Minggu, 18 Februari 2024 (Invokavit)
Nas: Ibrani 11:1-10
Usul Doding: Haleluya No. 453:1-2
Tema: Iman adalah dasar pengharapan kepada Tuhan
HAPORSAYAON NA SINTONG
(Tim Penulis)
Hita haganupan, Bapa na hinaholonganni Kristus …
Mansahapkon pasal haporsayaon tontu domma gabe hal na lumrah i tongah-tongahni pargoluhanta. Selaku halak Kristen, gariada gati do hita manobut dirinta halak na marhaporsayaon. Sanggah i gareja pe, bani perayaan Ibadah Minggu, ibagas sora na lantang ganup halak na markebaktian riap do manaksihon “Hata Haporsayaon” in. Sadalan hujai, boi ma sobuton bahasa na marhaporsayaon on dohor tumang bani goluhni halak Kristen. Hansa sungkun-sungkun na porlu banta, laho mambuha pangarusionta, sonaha do haporsayaon na sintong in? Sadokah on, domma gelah ahu mandalani ampa manghagoluhkon haporsayaon na saguru bani na iharosuhkonni Tuhan? Marhitei nas ambilan banta Minggu on, ipajorei do banta pasal haporsayaon ampa na marhaporsayaon in.
Bani ayat mamungkah isobut do, “Ia haporsayaon, aima tengerni uhur bani siarapkononkon, ampa na mambahen torang pasal na so nididah” (ayat 1). Haporsayaon sadalan do pakon pangarapan. Misal, halani porsaya do ahu bahasa Naibata sanggup pamalumkon sagala naborit na dong, dobni au mangarap bani haluahon na humBani. Tongon, hamalumon na iarapkon nongkan lang taridah, tapi halani haporsayaon, gabe hot do uhurta sai saud do sura-sura na dear ai ibahen Naibata. Bahkan humbagas hunjai, porini pe bani ujungni lang marnajumpah hamalumon nongkan, anggo totap porsaya anjaha marhatengeran do au huBani, aima na sinobut haporsayaon sintong. Marhaporsayaon lang mararti mamaksahon keinginan na dong banta bani Tuhan. Marhaporsayaon aima sada sikap hidup na pataridahkon penyerahan diri hubani gomgoman kuasa-Ni ibagas gokni uhur. Sanggah hita mangarap, pangarapan ai maningon iuditi marhitei sikap na porsaya. Halani ai tongon, biakni jolma (basa: halak Kristen) do mangarap. Hansa persoalanni, ulang girah tu hita manlajou Naibata sanggah pangarapanta ai lape saud. Ulang podas tu hita mandolei sanggah dokahtu ma pangahap lang marbalos Naibata.
Hita haganupan, Bapa na hinaholonganni Kristus …
Pos ma uhurta, ranggianni Naibata bani goluhta on aima ranggian na tang sidearan. Dob salosei ayat na mamungkah, dobni ipatorang sipanurat Buku Heber on do tokoh-tokoh siusihan pasal haporsayaon ampa na marhaporsayaon in (ayat 2-10). Anjaha na menarik, hampir haganup tokoh na isobut bani ambilanta on mandalani pengalaman na dos. Sidea domma matei sanggah lape mangahapkon (Ind. menikmati) haganup na dob ipadankon Naibata. Abel matei ibunuh si Kain paima ia manjumpahkon bagah-bagah na mantin humbani Naibata. Abram matei sanggah boi ope ietong bueini ginomparni, na mararti lang sompat ididah panonggorni Abram padan ginompar na bueini songon bintang na i langit in. Das hubani Henok, Noak, age Isak ampa si Jakob, na bani pardalanan goluhni sidea totap pataridahkon haporsayaon na toguh hubani Naibata hansipe mandaihon masamni hasunsahan, na bani piga-piga hal songon rusia na so tarjalo akal.
Isaksihon ompung-ompungta na hinan do bani Bibel on bahasa haporsayaon aima sumber hagogohon bani goluhni halak na porsaya. Bani hata Heber, haporsayaon ai usih do maknani songon hata aman. Hatorangan in sihol mambere pangarusion banta bahasa marhaporsayaon hubani Naibata mararti ma goluh on maningon sandei bani batu gingging na toguh, in ma Kristus Tuhan in. Ibagas na marhaporsayaon, age sonaha pe sidompakkonon, lang dong be hape alasan banta laho gobir mandompakkon haganupan in. Ibagas haporsayaon do, sasahalak boi toguh manggoluh ibagas hatotapanni Naibata. Usih songon Henok na mandalani goluh na pansing, hansipe buei sipanrisai bani zamanni, dobni marhitei haporsayaonni ia lang mandaihon hamatean mintor tarangkat hu surga.
Hita haganupan, Bapa na hinaholonganni Kristus …
Halak paruhur manobut, “Orang yang jatuh satu kali, sesungguhnya punya seribu cara untuk bangkit.” Ibotoh Naibata do na dear ampa na butak bani pingkiran-paruhuranni jolma. Sadalan hujai, ibotoh Naibata do homa batas gogohta. Marlajar humbani pengalaman-pengalaman imanni ompung-ompungta na hinan, ipangindo banta ase torus mardalan agepe terkadang maningon marsaran hita hinorhonni hagalekonta ampa hasunsahanta. Na ipadankon Naibata bani halak na porsaya in seng pardalanan na urah. Tapi hansi pe sonai na ipadankon banta aima panotap bahasa ibagas pardalanan na sulit ai sai tongtong do Ia setia mangkasomani ampa na manramotkon pargoluhanta. Kuncini banta aima: martengerni uhur bani siarapkononta halani haporsayaonta na toguh huBani. Ase songon doding pujian on ma iharporsayai hita bani goluh on na manobut, “Tuhan tak pernah janji langit selalu biru, tetapi Dia berjanji selalu menyertai. Tuhan tak pernah janji jalan selalu rata, tetapi Dia berjanji berikan kekuatan.”
Anggo mangihutkon pingkiran, buei do pahara bani goluh on songon lang tarjalo akal, lobih ma ai anggo sanggah hita mandompakkon sitaronon. Pangkei ma banta bahasa pangurupion na humbani Naibata lang gati songon na ibagas pingkiranta. Haluahon ampa hasonangan-hasonangan na legan in lang songon na mambalikkon telapak tangan. Cepat-kilat! Ihaporluhon do pandiloon ampa haporsayaonta. Haporsayaonta taruji sanggah hita mandompakkon bageini sitaronon. Sadalan hujai do, gok bani haporsayaon na sintong ma hita mandalani goluh on. Hargai ma tiap proses bani goluh on gok ibagas haondoson ampa haporsayaon hubani Kristus Tuhan in. Dingat ma, haporsayaon do na paluahkon, sadalan hujai hagoluhkon ma homa na gabe haporsayaonta in. Amen.
