Nas : Efesus 4:1-8
Usul Doding : Haleluya No. 501:1-2
Tema : Roh yang mempersatukan
Tujuan : Agar kaum bapak senantiasa hidup dalam persekutuan dengan sesama umat Tuhan
Sada Ibagas Tonduy ampa Holong
Tim Penulis
Nasiam bapa na hinaholongan ibagas Kristus Jesus,
Mamungkah renungan on, bayangkon hita ma lobei sada pertandingan sepak bola. Bani tim kesebelasan sepak bola, adong bei do peran ni haganup pemain, adong na gabe penjaga gawang, gelandang, pakon penyerang. Laho mamonangkon sada pertandingan, haganup pemain maningon do bekerja sama sesuai hubani strategi na dob itontuhon pelatih. Tapi, aha ma na terjadi anggo adong salah sada pemain na mangihutkon rosuh ni sandiri ibagas permainan ai, lang parduli bani arahanni pelatih, atap bahkan manlutui marhitei na mansalahkon hasoman pemain na legan? Tontu, domma ibotoh hita sonaha ujungni pertandingan ai, sedo dompak hamonangan tapi dompak hataluon ma.
Situasi na sonai ai ma na gati gabe gambaran ni pargoluhanta ari-ari. Sebagai sahalak bapa, marhorja do hita ibagas tim na marbeda, sahali ibagas tim i keluarga, sahali ibagas tim i pangkorjanan, sonai homa ibagas tim i gareja. Bani haganupan tim on, idompakkon hita do tantangan na marlegan-legan, baik ma ai halani perbedaan pandapot, egois, atap pe halani kesalahpahaman. Anggo lang ra hita marsada, “pertandingan ni goluh” on boi do marubah gabe hagosouon (kekacauan).
Bani renungan on, Apostel Paulus pasingatkon kuria na i Epesus ase manjaga hasadaon ni tonduy na irahut ibagas damei. Usih songon tim kesebelasan sepak bola nongkan ai na mamorluhon kerja sama ampa arahan ni pelatih, goluhta sebagai bapa on pe pasti do mamorluhon pambobai ni Tonduy Napansing laho totap marsada ibagas holong ampa tujuan na sarupa. Sungkun-sungkun hubanta aima, domma idalankon hita peran ai ibagas toruh ni uhur, halamlamon ampa ibagas lumbang ni uhu? Atap gatinan do hita mangihutkon rosuhta sandiri laho mansedai hasadaon ampa hadameion i rumah, i pangkorjanan sonai homa i gareja?
Riap ma hita marlajar humbani hata ni Tuhan panorang on, sonaha ase hita gabe “pemain tim” na manjaga hasadaon ibagas goluh on, marhitei na mamberehon dirinta ibobai Tonduy Napansing in. Sebagai bapa, gati do hita idompakkon hubani bagei ni tantangan, baik ma ai ibagas keluarga, pangkorjanan, ampa i gareja. Bani pardalanan ni goluh on, Tonduy Napansing in mandilo hita ase gabe siboan hasadaon, na parohkon anjaha pasaudkon harmoni, ampa gabe sitiruon dompak generasinta.
Tugas sebagi bapa aima tugas na sangap, gabe pambobai (pemimpin) ibagas keluarga, siusihan i tongah-tongah ni kuria ampa saksi i tongah-tongah ni masyarakat. Tapi sonaha do hita mandalankon tugas pandiloon on? Apostel Paulus patangkaskon hubanta piga-piga pedoman praktis bani ayat 2-3.
Na parlobei aima toruh ni uhur. Hasadaon ipungkah humbani sikap toruh ni uhur. Sebagai bapa, gati do hita tagoda laho pataridahkon otoritasta, tapi Tonduy Napansing mandilo hita laho mangidangi (melayani), sedo mendominasi. Na paduahon, aima halamlamon. Halamlamon on sedo sada hagalekon tapi hagogohon na terkendali. Ibagas keluarga, mararti ma on marsahap gok ibagas holong dompak sinrumah sonai homa dompak niombah, pori pe sanggah marah atap kecewa hita. Na patoluhon, aima lumbang ni uhur ampa marsianjuan ibagas uhur na holong. On do kuncini laho pasaudkon hasadaon. Laho mandompakkon perbedaan pendapat atap konflik, idilo do hita laho totap mangkaholongi, janah lang mangharapkon balos.
Ipasingat Apostel Paulus do homa pasal porlu ni manramotkon hasadaon ni tonduy marhitei panrahut ni damei. Hasadaon sedo hal na urah atap otomatis terjadi, tapi maningon aktif do hita laho manramotkon ai. Mararti do homa on, maningon ambukkononta ma ha-ahu-onta (sikap egois), janah sirsir mengampuni, ampa bekerja sama domu hubani kepentingan bersama.
Bani ayat 4-6, ipatorang Apostel Paulus do pasal dasar teologis ni hasadaonta. Na parlobei aima sada daging, hita aima pagori ni angkula ni Kristus, aima kuria (gareja). Sebagai bapa, maningon isadari hita do bahasa hita aima bagian humbani keluarga ni Naibata, na tardilo ase marsitungkolan ampa marsidukungan. Na paduahon, aima sada tonduy. Tonduy Napansing do bona ni hasadaonta. Tonduy in do na mangurupi hita boi marsiarusan, sirsir mengampuni, ampa sirsir bekerja sama age pe palegan-legan latar belakangta. Na patoluhon aima, sada pangarapan. Sebagai halak na porsaya, sada do pangarapanta aima hagoluhan sisadokah ni dokah ni ibagas Kristus. Pangarapan on ma na patoguhkon hasadaonta age pe mandompakkon bagei ni hamaholon. Na mangihut aima, sada Tuhan, sada haporsayaon, sada pandidion, sada Naibata bani haganup. Dasar ni hasadaonta aima haporsayaon dompak Tuhan Jesus Kristus. Sebagai bapa, martanggung jawab do hita laho manramotkon hasadaon on, baik ma ai ibagas keluarga, kuria, sonai age i masyarakat. Gabe saksi na manggoluh ma hita pasal holong ni Naibata anggo ihagoluhkon hita pandiloon on.
Bani ayat 7-8 ipasingat do hubanta bahasa domma haganup halak na porsaya manjalo idop ni uhur ni Naibata domu hubani ukuran ni pambere ni Kristus. Artini, domma ibere Tonduy Napansing banta bagei ni sibere-bere laho pasaudkon hasadaon ampa lambin pahotkon ampa mambahen lambin pagogohkon angkula ni Kristus. Sebagai bapa, ibere do banta sibere-bere na khusus humbani Tuhan laho mambobai, mangidangi, ampa mangajari. Sibere-bere on boi do marrupa hikmat (hapentaran) laho mambuhul haputusan, lumbang ni uhur mandompakkon sagala tantangan, ampa habaranion gabe siusihan ibagas haporsayaon. Tapi sibere-bere on maningon ipakeihon ibagas toruh ni uhur anjaha domu hubani kepentingan bersama.
Apostel Paulus mamakei istilah na humbani Psalm 68:19, na manggambarhon Kristus sebagai Raja na monang anjaha mamberehon sibere-bere hubani jolma. Kristus, marhitei hamateian ampa parpuho-Ni, domma mamberehon Tonduy Napansing gabe pangurupi ampa na pasadahon. Halani ai, idilo do hita laho mamakeihon sibere-bere na dong banta on laho pasangapkon Tuhan Naibata ampa membangun hasadaon na toguh ibagas holong ampa damei.
Age pe tardilo hita laho manggoluh ibagas hasadaon, lang tarlembangi hita bagei ni tantangan na roh hubanta. Sebagai bapa, mungkin dompakkononta do perbedaan pendapat ibagas keluarga, peranta aima gabe jembatan untuk pasaudkon pardameian, sedo sebalikini. Mungkin jumpah hita do homa konflik ibagas kuria (gareja), ulang paturut hita uhurta sandiri laho parsedahon hasadaon ibagas angkulani Kristus in. Mungkin jumpahan do homa hita bani tekanan hun dunia luar, na gati mampromosihon hubanta gaya hidup individualis, tapi idilo do hita ase manggoluh ibagas hasadaon na marsidukungan. Bani na mandompakkon tantangan ai, ihaporluhon hita do pangurupi ni Toduy Napansing. Ia do bonani hapentaron ampa habotohon, holong ampa hagogohon banta. Tongtong ma hita marsigantung hubani Tonduy in ampa torus ibagas komitmen manggoluh ibagas hasadaon ampa holong, baik ibagas keluarga, gareja sonai homa i masyarakat. Ase marhiteihon ni ai, ipasangap hita ma goran ni Tuhan ampa mamboan hadameion ma hita hubani haganup halak atap ija pe hita marianan. Amen.
