Renungan Mingguan Seksi Bapa GKPS, Minggu 15 Juni 2025 (Trinitatis)
Nas : 1 Petrus 3:1-7
Usul Doding : Haleluya No. 501:1,2,4
Tema : Karakteristik Pernikahan yang Beriman
Tujuan : Agar kaum bapa memahami bahwa pernikahan yang beriman adalah pernikahan yang senantiasa bersandar kepada Tuhan.
“Gabe Bapa sitangihon Hata in janah sihaholongi parinangonni”
Tim Penulis
Nasiam bapa na hinaholongan ibagas Kristus,
Bani kondisi ni pargoluhan na lambin pataridahkon krisis nilai pakon identitas keluarga nuan on, ididah hita lambin buei do homa rumah tangga na magouan arah. Peran ni bapa gati gabe simou, adong na gabe penguasa otoriter, adong homa do na menyerah janah pasif. Bani haganupan ai, buei do dalahi tarmasuk halak Kristen na lupa bahasa gabe sahalak paramangon/bapa sedo soal dominasi, tapi pandiloon na pansing do laho pataridahkon holong ni Kristus i tongah-tongah ni rumah tangga.
Hata ni Tuhan na gabe renunganta panorang on, khususni bani ayat 7, mambere pandiloon na serius ampa gok ibagas tanggung jawab hubanta sebagai kaum bapa. Bani nas on, Apostel Petrus padaskon hubani pasangan Kristen na manggoluh bani konteks zaman harajaon Rom na patriarkal tumang struktur sosialni. Tapi, ipatongah Apostel Petrus do harga ni partongah jabuan ni halak Kristen hu ianan na radikal: aima relasi na marsipasangapan, marsihaholongan, anjaha setara ibagas idop ni uhur.
Surat Petrus na parlobei on itujuhon hubani halak na porsaya na merap i Asia na etek, na mandompakkon sitaronon halani haporsayaon ni sidea. Salah sada fokus utama ni Petrus aima sonaha ase goluh ni halak Kristen legan humbani dunia on, sedo marhitei parlawanon secara fisik, tapi marhiteihon gabe usihan ibagas goluh na pansing, termasuk ma homa ai age ibagas konteks rumah tangga.
Bani bindu 2:13-3:12 isobut do pasal na manggoluh ibagas haundukon halani hasaksian ni Kristus: hubani pamarentah, hubani tuan, sonai homa ibagas rumah tangga. Bani konteks on, ihatahon Petrus do bahasa hubungan antara suami-istri sedo pitah pasal strukur kuasa, tapi pasal hasaksian ni goluh do homa dompak dunia on.
Bani ayat 7, isobut “paramangon pe sonai ma, maruhur ma nasiam mangkasomani sidea…” Maruhur ijon artini lang pitah pandei atap marpangalaman, mangihutkon hata Gorikni, hata on aima “memahami istri dengan mendalam”—emosini, haporluanni sonai homa paruntolonni. Sahalak paramangon lang pitah hadir secara fisik, tapi hadir ma homa secara emosional pakon secara rohani. Buei do paramangon na gagal bani aspek on halani sobuk laho mansari, mangayaki na sinura, gabe lupa laho memahami parinangonni. Gati hita lupa bahasa parinangonta ai sedo pitah hasoman modom atap hasoman mangurus rumah tangga, tapi hasoman tonduy na niondoskon ni Naibata. Halani ai idilo do hita paulihon komunikasi na jujur ampa holong na sabar. Tangihon ma ia, tonggohon homa, anjaha dihut ma hita tarlibat bani goluh partonduyonni.
Na mangihut, isobut do homa “…sangap ma bahen nasiam sidea, halani dihut do sidea hasoman panean bani sibere-bere hagoluhan na humbani Naibata…” On aima sada pernyataan na radikal bani zaman ai. Bani budaya ni halak Rom, naboru atap parinangon gati do ianggap gabe warga kelas dua. Tapi Petrus mangkatahon bahasa parinangon aima hasoman panean bani idop ni uhur in aima sibere-bere hagoluhan na humbani Naibata. Ibagas Kristus, lang adong superioritas gender. Paramangon atap parinangon dos do anjaha riap manjalo haluahon in. Sadalan do on pakon na iajarhon Apostel Paulus bani Galatia 3:28 bahasa ibagas Kristus “lang adong dalahi atap naboru” tapi sada do haganup. Halani ai relasi paramangon-parinangon sedo soal ise sitingginan, tapi lobih hubani soal saling mandukung ibagas holong pakon hasadaon.
Sungkun-sungkun hubanta “ihormati/ipasangap ham do parinangonmu sebagai hasoman panean bani haluahon in?” Atap das bani nuan on, ibahen ham do ia songon bawahanmu? Hormat ai tardidah humbani caranta marsahap dompak sidea, caranta mambahen haputusan, pakon sonaha hita padihutkon sidea ibagas goluh partonduyon. Paramangon na manghormati/pasangapkon parinangonni mararti mambuka ruang hubani laho marbanggal ibagas haporsayaon anjaha mangidangi, sedo mambatasi atap mengontrol.
Dob ai bani ayat 7c isobut “…ase ulang tarlanglang tonggo nasiam.” On aima sada sipasingat na serius. Ihonahon Petrus do secara langsung relasi paramangon pakon parinangon on hubani hubunganta pakon Tuhan. Artini, kualitas tonggo ni sahalak paramangon itontuhon sonaha ia marparlahou dompak parinangonni. Anggo kasar do ia, egois, atap lang mangkargahon parinangonni, targanggu do homa relasi ni pakon Naibata. Haporsayaon ibagas hakristenon lang ongga manirang relasi pakon Naibata humbani relasinta pakon hasoman jolma. Ase, parsombahon na sintong ai tarmasuk ma homa ijai integritas ibagas rumah tangga. Halani ai lang pala songon na sungkun-sungkun uhurta anggo horah goluh partonduyonta halani lape ibereskon hita relasinta pakon parinangonta.
Pareksa hita ma dirinta bei, songon na horah do iahap hita tonggonta? Mungkin sedo halani daoh Tuhan, tapi halani na lape mardamei do hita anjaha marparlahou ibagas na talup dompak parinangonta. Marubah ma. Pungkah ma paulihon use holong, pangkargahonon, pakon pengertianta hubani hasoman saparangguanta.
Hansi pe ibagas Bibelta igambarhon bahasa paramangon/sahalak bapa aima sebagai kepala keluarga (Epesus 5:23), tapi sedo mararti ai gabe “bos besar”. Kristus do ulu ni kuria in, tapi mambobai do Ia ibagas holong ampa hasirsiron mamberehon diri-Ni gabe tobus ni jolma. Domu hujai, bapa/paramangon pe idilo do homa laho mambobai songon Kristus in, gok ibagas holong ampa rela berkorban.
Anggo sonai aha ma sibahenonta? Tonggohon ham ma sinrumahmu tiap ari, ulang pitah horjamu hansa itonggohon ham, tapi sobut ham goranni pakon paruntolonni ibagas tonggomu ai. Ibagas na mambuat haputusan na banggal ham bani goluhmu, padihut ham ma sinrumahmu, tangihon ma masukanni anjaha hormati ma pandapotni. Bere ham ma panorang na dear, sedo pitah soal piga dokah ham riap pakonsi, tapi hadir ma ham secara utuh sebagai hasoman/sahabat pakon pasangan. Sirsir janah barani mangindo maaf, kepemimpinan sejati sedo gabe sok kuat, tapi sirsir patoruh diri ni anggo domma lepak. Na mangihut aima gabe siusihan ibagas haporsayaon, ulang pitah pandei manuruh hu gareja, tapi togu ham ma ia marhitei goluhmu.
Nasiam bapa na hinaholongan ibagas Kristus,
Keluarga sedo pitah tempat tinggal, tapi keluarga aima ianan pangidangion na parlobei. Ijai do hita marlajar mangkaholongi songon Kristus, sirsir mengampuni songon Bapa, ampa mangidangi songon Tonduy Napansing. Bapa/paramangon na sintong sedo na sibueinan marsahap, tapi na bueinan mangkaholongi do. Anggo igoki holong do rumahta, tontu ijai ma niombahta marlajar pasal Naibata na gok holong ai. Anggo igoki hormat do rumahta, ididah dunia ma hasaksian pasal Kristus na manggoluh in. Halani ai, eta nasiam haganup bapa ma manggoki pandiloon on: gabe paramangon/bapa na bijaksana ma hita, igoki hormat, anjaha manggoluh ma ibagas holong ni Kristus, halani rumah tangga na sehat ipungkah humbani uhur ni sahalak bapa na unduk hubani Tuhan. Amen.
