Minggu, 11 Februari 2024 (Estomihi)
Nas: 2 Korintus 5:1-5
Usul Doding: Haleluya No. 138:1-3
Tema: Allah menyediakan kediaman yang kekal
SURGA HASONANGAN NA PINASIRSIR NAIBATA
(Tim Penulis)
Hita haganupan, Bapa na hinaholonganni Kristus …
Goluhta i tanoh on usih do songon sada pardalanan na ganjang, na lang ibotoh hita ija titik na parpudi. Tangkas do titik humbani parborhatni, hansa rusia ope pasal panorang parmulakni. Ase anggo ginoran pe pardalanan, pasti bagei do homa na ilopusi. Boi do sobuton songon hubang na bagas, tanoh na lang rata, dalan na marbatu-batu, pakon buei hamaholon na legan, lang lopas humbani sada pardalanan. Sonai do homa age na gati idompakkon hita bani goluhta on. Dageionta do na ginoran hasunsahan, hamarsikon, partinggilan, age das hubani dalan-dalan na mambobahon hita jolma madabuh hu bagas dousa. Ase na gabe sungkun-sungkun golpa-golpa banta, sanggah ibagas pardalanan sisonai ise do na gabe siunsagahkononta?
Marhitei nas ambilanta Minggu on, ipatorang Paulus do homa bahasa goluh na i atas tanoh on aima goluh na gok ibagas hangaluton. Bani ayat 2 pakon 4 isobut Paulus do, “Ai sadokah ijon marhoih do hanami … anjaha boratan, halani sihol uhurnami, ase ulang itanggali, tapi isolukkon malah, ase ibondut hagoluhan ai na ra matei on.” Secara sederhana boi sobuton, gomgomanni dousa domma manggoki tanoh na dear hinan itompa Naibata on humbani mungkahni gabe butak. Tapi halani idopni uhurni Naibata marhitei Jesus Kristus, jumpahan hagoluhan do halak na porsaya bani ujungni marhitei rumah hasonangan na ipauli Naibata i surga hasonangan si magira in (ayat 1). Halani dousa, Paulus manobut bahasa maningon marumbak do lampolampo na i dunia on, na mararti matei do haganup tinompani Naibata in.
Domu hujai, sadar ma hita lang adong na manontong i atas tanoh on. Halak na porsaya maningon boi mandalani goluh on sonaha ase ‘bermakna,’ bani halak na legan age ganup tinompani Naibata. Tongon, buei do ra usaha na binahenta laho mangindahi arti pakon tujuanni goluh, tapi Paulus patangkashon hubanta bahasa pitah pambalosion hubani parentahni Naibata aima na tang siporlunan bani goluh parsatongkinan on. Ase lang dong goluh na soya-soya bani halak na porsaya. Penghargaan Tuhan bani halak na porsaya lang margantung humbani sadiha dokah ia manggoluh, tapi humbani hinabanggalanni pambahenanni na madear in, marhitei holong dompak Naibata age tinompa na legan.
Hita haganupan, Bapa na hinaholonganni Kristus …
Igoran do minggu on Minggu Estomihi, artini “Sai Ham ma na gabe batar-batarhu” (Ps.18:3, Jes. 26:4). Anggo Jahowa ma tongon na bahen batar-batar bani goluh on, tontu pori roh pe paruntolon janah gok pe hamaholon na idompakkon hita, na boi do in italuhon hita (bnd. Pil. 4:13). Ibagas Naibata jumpahan gogoh do hita marhitei pangurupionni Tonduy Na Pansing. Ai isobut do, “Tapi na pasirsirhon hanami hujai, aima Naibata, na mambere bennami Tonduy in songon sikoram” (ayat 5). Tongon, halak na marianan ibagas Tonduy, Kristus do simada goluhni. Manggoluh ibagas Tonduy boi do homa isobut hita bahasa lang be mandalani goluh ibagas uhur hadagingon na boi patubuhkon dousa. Hinan, paima lape ijalo hita gogoh na humbani Tonduy in, goluhta ikuasai uhur pardousaon, tapi dob honsi ijalo hita Tonduy in, margogoh ma halak na porsaya laho manggoluh ibagas horja na dear.
Gogoh na humbani Tonduy in do na mamberehkon banta hapintoron (Ind. hikmat) laho manirang horja na talup ihorjahon hita ampa horja na mabatuk na maningon girah tadingkononta. Habaranion lang roh humbani dirinta sandiri. Lang halani bayak ahu, bahat diha-dihangku na pangkatni jago, mambahen pag ahu manghorjahon songon haganupan na iharosuhkonni uhurku. Lang halani gogoh ahu, uhurhu dassa na maningon saud. Tapi pangarapanni ambilanta on, Paulus paingatkon Kuria Korint ase pag anjaha barani mambaritahon na sintong marhitei kuasani Tonduy na dong bani.
Hita haganupan, Bapa na hinaholonganni Kristus …
Mandalani goluh dompak horja-horja na madear, in do homa na sihol iajarhon Paulus bani ambilan on. Prinsip na sihol ibaritahon-ni hu kuria Korint aima goluh na lang pitah martahan bani zona nyaman tumang, tapi pag mamorsan beban na legan age marhitei sitaronon. Mansuhuni uhur hadagingon pitah mamberehkon hasonangan parsatongkinan do banta i dunia on. Ai do mase Paulus manobut dearan do manaron sonari ibagas Kristus daripada manosal parpudi hinorhonni pardousata in. Bani Rom 8:18 isaksihon, “Sitaronon bani panorang sisonari seng satimbang in marimbang hasangapon, na sihol patalaron ope banta.”
Masamni na masa boi do tongon mambahen jolma gabe urah marhoih (Ind. mengeluh) hubani Tuhan. Haganupan ai terjadi halani hansi pe domma ibere banta Tonduy na humbani Naibata in, gabe halak na manggoluh ibagas ukuranni dunia on ope hita. Halani ai marhitei ambilan on hita iarahkon ase sirsir manggoluh ibagas Tonduy in. Anggo Kristus do na tang siporlunan bani goluhta, Ia do na mangurupi hita laho mandalani goluh on marhitei Tonduy Na Pansing in.
Memang, dong bei do latarbelakang pargoluhanta na mabutak i lobeini Naibata. Humbani sudut pandang hajolmaon, hita—halak Kristen masa kini on pe—boi hatahonon ‘lang ope talup’ manjalo haluahon na humbani Kristus in. Hita aima sasahalak na gati ope mandaoh humbani horja-horja gerejawi, mandalankon dousa, pakon bagei habutakon na legan. Tapi, pingkiranta jolma sedo pingkiran Naibata (bnd. Pod. 19:21). Naibata ibagas Kristus Jesus pagostongkon tangan-Ni na gok idopni uhur in janah mamakei goluhta gabe niombah na tarpasu-pasu. Ibagas Kristus, hita mandapotkon goluh na baru. Marhitei parjumpahan ampa panandaionta hubani Kristus, hita iarahkon ase ra manadingkon goluhta na madokah—goluh na gok ibagas horja pardousaon—laho mandalani goluh na baru ibagas Kristus. 1 Korint 15:58 manobut, “Totap ma nasiam, ulang mubah-ubah, anjaha lambin surung ma ibagas horja ni Tuhan in, ai ibotoh nasiam, sedo na soya halojaon nasiam ibagas Tuhan in.” Ibagas Kristus, sogop do idopni uhur-Ni bani halak na tongtong hobas mandalankon horja na iharosuhkon uhur-Ni. Limbuahni iluh, tangis, ampa lojanta manaksihon pasal-Si i tanoh on mungkin lang jumpah bani goluh parsatongkinan on, tapi ibagas pangaparan ipatalup do hita manean Harajaonni Naibata in.
Anggo itarik hita pangujungini ambilan on bani pargoluhanta, boi do ipungkah hita marhitei sungkun-sungkun sederhana: domma sonaha hita manghargahon idopni uhurni Naibata bani pargoluhanta bei? Ra, gati pe hita marungut-ungut halani dong otik tantangan na roh mandorab goluhta. Atap, gati ope hita mamurai hasintongan holongni Naibata bani goluhta. On ma na maningon ikritisi janah sitaluhononta selaku halak Kristen. Das hubani antigan pe, gabe halak si parungut-ungut do hita anggo dasarni haporsayaonta lape tangkas. Anggo Parpsalmen marsaksi do ia, “Marguru Bamu do goluhku ….” (Ps. 31:16). Artini, goluhta maningon ondos ma hubani Tuhan. Anggo sosak paruhuranta, pingkiranta, patugah hita bani Tuhan. Goluhta maningon do sandei bani idopni uhurni Naibata ibagas kuasani Tonduy Na Pansing. Sahali nari, ipaingat banta ase riap ma hita mandalani goluh on gok haondoson bani idopni uhurni Tuhan in, na talar marhitei kuasani Tonduy-Ni. Amen.
