Renungan Mingguan Seksi Bapa GKPS, Minggu 28 Juni 2025 (2 Set. Trinitatis)
Nas : 1 Petrus 3:13-22
Usul Doding : Haleluya No. 334:1-2
Tema : Berbahagia karena Hidup dalam Kesabaran
Tujuan : Agar kaum bapa memahami bahwa kebahagiaan itu muncul karena hidup dalam kesabaran.
“Toguh ibagas haporsayaon, sabar bani hamarsikon”
Hita haganupan na hinarga ni Tuhan,
“Era pasca-kebenaran”, on ma na jamanta nuan, naija fakta gati italuhon opini, anjaha integritas pe gati ma homa ikorbanhon demi popularitas atap hauntungan parsatongkinan nidokan. Dunia pangkorjanan manuntut efisiensi janah lang parduli soal etika. Masyarakat patongahkon kompetisi keras, lang ipardiatei be soal idop ni uhur. Bahkan ibagas keluarga pe, peran sebagai kepala keluarga gati do idompakkon hubani krisis otoritas pakon tuntutan emosi na tinggi.
Adong survey na mangkatahon bahasa dalahi khususni parbapaon mangalami tekanan psikologis pakon spiritual na lambin borat, mulai humbani krisis identitas sebagai pemimpin rohani i tongah-tongah ni keluarga, meningkatni beban ekonomi, das hubani tantangan manjaga kesetiaan ibagas relasi sonai homa ibagas haporsayaon i tongah-tongah ni arus budaya digital na agresif nuan on. On aima “parburuon halus” (penganiayaan halus) jaman modern, lang marhiteihon lonsing-lonsing atap tutupan, tapi marhitei na berkompromi, husip-husip/godaan na ianggap normal,pakon tekanan ase maningon dihut hita bani sistem na adong. Sonai ma homa konteks na masa bani kuria na manjalo surat ni Apostel Petrus bani abad na parlobei ai. Sidea lang pitah mandompakkon pangarsikon atap parburuon secara fisik, tapi iahapkon sidea do homa dilema moral: totap margoluh na sintong i tongah ni sistem na lang adil atap lang, atap sipartahanonkononkon do haporsayaon hansi pe mambahen goluh lambin borat? Balosni Petrus na sintong janah teologis bani sungkun-sungkun on aima: anggo manaron hita halani hapintoron, na martuah do hita ijai, sedo hataluon ai. Anggo irisai halak hita halani haporsayaonta, pasu-pasu do ai sedo papa-papa. Anggo totap toguh hita ibagas Kristus, na mangirikkon bokas ni Kristus Siparmonang in ma hita ijai.
Renunganta on lang mambobai hita dompak jalan pintas, tapi justru patoguhkon hita untuk totap martahan, lang marhiteihon semangat ni jolma, tapi marhitei onjolan ni haporsayaon dompak Kristus na dob monang mantaluhon hamateian in do. Halani ai iontang do hita laho mangusihi Kristus: na sintong tapi sirsir manaron, na totap setia hansi pe itulak, na tongtong taat hansi pe maningon tarsilang. Buhai hita ma hauhuronta bei laho mamparimbagaskon renungan on, halani sebagai bapa, lang idilo hita sukses pitah bani pargoluhan secara parduniaon, tapi idilo do homa hita ase setia sebagai juak-juak ni Tuhan i rumah, bani ianan pangkorjanan, sonai homa age i gareja.
Hita haganupan,
Petrus manuratkon surat on hubani kuria na sanggah mandompakkon tekanan hun darat: sidea irisai, iparburu, ronsi itulak halani haporsayaon ni sidea. Bani ayat 13-14, ipadas hubanta sada hal na kontras tumang pakon logika. Naija bueinan do jolma manganggap bahasa aman ma hita anggo na madear do na ihorjahon. Tapi ibotoh Petrus do na sasintongni bahasa halak na mansahapkon na sintong, halak na setia, halak na manggoluh ibagas hasintongan, ai do na gati ikucilhon. Tapi i lobei ni Tuhan, sitaronon sisonai ai lang sining ai tapi pasu-pasu do. Ipakei do ijai hata ‘martuah’ artini lang pitah perasaan senang, tapi posisi ni aima ipasu-pasu Tuhan. Halani ai sungkun-sungkun hubanta, sirsir do hita manaron halani hasintongan? Atap rahanan do hita mamilih posisi “aman” hansi pe maningon kompromi?
Itoruskon Petrus bani ayat 15-16, ‘papansing nasiam ma Kristus Tuhan in ibagas uhur nasiam…’ artini, bahen hita ma Kristus in gabe pusat kendali bani goluhta bapa na mamorsan tanggung jawab na banggal sebagai kepala keluarga. Idilo do hita sedo pitah mambotoh hata ni Tuhan, tapi manggoluh ma homa ibagas hata in, artini gabe siusihan ma lang marhitei sora na koras, tapi marhitei goluh na pansing. Dob ai ipindo do homa hita ase sirsir patorangkon bani haganup halak na manungkun hita pasal onjolan ni pangarapanta marhitei lamlam ampa hormat. Bani dunia pangkorjanan sonai homa dunia social, buei do bapa na isungkun sonon: “Mase ra pe tong ham hu gareja?” atap “Mase lang songon sianu ai ham, manorih jalan pintas?” Lang ipindo hita laho mambalosi ai marhitei debat teologis tapi justru marbalos marhasoman lamlam ampa hormat, dua sikap na gati ilupahon sahalak bapa halani ianggap “hurang jantan/hurang macho”. Hape ijon ma karakter maskulinitas Kristen ai itopa: barani halani haporsayaon, lamlam halani holong, tegas halani hapintoron, martoruh ni uhur halani biar mangidah Jahowa.
Iarusi Petrus do bahasa dunia on igoki kecurigaan, boi do hita ifitnah hansi pe lang marsalah. Tapi lang ipindoni kuria in laho mambalas, tapi idilo do sidea ase manjaga panggora ni uhur na borsih. Porlu tumang do on hubani hita bapa, boi do maseda reputasi halani gossip, tapi integritas, ai boi maseda halani dirinta sandiri. Reputasi aima aha na ipingkirhon halak pasal hita, tapi integritas aima ise hita sanggah lang adong halak na mangidah hita. I rumah, i kantor atap pangkorjanan, sonai homa i kuria, gabe bapa na boi ihaporsayai ma hita, sedo halani na dob sempurna hita, tapi halani hita marusaha totap manggoluh ibagas sondang ni Kristus.
Na gabe usihan banta ase manjaga integritasta sebagai halak na porsaya ibagas horja na madear age pe maningon manaron aima Kristus Jesus. Ihatahon do, “Ai Kristus pe matei do sahali halani dousa, Ia parpintor ai halani pargeduk, ase iboban hita hubani Naibata.” Sasintongni lang talup Jesus manaron, tapi sirsir do ia manaron laho paluahkon hita. On ma na gabe onjolanta laho martahan: anggo Kristus domma monang manaluhon sitaronon ampa hamateian, tontu lang sisoya-soya homa panaronronta halani hapintoron. Mardingat hita bani kisah ni si Noak, i tongah-tongah ni dunia na gok hajahaton, totap do ia taat. Hansi pe ianggap aneh janah ipahiri halak ia sanggah paulihon parau ai, tapi dobni ia do na maluah humbani bah na sumbang ai ijia. Sungkun-sungkun hubanta, sirsir do hita songon si Noak, totap setia itongah-tongah ni dunia na lang setia on? Atap rahanan do hita mamilih posisi aman, janah lang manangihon pandilooon ni Tuhan?
Nini Petrus, pandidion sedo pitah ritual pardarat tumang, tapi ijai ma hita mangindo humbani Naibata panggora ni uhur na borsih. Komitmen dompak Naibata, bahasa hita lang manggoluh untuk dirinta sandiri be, tapi manggoluh bani Tuhan in ma. Anjaha halani domma puho Kristus humbani hamateian, janah domma hundul i siamun ni Naibata do laho hu nagori atas; tunduk do hu Bani haganup malekat, kuasa, ampa hagogohon, tontu lang sisoya-soya be haporsayaonya ai. Lang ibagas kekalahan hita manggoluh, tapi ibagas hamonangan do.
Hita haganupan na hinarga ni Tuhan,
Jaman on domma hurangan bani bapa na tangguh secara rohani/partonduyon. Buei do i tanoh on bapa na gogoh secara fisik, tapi galek/lemah ibagas prinsip, na barani idahon idarat, tapi goyah sanggah iuji haporsayaonni. Renunganta panorang on mangontang hita gabe bapa na barani sintong, hansi pe manaron, bapa na mamimpin ibagas holong sedo kekuasaan, bapa na manggoluh ibagas integritas sedo halani ase porlu idahon ni jolma songon bapa na sintong, dob ai na mangihut gabe bapa na mangunsagahkon Kristus, sedo hagogohan ni sandiri. Gabe siusihan na madear ma hita hubani sinrumahta, hubani niombah sonai homa hubani lingkunganta. Dunia boi do marubah, tapi bapa ni halak Kristen na sintong totap do toguh jongjong halani ibotoh do hubani ise ia porsaya. Amen.
