 8:19). Porsayanan do sidea bani paniaran, partondung, parhusip ampa partabas. Boi ma iarusi hita bahasa golap pe pangahap ni sidea, aima halani na lang ra do sidea unduk bani Naibata janah justru manulak Naibata.
Humbani hatorangan na i atas ai, tontu boi ma iarusi hita bahasa pangurupion ni Naibata bani bangsa Israel aima idop ni uhur banggal. Bani nas ta ipatorang do padan pasal pangarapan na baru bani sidea. Roh do Naibata mambere pangurupion bani sidea, sabou ma ganup lungun ni uhur, parmaraan, pusok ni uhur, jumpah ma pangarapan na baru, na binobanni panondang na bolon. Ipadanhon do bani sidea malas ni uhur songon malas ni uhur sanggah pariama, olob-olob songon sanggah marbagi taban-taban. Sabou ma ganup sitaronon, halani Naibata sandiri ma na mamonggolhon pasangan bani tangkuhuk, lanja-lanja na bani abara, lonsing-lonsing ni si pangodoh-odoh (ayt. 3). Damei do iboban Naibata bani bangsa ai, itutung ma sagala sipatu na mardorob-dorob manlangkah pakon pakeian porang na marlapu daroh (ayt. 4). Roh do Naibata gabe jolma, sipanggomgomi do Ia, Raja Damei do Ia. Naibata sandiri do na patoguhon haganupan damei-Ni ai marhitei uhum pakon hapintoron-Ni, janah bersifat sisadokah ni dokah ni do ai (ayt. 5-6).
Nasiam Bapa, bani Minggu Advent na parlobei on, ibere do banta pangarapan pasal pangurupion ni Naibata hubanta laho mangurupi hita pasal atap aha pe na sonari on idagei hita. Porlu tumang do hita mamareksa dirinta sebagai sahalak bapa, mamareksa keluarganta pakon haganup pargoluhanta. Domma nani ra hita mambalosi pandiloon ni Naibata laho mangirikkon-Si janah domma ra nani hita manjalo tawaran pangurupion ni Naibata atap hubani gogohta sandiri, hapandeianta sandiri, artanta sandiri, atap sisombah-sombahon na legan do hita marpangarapan? Seng ongga Naibata manranggihon na sambor bani goluhta pakon keluarganta, hita do na porlu mamareksa dirinta, domma nani ibuka hita uhurta bani Naibata? Atap, songon bangsa Israel na bani panorang ai do hita, mangampeihon pangarapanta bani na i tanoh on? Pori ongga pe hita sonai, atap na sonai pe hita nuan, roh do hata ni Naibata pasingatkon hita, roh ma hita hubani Naibata, ai Naibata do sitongonan gabe pangarapan. I luar ni Naibata, hamagouan dassa jumpah. Halani ai, roh ma hita hubani Naibata. Amen.
