Bahan PA Lansia 1 Februari 2026
Nats. 1 Timoteus 4:1-16
Thema: Menjadi Teladan di Masa Tua
Tujuan: Agar kaum lansia menjadi penjaga kebenaran dan waspada terhadap ajaran sesat
dan menjadikan hidup sebagai teladaan rohani yang nyata
Gabe Siusihon Ma
Pongkut janah satia, aima bagian na fundamen bani sada relasi atap kekerabatan, halani marhiteihon na sonai do adong keberlangsungan. Usih hubani hubungan suami – isteri na maningon stabil age pe mandompakhon buei gilumbang na margantih soluk. Sonai do homa na mar-Tuhan on, maningon toguh do janah lang boi ganggang darngos ibagas na mangirikkon Tuhan in. Teks ni ambilan on patugahkon podahni apostel Paulus hubani Timoteus na itodoh janah itotapkon sebagai pimpinan ni kuria. Podah on patangkashon ase ulang mabaor bani bagei-bageini pengaruh na boi mambahen ganggang humbani Tuhan Jesus, tapi toguh marsijoloman bani hasintonganni Tuhan in. Ai marhiteihon na songon in do gabe tangkas idahon bahasa sintong janah pintor hita. Somalni anggo horja akal-akal atap pe na so sintong, tokkin do umur ni ai janah habadoron do tong ujung ni.
Buei ni siparpodah na kahou bani panorang ijia mambahen bou bumbang janah mubah halak na mangihutkon Jesus. Tongon buei do hauhuron na mamingkirhon bagei dalan age na so sintong asal ma jumpahan untung ia hunjai. Age nuan on pe buei do modus na pajongjongkon gareja tapi anggo tujuan utama ni aima bisnis janah sasaranni aima ase jumpahan keuntungan na buei ia hunjai. Ai do ase goluh on porlu ase totap ibagas gomgomanni Tonduy Napansing. Sonaha do ase boi jumpahan hita ijai? Nini apostel Paulus: “pasomal-somal ma dirimu mangkorjahon hadaulaton” (ay. 7). Hadaulaton artini ijon aima ”beribadah”. Anggo somal hita beribadah tontu gabe peka do pikkiran age paruhuranta hubani nasintonganni Tuhan in. Marhorja do Tonduy in bani goluhni halak na pongkut manangihon hatani Tuhan. Marhitei Hata ni Naibata ampa tonggo gabe marhagogohon do hita mandompakhon hauhuron na kahou ai. Anggo halak na pongkut martonggo, lang anjai daoh-daoh atap pe pondok hansa pikkiranni. Hata ni Tuhan in do na boi mambahen dewasa hauhuronta, lang tardanak. Ai marhitei tonggo gabe ipapansing Tuhan in do hita. Pargoluhanni haporsayaon na sintong sedo pitah padaohkon diri humbani na jahat tapi manjalohon ampa mandalankon Hata ni Tuhan in ibagas pargoluhanta, martarimakasih janah tongtong marpangarapan hubani Tuhan.
Tugas ni halak na porsaya bani Tuhan aima manjaga dirini ase ulang madabuh bani rosuh-rosuhni hadagingon janah lang irajai uhur hajolmaon. Ai ganup ari do hita sibuk bani persoalan-persoalan duniawi, pansarian, manguhuri niombah ampa pahompu. Ganup ari do hita mansari ronsi loja angkulanta on. Dingat hita ma: ” Ai otik do guna ni latihan badan, tapi hubani haganup do marguna hadaulaton in, ai hagoluhan sisonari ampa simagira iparbagah” (ay. 8). Haporluhon hita ma mambasa hatani Tuhan, martonggo ampa mangidangi – ai in do artanta magira i nagori atas. Ulang ma hita lalap merasa l ang puas bani pargoluhanta on tapi tarimakasihkon hita ma haganup na jinalonta, dear atap hurang dear pe ai. Parayak hita ma na madear in, lang pitah sahali tapi bani ganup panorang. Ai iidah Tuhan in do ganup pambahenanta gariada das hubani paruhuranta pe. Goluh ni halak na porsaya sedo goluh na tongtong protes janah menuntut, tapi goluh ni halak na porsaya aima ase tongtong marpangarapan. Amen
About the Author
