Pematang Siantar, 6 November 2022
Nomor : 803/3-PS/2022
Hal : TONAH NI PIMPINAN SINODE GKPS BANI MINGGU/PESTA BAPA GKPS 2022
Nahinaholongan:
Ganup Kuria GKPS
Tiba Pengantar Jemaat
Bani ianan ni bei.
Selamat Minggu/Pesta Bapa GKPS ma hubani nasiam hasoman sahaporsayaon i Kuria on.
Sai ipasu-pasu janah ihasomani Naibata Bapanta in ma nasiam, tarlobih haganup anggota Seksi Bapa GKPS na i Kuria on na mamestahon hajongjonganni selaku sada seksi kategorial i GKPS.
Domu hujai, bani panorang malas ni uhur on, ihasiholhon uhurnami do padaskon piga-piga tonah na gabe parhiteiannami manisei nasiam haganupan:
- Gonap ma 27 tahun nuan hajongjongan ni Seksi Bapa GKPS. Halani ai, bani Minggu/Pesta Bapa GKPS sadari on sihol do paratahonnami use hubanta pasal horja pandiloon na dob itotapkon Naibata hubani bapa i tongah-tongah ni Kuria-Ni. Selaku malim i tongah-tongah ni keluarga, tanggung jawab ni bapa do manramotkon goluh partonduyon ni rumah tanggani sonai homa age Kuria in (Job 1:4-5). Anggo lolei bapa bani horja pandiloonni na banggal in, marpangkorhon do hubani pargoluhon ni rumah tangga sonai homa age Kuria. Ase, marhiteihon ni on ipagolpa hanami ma ase haganup Bapa GKPS lambin pabayuhon uhur laho mandalankon horja pakon tanggungjawabni bei. Sada hal na na porlu sidingaton ni ganup bapa aima, paboa aha pe na ihorjahon sahalak bapa, boi do patalarhon buah na madear, asal ma ganupan ai ihorjahon laho pasaudkon harosuh ni Naibata.
- Tangkas do homa ipatugah hubanta pasal sonaha banggal ni holong pakon panramotion ni Naibata Bapanta hubanta (Epesus 3:14-17). Marhitei Tonduy Na Pansing gabe tangkas do itanda hita Naibata selaku Bapanta janah boi hita mardilo, “Abba, Ham Bapa” hu Bani, na pataridahkon sada parsaoran na orod, sangkan ibagas holong pakon-Si (Rom 8:15; Galatia 4:6). Ipabotohkon Bibel do homa sonaha tanggung jawab ni bapa selaku “bapa partonduyon” na gabe sipangajari pakon sipambobai i tongah-tongah ni Kuria in (Heber 13:7). Mardingat haganupan in, totap ma haganup Bapa GKPS marpangguruan hubani Naibata Bapa bani na mandalankon horja pakon pandiloonni i tongah-tongah ni keluarga, kuria, ampa masyarakat.
- Selamat Minggu/Pesta Bapa GKPS ma hubani nasiam janah pakei hita ma panorang na madear on laho martarimakasih hubani Naibata Bapanta, aima Bapa ni sagala bapa. Talup do homa hita mangkatarimakasihkon hajongjongan ni Seksi Bapa GKPS na sai tongtong mambere diri bani bagei ni horja i tongah-tongah ni Kuria ni Tuhan in.
Tuhanta ma na mampargogohi nasiam haganupan!
Salam pakon tonggo,
Pimpinan Sinode GKPS:
Pdt. Dr. Deddy Fajar Purba Pdt. Dr. Paul Ulrich Munthe
E p h o r u s Sekretaris Jenderal
Tembusan:
- Praeses GKPS Distrik I – XI
- Pandita/Pengurus GKPS Resort
- Pertinggal
