TATA IBADAH JUBILEUM JEMAAT GKPS 120 TAHUN AMBILAN NAMADEAR I SIMALUNGUN

TATA IBADAH JUBILEUM JEMAAT GKPS 120 TAHUN AMBILAN NAMADEAR I SIMALUNGUN

Minggu IX Dob Trinitatis
6 Agustus 2023

 TEMA:

“Hasadaon pakon Pangidangion na Marbuah.”
(Kolosse 1:10)

SUB TEMA:

“Marmalas ni Uhur ma Hita Pataridahkon Buah ni Haluahonta anjaha Gabe Pasu-pasu i Tongah-tongah ni Gareja, Masyarakat, ampa Negara Tanda ni na dob Matoras Haporsayaonta.”

(1 Tessalonika 5:16-18; Jesaya 9:2; Psalmen 118:24)

DILO-DILO:

1. Hita ganupan kuriani Tuhanta, marmalasni uhur do hita panorang on mamestahon na dob 120 tahun Ambilan Namadear in marhorja i tongah-tongah ni kuriani Tuhanta GKPS. Porlu homa iparatah banta: Injil do na mambuha panonggor ni oppungta na hinan i Simalungun. Marhiteihonni aima ase ialami hita hamajuon tarlobih marhitei pendidikan, mamungkah ma ai hun tanoh Raya. Nuan domma lambin bolag juma in, lang be pitah i tanoh Simalungun janah buei ma homa na mar-peran bani jenjang na lobih gijang i pamarentahan, dunia politik, bisnis pakon na legan. Halani ai talup do hita tongtong martarimakasih, ai ipasu-pasu Tuhan in do ganup pagori ni GKPS on.

PRAELUDIUM & PROSESI

(Siparugas, PMJ, Panitia; dear homa anggo adong panortor mangalo-alo)
Kuria (mandodingkon) Hal. No. 395:1-2

1. Pasangap ma Tuhanta marhasoman arbab pakon doding
   Sombahkon ma pujian marhiteihon inggou maraloling
   Dear ma riap mandoding haganupan malas uhur rap mangolobhon
   Porini adong pusok ni paruhuron roh do Tuhan lao patorsahon
2. Dodingkon doding baru marhasoman sora na malurlur
   Pamaling ma sora mu songon parmaling ni taur-taur
   Dear ma riap mandoding haganupan malas uhur rap mangolobkon
   Porini adong pusok ni paruhuron roh do Tuhan lao patorsahon

————————– hening/ marhata giring-giring ————————–

1. VOTUM – INTROITUS – TONGGO
2. : Ibagas goranni Naibata Bapa pakon Tuhan Jesus Kristus ampa Tonduy Napansing, sitompa langit pakon tanoh on.

P+K.  :  Amen

1. : Barang ise na hundul ibagas pangondingion ni Na Timbul in, anjaha marianan bani linggom ni Pargogoh na so tarimbang in,
2. : Ia do na boi marsahap bani Jahowa: Haporusanku anjaha batar-batarhu, Naibatangku, anjaha hatengeran ni uhurhu
3. : Tongon, ai Ia do na paluahkon ho humbani sambil ni parsambil pakon humbani pangagou ni sampar.
4. : Ia do na manrungkub ho bani ambuluni, anjaha itoruh ni habongni jumpah ho haporusanmu; hasintonganni do gantar parlingodan.
5. : Seng pala habiaranmu songgot-songgot borngin, barang sior na habang arian;
6. : Barang sampar na mawat-awat bani na golap, ampa naborit na mangagou tongah ari.
7. : Ai ibahen ho do Jahowa haporusanmu, anjaha Na Timbul in gabe batar-batarmu.
8. : Seng anjai mangonai be bam hasamboron, barang hamagouan seng be roh mandohori lampo-lampomu.
9. : Ai suruhonni do malekatni halani ho, ase iramotkon ho bani sagala dalanmu.

Haleluya – Haleluya – Haleluya

1. : (mandodingkon) Haleluya – Haleluya – Haleluya
2. : Martonggo ma hita: Ham Naibata Jahowa na dob manodoh anjaha mambobai pardalananni bangsa hinaholongan-Mu. Ipuji hanami do goran-Mu na pansing in. Holong-Mu hubannami lang tarbilangi hanami janah sura-sura-Mu pe lang tardou-dou hanami. Ham do na manogu hanami humbani lombang hamateian halani dousa. Iain Ham hanami gabe parsimada janah panean harajaon-Mu na pansing in. Domma 120 tahun sondang haluahon in marhorja i tongah-tongah nami. Gabe hasaksian bolon do in nuan bannami kuria-Mu GKPS, ai gok malasni uhur marhasoman olob-olob do hanami nuan. Ham ale Tuhan, sangap janah marmulia ma goran-Mu ronsi sadokahni-dokahni.

P+K.  :  Amen (hundul kuria)

2. MANDODING HAL NO. 402:1-2
   Puji ma Naibatanta bai ianan Na Pansing-Niin,
   Bai paratas hamuliaon-Niin,
   Haleluya! Haleluya! Puji ma Naibata.
   Pasangap ma goran-Ni, halani pambahenan-Niin,
   ampakon hagogohon-Niin,
   Haleluya! Haleluya! Pasangap Naibata.
   Pahata ma tarompit ge arbab pe,
   irandu pakon gondrang husapi pe.
   Irik homa sarunei ge sordam pe,
   sonai ampakon ogung marolol bei.
   Puji ma! Rumbuk ma baen parhata ni parugas in.
   Sombah ma! Marhiteihon ni doding na lurlur ijin.
3. 
   Puji ma Naibatanta, Sipargogoh na tarsulur in,
   parsimada harajaon in,
   Haleluya! Haleluya! Puji ma Naibata.
   Pasangap ma goran-Ni, ale ganup na marhosah in,
   ningon rup ma mamuji ijin.
   Haleluya! Haleluya! Pasangap Naibata.
   Pahata ma tarompit ge arbab pe,
   irandu pakon gondrang husapi pe.
   Irik homa sarunei ge sordam pe,
   sonai ampakon ogung marolol bei.
   Puji ma! Rumbuk ma baen parhata ni parugas in.
   Sombah ma! Marhiteihon ni doding na lurlur ijin.
4. HASASAPANNI DOUSA
5. : Riap ma hita jongjong! Dompakhon hita ma Tuhanta janah sopotkon hita ma ganup dousa ampa hahuranganta! Ham ale Tuhan, roh do nuan hanami kuria-Mu mandompakhon Ham. Talar do ganup goluh nami bani panonggor-Mu, otik pe lang adong na lingod. Mangaku do hanami Tuhan bani dousa ampa hahurangan nami mandompakhon Ham, sonai age salah lepak nami hubani hasoman nami jolma. Domma 120 tahun Ambilan Namadear in manondangi hanami; talup ma namin pargoluhan na madear janah gabe sipujion ganup parlahou nami. Tapi lang jumpah in ope bannami halani uhur na galek, na sai tong haut bani hisap haduniaon on.
6. : (mandodingkon) “O Tuhan maidop ma uhurMu”

Bapa  : Ipatotap Ham do hanami gabe sipambobai janah siusihan bani keluarga nami bei, ambahni ai idilo Ham do hanami ase parsimada bani horja i tongah-tongahni kuria-Mu. Hotop ope lansei janah hampung uhur nami bani tanggung jawab in. Iboan-boan hanami uhur nami janah hengkeng  uhur nami mambalosi dilo-dilo-Mu. Goluh ampa hauhuron nami lang ope pataridahkon na majenges songon jenges ni pambahenan-Mu bannami. Ham Tuhan, idop ma Ham mangidah hanami bapa, ulang ma mintor manringis Ham mangidah ganup hahurangan nami.  Topa Ham ma uhur na bayu bannami marsada-sada janah rajai Ham ma uhur nami. Salpuhon Ham ma dousa ampa hahurangan nami in. Holong ma Ham bannami bapa on.

1. : (mandodingkon) “O Tuhan maidop ma uhurMu”

Inang : Ham o Tuhan, iondoskon Ham do hubannami tanggung jawab selaku inang i tongah-tongahni keluarga ampa kuria. Hotop ope lang humbani gok ni  uhur nami mandalankon horja in. Hotop do homa hanami mandolei halani buei ni na hurang. Lupa hanami bani kuasa-Mu na boi pasirsirhon ganup na porlu bannami age kelaurga nami. Parsahap ampa pangabak nami pe hotop do lang romban bani rosuhni uhur-Mu. Ham ale Tuhan, ulang ma padaoh Ham bohi-Mu humbannami. Marpanganju ma Ham hubannami jolma pardousa on.

1. : (mandodingkon) “O Tuhan maidop ma uhurMu”

Namaposo            :  Hanami namaposo pe dihut do na gabe haondosanni horja i tongah-tongahni kuria-Mu, tapi gati ope hanami marhampung ni uhur, sipata porlu so porlu bannami. Hurang pongkut ope hanami manggoki diri nami marhitei na manangar ambilan sonai age podah na madear. Hurang ope hanami manghaporluhon horja-Mu i gareja marimbang halilian nami na so margagan. Ham o Tuhan, ulang ma Ham manringis mangidah parlahou nami na so talup in. Sasap Ham ma dousa nami ale Tuhan, holong ma Ham.

1. : (mandodingkon) Ham Tuhan holong ma Ham
2. : Hanami pe buei do dousa ampa hahurangan nami i lobei-lobei-Mu. Gati do hanami marguro-guro tikki i parsikolah mingguan, lang pongkut hanami manangihon guru sikolah minggu. Sonai do homa age bani orang tua nami, gati ope hanami lang gabe sipambalosi janah marsidalian mandalankon horja. Holong ma ham hubannami Tuhan, salpuhon Ham ma ganup dousa nami.
3. : (mandodingkon) “O Tuhan maidop ma uhurMu”
4. : Ham Tuhan, domma isopotkon hanami ganup dousa ampa hahurangan nami. Tongon lang adong sipujion humbannami janah talup do hanami hona uhum-Mu anggo ibalasjibn Ham romban hubani parlahou nami in. Tapi na mangelek ma hanami huBamu, ulang ma padingat-dingat ham ganup hahurangan nami in, marpanganju ma Ham hubannami pardousa on. Namin, matoras ma haporsayaon nami romban hubani na dob 120 tahun hata-Mu ondos i tongah-tongah nami. Lang be siidangan tapi gabe sipangidangi ma, lang be siarahkonon tapi sipangarah ma, lang be siajar-ajaran tapi sipambobai ma. Ham ale Tuhan, holong ma Ham bannami pardousa on.
5. : (mandodingkon) “O Tuhan maidop ma uhurMu”
6. : Tangar hita ma hatani Naibata, bagah-bagah pasal hasapanni dousa: “Songon sintong ni manggoluh Ahu nini Tuhan Jahowa:  Sabonarni seng marosuh uhur-Hu mangidah hamateion ni parjahat, tapi ase mulak do parjahat in manadingkon dalanni, ase manggoluh ia”. Hasangapon ma bani Naibata i babou!
7. : Amen

4. MANDODING HAL NO. 299:1-2
   Domma i hopkop Tuhanku tonduyhu

ase maluah tonduyhu tongtong

Domma isasap Tuhanku dousangku

ase manggoluh tonduyhu tongtong

Malas uhurhu megah uhurhu

lao pasangapkon Tuhan bai goluhkon.

Nai ma hapeni holongni atei Ni

hita pe patut marholong tongtong

2. 
   Domma ipilih Tuhanta ge hita,

lao manaksihon holongni tongtong.

Domma isuruh Tuhanta ge hita,

lao mangkatahon Hata-Ni tongtong.

Laho ma hita misir ma hita,

mangambilankon Tuhan parholong in.

Ase maluah homa hasomanta,

gabe manggoluh bai Tuhanta in.

5. TONGGO TARIMA KASIH/ BORAS TENGER
6. : 120 tahun na salpu, das ma Pdt August Theis hu tanoh Simalungun, ipungkah ma horja pangidangion marhitei pangajarion pasal kesehatan, parjumaon pakon pendidikan. Marhiteihonni in lambin buha ma panonggorni ompung ta na hinan laho mangidah hamajuonni pargoluhan on. Irik iambilankon ma podah hagoluhan, in ma hatani Naibata na pansing janah lang marsining. Marhorja ma Hata hagoluhan in manondangi hauhuronta halak Simalungun na ijia. Maol do dalan siboluson, tapi marhitei gogoh ampa panramotionni Tuhan in, tarpasaud do ganup sura-sura na madear i tanoh Simalungun.

MJ1.  : Dob piga dokah marbuah ma tongon Hata in i tongah-tongahni bangsa Simalungun. Tubuh ma uhur na iojur Tonduy in bani piga-piga halak Simalungun: Jaulung Wismar Saragih, A. Wilmar Saragih, Kerpanius Purba pakon hasomanni sidea. On ma mungkah ni parbangkitni bangsa Simalungun marhitei kuasani Injil. Tubuh ma ahap parsaninaon ibagas Tuhan in. Jongjong ma Tumpuan “Kongsi Laita” na marhorja secara sukarela mangarahkon hasoman hun huta na daoh ase mananda Kristus. Tubuh ma homa badan Parguru Saksi ni Kristus, na mamingkirhon media i tongah-tongahni halak Kristen Simalungun marhitei buku renungan, Doding Haleluya ampa Bibel Simalungun.

MJ2.  : Sonin ma marnunut torus – mambahen lambin talar ma hamerdekaon i Simalungun marhitei kuasani Naibata.  Bani tahun 1963 manjae ma kuria Simalungun lanjar ijin ma mamungkah isobut Gereja Kristen Protestan Simalungun (GKPS). Hunjin nari, lambin manggar-gar janah lambin buei ma tubuh GKPS luar hun Simalungun. Buei do hamaholon manapaki ganjangni pardalanan in; pitah marhitei kuasa ampa panramotionni Tuhan parholong in do ase lambin magodang janah marbanggal kuriani GKPS on. Nuan tampei hubanta ma “ondos-ondos” na dob idalankon ompung ta na hinan. Patorsa hita ma  hauhuronta, patorsa hita ma dirinta, patorsa hita ma garejanta GKPS.

1. : I babou ni ganupan in, talup ma hita pataridahkon goluh sipartarima kasih marhitei parsahap, pangabak ampa haringgasonta bani horjani Tuhan in. Domma ihopkop Tuhan in goluhta janah ipatotap do hita gabe panean bani harajaon-Ni i surga paratas in. Nuan iontang do hita gabe parsimada bani pestani Tuhanta: “Jubileum 120 tahun” i kurianta on. Boan ham ma tumpak pesta malasni uhur, ondoskon hita ma in tanda ni parsimada do hita bani rumahni Naibatanta.

6. MANDODING: BORAS TENGER (mangondoskon amplop Boras Tenger)

Pasu-pasu Mu o Tuhan
Buei do hubannami
Usih bai hayu na marbulung
Marbuah na ramos do

Goluh nami pe jorgit do
Sonai ge tonduy nami
On ma na gabe hitei nami
Lao manjumpahkon Ham

Andon ma siluah nami o Tuhan
Surduk do ibaen hanami hu Bamu
Boras tenger tanda ni dihut do hanami
Bani pesta malas ni uhur
Boras tenger tanda ni dihut do hanami

parsimada bani pesta-Mu

7. HATA HAPORSAYAON
8. ACARA KHUSUS

1) Mambasa/ Manaksihon Tonah Jubileum Kuria

2) Koor/ Pujian

3) Tingting Kuria

4) Kanon Olob-olob

5) Tonggo Pangapition

9. MANDODING HAL NO. 488:1-2
10. Pesta bolon marpariama, ganup hasoman parjuma in

In ma da na ringgas marhorja manuan omei i juma in

Sai marmegah mangolopkon, Goran-Ni Tuhanta in

Parsimada bai hagoluhan, idop ni uhur tumang do in

2. 
   Pesta bolon marpariama, na mangirikhon Tuhanta in

In mada na ringgas marhorja, mangambilankon hata-Ni in

Sai marmegah mangolobkon, Goran-Ni Tuhanta in

Parsimada bai haluahon idop ni uhur tumang do in.

10. AMBILAN :
11. PATUMPU GALANGAN
12. : Sonari sihol ma hita padaskon tarimakasihta marhitei na patumpuhon galangan tanda tarimakasihta bani holong ampa panghopkoponni Tuhan in. Halani ai paima ipatumpu hita galanganta, tangar hita ma lobei hatani Naibata na gabe onjolan banta laho manggalang, aima na tarsurat bani Heber 13:16: “Mambahen na madear ampa na marsibere-bere, ulang ma halupahon nasiam ai, ai galangan na sonai iharosuhkon Naibata”. Sonari ondoskon hita ma galanganta!

P+K.  :  (mandodingkon) “Galangan”

Roh hita sonari hu lobeini Tuhanta

Laho manggalang, galangan malas uhur

Dear ondoskon ham bani malasni uhur

Martarima kasih hu lobei-lobeiNi

Ai pasu-pasuni buei tumang ijalo hita, ale…

Tong dingat ma hita, ganupan na dong banta

Ronsi goluhta, pasu-pasuNi Tuhan

Ai idopni uhurNi do manobus hita,

Bai hayu parsilang na gabe galangan

Sai dingat ma hita bani holongNi Tuhan in, ale…

Parsahap na pantun in do na gabe galanganta,

parlahou na talup sonai pangabak sipujion

Goluh na ondos in do galangan na maharga,

dear ma boan hita bai Tuhan Naibatanta!

On ma galangan nami, ondos ma Bamu

Rap ampakkon goluh nami, ondos ma Bamu 

12. TONGGO PANUTUP
13. : Riap ma hita jongjong! Ham ale Tuhan simada goluh nami. Isaksihon hanami do nuan banggal ni holong-Mu bannami ganup pagori ni kuria-Mu. Ibere ham do hajorgiton ronsi goluh na irungkup pasu-pasu. Tardalani hanami do goluh nami marhasoman idop ampa holong-Mu. Nuan domma 120 tahun Ambilan Namadear ondos bannami. Lambin talar do pangkorhonni Ambilan namadear in bannami kuria-Mu.
14. : Gabe goluh siusihan marhitei hasadaon pakon pangidangion na marbuah – in ma na talup pataridahon nami tandani na dob ondos 120 tahun Hata-Mu i tongah-tongah nami. Tongtong ibagas malasni uhur pataridahkon goluh na dob manjalo pasu-pasu lanjar gabe pasu-pasu ma homa hanami bani hasoman nami tandani na dob matoras haporsayaon nami.
15. : Martarima kasih do hanami Tuhan bani pasu-pasu na lang ongga marnarotap hubannami ganup ari. Isarihon janah ibohali Ham do hanami mandompakkon goluh on. Nuan igalangkon hanami do sibere-bere-Mu in na gabe tandani malas ni uhur janah hatarimakasihonnami hu Bamu. Tongon, lang habilangan buei ni pasu-pasu-Mu marimbang sibere-berenami on. Jalo Ham ma Tuhan galangannami on baen hatotorsa ni horja pangidangion i rumah-Mu.

P+K.    : (mandodingkon) Galangan (Reff)

On ma galangan nami, ondos ma Bamu

Rap ampakkon goluh nami, ondos ma Bamu

1. : Pasu-pasu Ham ma hanami ale Tuhan marhitei goluh nami, ase lambin talar harajaon-Mu i tanoh on. Pakei Ham ma hanami gabe tangan-Mu laho manghobaskon horja pararatkon harajaon-Mu.
   “Ham Bapanami na i nagori atas. Sai napapansing ma goran-Mu! Sai roh ma harajaon-Mu. Sai saud ma harosuh ni uhur-Mu i nagori tongah on songon na i nagoni atas! Bere Ham ma bannami sadari on hagoluhan ari-ari. Sasap Ham ma dousanami songon panasap nami bani dousa ni hasoman na mardousa dompak hanami! Ulang hanami bobai Ham hu parlajouan! Paluah Ham ma hanami hun bani pangagou!”

P+K.    : (mandodingkon) “Ai Ham do simada harajaon, pakon hagogohon, ampa hasangapon, sadokahni-dokahni. Amen

1. : Jalo ham (hita) ma pasu-pasu na humbani Tuhan Naibata: “Ipasu-pasu anjaha iparorot Tuhan Naibata ma ham (hita). Isondangkon Tuhan Naibata ma bohi-Ni hu bamu (hu banta) janah maidop ma uhur-Ni mangidah ham (hita). Idompakkon Tuhan Naibata ma bohi-Ni hu bamu (hu banta) janah ipasorap ma damei-Ni bani tonduymu (tonduyta bei). Amen

P+K.    : (mandodingkon) Amen – amen – amen

POSTLUDIUM

P+K.    : (mandodingkon) Hal No. 411:1 (Marsalam-salaman)

Diatei tupa ma bamu Ham Naibata, mambaen tupa humpulannami on
Igomgom Ham do horja nami on torsa, gok malas uhur do hanai ijon
Ibere Ham do damei na tarsulur, sanggah manranggi horja haganup
Nuan hanami rap marmalas uhur,  mardingat haganup pambaenan-Mu