Bahan PA Bapa, Minggu Advent II, 10 Desember 2023
Nas : Psalmen 24:1-10
Tema : Sambutlah Raja Kemuliaan
Tujuan : Agar kaum bapa mempersiapkan diri menyongsong lahirnya Raja kemuliaan
Usul Doding : Haleluya No. 27:1-3
MANGGOLUH IBAGAS UHUR NA BORSIH
Horas ma hubani nasiam bapa, pangarapan nami, horas janah sehat nasiam bani panorang on.
Bani parsahapan-parsahapan ni parbapaon na ongga na tangar, gati do natangar hata na manghatahon “rahanan ma hita lang marminggu, tapi setia kawan, ra mamparjuangkon hasoman diri, ra homa mangurupi hasoman diri, daripada rajin marminggu, tapi lang marsaor janah lang homa parduli bani hasoman. Ase kadang-kadang, jengesan do na idah parsaoran ni supir motor (baca: bus) pakon par pasar-pasar (na horja i pasar: supir, parbecak, parbecak sorong, parojek, pedagang kaki lima, pnl) daripada parsaoran i gareja. Misal ni ma anggo dong sada motor (baca:bus) na maseda na soh i pardalanan, lang pala maningon ipangindo, langsung soh do anggo dong bus na lewat, manukkun pasal aha na maseda janah mambere pangurupion. Rela do sipangurupi ai tarlambat ia das bani tujuan asalma iurupi lobei hasomanni ai. Anggo i gareja, ra do na idah agepe boritan hasomanni atap mamorluhon pangurupion ra do seng adong na parduli. Asalma jenges idahon i gareja, gedung pakon fasilitas gareja marmengo-mengo, tapi anggo i dunia nyata gati do lang jumpah hajengeson ni parsaoran ai”.
Nasiam bapa, anggo dong hata na sahira na sinobut na i atas ai, jalo hita ma ai sebagai kritik na positif pasal goluh ta na margareja on. Tontu domma jelas banta bahasa hu gareja pakon mangurupi atap marpambahenan na madear, ai sedo pilih salah sada. Haduasi ai maningon saling terkait, sahali manghorjahon. Hu gareja mambere pangarusion banta pasal dasar pakon tujuan ni pambahenanta na madear. Hata ni Naibata na itangar hita i gareja mangajari hita bahasa halani na domma parlobei do hita manjalo holong pakon pangurupion na humbani Naibata ase mampu hita mambere holong pakon pangurupion bani hasoman jolma pakon tinompa na legan. Sedo laho mangindahi pahala hita sanggah manghorjahon na madear ai hita, tapi sebagai bentuk tarimakasihta bani Tuhan do pambahenan ta na madear bani hasoman jolma ai. Jadi dasar ni aima bahasa domma parlobei hita manjalo humbani Naibata. Dob ai use, tujuan ni pambahenanta na madear dompak hasoman jolma ai ma gabe hasaksian na manggoluh bahasa hita on aima anak-anak ni Naibata. Anggo anak ni Naibata do hita, tontu taridah ma ai marhitei pambahenanta na madear janah borsih.
Hita haganupan, tontu halak songon na sinobut na i atas in ma na talup tangkog hu dolog ni Jahowa. Aima halak partangan na borsih janah paruhur na pitah, halak na so mandompakkon tonduyni bani na so margagan, ampa halak na so ra marbija laho manipu (ayt. 4). Maningon do totap hita meyakini bahasa parmingguan ta ai manjaga hita ase totap bani motivasi na sintong bani na mangirikkon Tuhan atappe na markuria. Hata ni Naibata on pasingatkon hita bahasa lang talup na halak na sipakulah-kulah (munafik) tangkog hu dolog ni Jahowa. Halani ai do ase porlu tumang hita jaga bani uhurta. Lang homa dong gunani bermuka dua hita i lobei ni Tuhan halani Naibatanta ai aima Naibata na gok kuasa, Ia do simada tanoh on pakon haganup isini (ayt. 1). Tontu sibotoh haganup do Ia, das hubani na mambotoh isini paruhuranta na totap borsih atap na domma margelloki.
Dob ai, nas ta on homa pasingathon hita bahasa pambahenanta ronsi pangarusionta nuan on pasal Naibata, tontu iwarishon hita do ai hubani ginomparta. Maningon yakin do hita, anggo bapa markuria ibagas na pongkut janah ibagas motivasi na sintong, anak pe sonai do. Sihorjahononkon janah sitoruskononkon do ai, ulang ra hita sangsi bani dalan na sintong na domma idalani hita panorang on, ulang ra hita goyah halani mangidah halak na sipakulah-kulah gabe dihut hita sangsi bani dalan na sintong na domma itempuh hita. Pasirsir hita ma dirinta manjalo Raja hamuliaon in, pasirsir hita homa ginomparta. Naha pasirsirhon ai, manjaga diri bani motivasi na totap borsih bani na mangirikkon Tuhan in. Amen.
