Renungan Mingguan Bapa GKPS, Minggu, 3 Agustus 2025 (7 Set. Trinitatis)
Nas : Yakobus 1:2-8
Usul Doding : Haleluya No. 116:1-3
Tema : Komitmen dalam Tuhan
Tujuan : Agar kaum bapa menghindari komitmen yang setengah-setengah karena menyebabkan kemerosotan rohani yang tidak disadari.
MANGHAMALASKON PARLAJOUAN
Kuria na hinaholongan ibagas goranni Tuhanta Jesus Kristus!
Sanggah ibagas parsikolahan hita, pasti do hita ongga mandihuti ujian. Tujuan ibahen ujian aima untuk mangukur kompetensi siswa, menilai pangarusion ni siswa dompak materi pelajaran pakon mambere umpan balik laho memperbaiki proses pembelajaran. Ase jenges tumang do tujuan ni ujian i parsikolahan, ai haganup lang laho paloja-lojahon atap laho mambahen ranking tumang, atap pe laho mangukur ise sipandeinan ibagas sada-sada kelas atap sikolah. Sasintongni tujuan ujian sedo parlumbaan pakon kawan sakelas demi memperebutkan juara tapi laho mangukur setiap siswa atap na boi do ia mandihuti parlajaran ibagas na dear janah lang maningon parbandinghonon hubani siswa na legan.
Seksi bapa na hinaholongan ibagas Tuhan Jesus Kristus,
Goluh ta on pe dong do ujian ni. Anggo bani nas ta ipakei do hata parlajouan. Parlajouan pasti do masa janah lang tarelakkon bani goluhta. Sada na porlu dingatonta, parlajouan ni goluh martujuan na jenges tumang. Aido ase iijinkon Naibata masa parlajouan bani goluhta. Ase nini si Jakobus do ase hira hita ma malas ni uhur tumang anggo madabuh hita hubagas bageini parlajouan. Tontu sada sungkun-sungkun na banggal tumang do on mase ma iojur hita ase mangidah parlajouan ai sebagai malas ni uhur. Parlajouan lang sodap. Sanggah ibagas parlajouan borit tumang pangahapta. Gatni lang adong hita na marosuh manaron. Lang adong hita na marosuh boritan, marutang, martinggil, marpusok ni uhur, mateian anak/boru, mateian pasangan hidup atap mateian orangtua. Lang adong na marosuh tading maetek bahkan hancur tumang paruhuran mangidah niombah na lang mananda bapa ni atap inang ni. Lang adong na marosuh magouan arta atap magouan keluarga. Anggo boi ulang ma masa bencana alam, bencana sosial, ulang masa kebakaran, ulang hona tangko arta na domma isarihon hita marbois gogoh. Ulang ma namin adong gareja na ilanglangi pembangunanni, ulang adong na manaron halani haporsayaonni, ulang ma adong namin na iganggu sanggah markebaktian janah ulang ma adong namin na susah dapotan horja halani Kristen ia, atap susah naik jabatan halani haporsayaonni. Ulang ma adong namin bapa na hona Pemutusan Hubungan Kerja (PHK), ulang ma adong namin panen na gagal, ulang ma adong namin kepala keluarga na magouan sumber penghasilan.
Tapi, masa do nasinobut nokkan. Manaron do hita. Gati do hona akibat buruk hita humbani na lang horjanta. Jadi sonaha ma boi hatahonon bahasa parlajouan ai martujuan na jenges? Sonai ma boritni sitaronon, aha dalanni ase boi hita menganggap bahwa parlajouan ai sebagai malas ni uhur? Nini si Jakobus do bahasa parlajouan manghorhon hasabaron anjaha hasabaron ai manghorhon horja na gokan dear. Hape, pertumbuhan ni karakter na jenges ibagas hita, contoh na isobut si Jakobus ijon aima hasabaron, lang muncul bani dirinta sonin tumang. Adong do proses ni janah proses ai sakit. Songon bejana tanah liat, ase boi ia gabe koras, maningon do tutungon, sonai ma homa hita, maningon ilajou do ase parlajouan ai na mambahen hita gabe tahan uji janah sabar. Ase adong do na martonggo mangindon hasabaron, ibalosi Tuhan do tonggo ni ai marhitei na paturutkon masa bani bagei-bagei ni parlajouan, halani parlajouan ai do membentuk ia gabe sabar. Aha na ihasilhon sitaronon ai do hape na maningon ididah hita ase boi hita menganggap parlajouan ai sebagai malas ni uhur. Hasabaron manghorhon horja na gokan dear, ase gabe gokan dear hita, seng sihataon anjaha seng marhahurangan.
Jolma pasti adong panorang ni madabuh hubagas bagei ni parlajouan. Sada hal na porlu itokanhon ijon parlajouan ai marbagei-bagei. Anggo iidah hita bani aha na masa ijia bani panorang sanggah surat on ituliskon si Jakobus, bagei-bagei ni parlajouan ai aima sitaronon, pangarsikon, ujian na marmasam tumang bentukni. Artini parlajouan ijon sedo parlajouan halani ulahta sandiri, misalni aima manaron lang marduit halani dokahan hundul-hundul i kodei gabe lang laho marhorja gabe lang marduit. Atap, ibagas parnaboritan halani lang manjaga kesehatan marhiteihon na kecanduan minum alkohol pakon manginsop. Tontu maningon pangkei do hita bani parlajouan na imaksud ni si Jakobus ijon ase ulang ipados hita ganup bagei ni sitaronon. Manjalo parlajouan ibagas malas ni uhur boi terjadi anggo ididah hita humbani sudut pandang aha do hinorhonni parlajouan ai bani karakterta. Parlajouan anggo ijalo ibagas malas ni uhur gabe mangkorhon hasabaron, hasabaron ai mangkorhon horja na gokan dear.
Hita seksi bapa,
Laho manghamalaskon parlajouan, iporluhon do habotohon na humbani Tuhan. Lang masuk akal janah oto irik podouan do bani dunia on anggo adong na manghamalaskon parlajouan. Ra do gabe ianggap kehilangan akal. Bahkan adong do na manobut bahasa agama adalah candu. Bani na mangartihon ai secara negatip mangidah agama pakon Tuhan papodom-podomhon halak na ibagas sitaronon janah lang mangidah realitas sosial na terjadi. Ianggap agama membius halak na marsitaronon na mambahen na marsitaronon ai lang boi mangidah kenyataan na sebenarni. Sidea menganggap bahasa agama adalah candu mambahen halak lang kritis janah urah gabe korban penindasan. Bani halak na porsaya, agama bukan candu, tidak membius dan tidak menghilangkan kesadaran. Halak na marhaporsayaon selalu memiliki sikap kritis mangidah goluhni pakon sekitarni. Ai do ase nini Jakobus do “Tapi anggo adong i tongah-tongah nasiam na hurangan bani hauhuron, ipindo ma ai hubani Naibata, na layak mambere bani haganup, anjaha seng marpangayah, jadi bereonni ma ai hubani” (ay. 5). Ase jalo hita ma habotohon humbani Tuhan ase Ia na mampargogohi hita untuk mangidah janah mandalani parlajouan ibagas rosuhni Tuhan. Ase sintong-sintong parlajouan ai manghorhon hasabaron. Lang dong gogoh pakon habotohon banta untuk boi mencerna bahasa memang parlajouan manghorhon hasabaron. Pitah hikmat na humbani Tuhan do nab oi ipakei hita untuk mangakui pakon mangahapkon ai.
Dob ai, iajari nas on do homa hita ase mangindo ibagas haporsayaon, ulang bungbang. Halak na bungbang lang manjalo atap aha humbani Tuhan. Halak na mardua uhur, geor do pargoluhanni. Adong do umpama na manobut: “Ulang songon manjolom ria-ria”. Sapala ijolom poltik ma, anggo lang poltik, gabe tarsayat do tangan. Anggo mangindo, yakin ma. Hita mangindo hubani Bapanta na i nagori atas ai, pasti do bereonni na tang sidearan banta. Sonai ma homa hubanta bapa, keyakinanta mamboan keluarganta hubani Tuhan. Bapa na toguh janah parhaporsayaon na toguh mamboan keluargani mamolus ragam masam ni parlajouan ni goluh. Ase bani ujungni, jumpah ma buah manis ni ketahanan mandompakkon parlajouan ai. Jalo hita ma habotohon/hikmat na humbani Tuhan, ase ibere banta hauhuron ase tahan hita mandompakkon parlajouan. Parlajouan lang tarelakkon, hira hita ma ai malas ni uhur tumang. Amen.
