RENUNGAN LANSIA 18 OKTOBER 2026

RENUNGAN LANSIA GKPS

18 Oktober 2026 (20 Dob Trinitatis)

Nas : Pangungkabon 22:1-17

Tema : Tuhan menyediakan hidup yang tak pernah berakhir

Tujuan : Agar kaum Lansia mengetahui bahwa pintu menuju janji Tuhan yang penuh kemuliaan adalah kepribadian yang selalu bersandar kepada Tuhan

Parlobeini:

Buku pangungkabon on na itulisni apostel Yohannes sanggah tarbuang ia hu pulau Patmos halani manaksihon Jesus Kristus na gabe Sipaluah bani dunia on. Tantangan bani panorang ai, sekitar tahun 80 M, ija sada Kaisar na markuasa aima Kaisar Domitianus, sihol uhur ni isombah gabe dewa atap gabe Tuhan. Pargoluhan ni halak na porsaya ibahas pangayak-ayakon atap sitaronon banggal. Tapi bani kondisi na sonai pe Tuhan totap do mangkasomani halak na porsaya, lang ongga hape itadikkon hita bani pargoluhan on. Halani ai do ipatotap do hata Ni hubani juak-juak ni si Johannes, manrhitei pangungkabon (pangidahan) pasal aha na sihol masa bani panorang na laho roh (parusia) pasal ari simagira atap akhir zaman. Ipasirsir Tuhan do hagoluhan na sadokahni dokahni bani halak na totap satia janah porsaya.

Hatorangan

Ase lambin tangkas pangarusionta teks ni bahan PA ta on boi ibagi hita marhitei 4 bagian banggal:

Naibata pataridahkon kuasa ni itongah-tongahni haparngiton na idompakkon halak na porsaya (ayat 1-5)

Dob ai ipatuduhkon ma hu bangku:

sada bah banggal hagoluhan, lihou songon kasa, na luar humbani paratas ni Naibata pakon Anak ni biribiri in.
I tongah-tongah ni alaman ni huta ai pakon angkup topi ni bah ai, dong do hayu hagoluhan, na marbuah sapuluh dua hali satahun, na mamberehon buah siap bulan; ia bulung ni hayu ai gabe hamalumon do ai bani bangsa-bangsa.
Seng bedong na hona bura ijai.
Paratas ni Naibata pakon Anak ni biribiri in do jongjong ijai, anjaha juakjuak-Ni marugas Bani. Idahon ni sidea ma bohi-Ni, anjaha goran-Ni tarsurat bani pardompakan ni sidea.
Seng masa be ijai borngin, seng porlu be bani sidea sondang ni suluh atap sondang ni mata ni ari, ai sondangan ni Tuhan Naibata ma sidea, anjaha manrajai ma sidea ronsi sadokah ni dokahni.
Sipaingat Parujungan. Pangidahan on manggambarhon pohon eden na itompa Naibata sanggah panompaon on, sonai ma jengesni ianan ni jolma paima madabuh hu bagas dosa. Sonari gambaran on ipataridahkon use pasal parrohni Anak-ni Biri-Biri (Jesus Kristus) na gabe raja anjaha Panguhum bani dunia on. Ia roh bani paratas hamuliaon, adong bah hagoluhan na lihou pataridahkon harajaon hapansingon gabe pohon eden na baru, adong hayu hagoluhan na marbuah siap bulan, janah bulungni gabe tambar na mambere hamalumon. Lang adong be ijai bura-bura (kutuk). Tapi hata pasu-pasu na totap pamalas uhur ni halak na porsaya. Itompa Naibata mataniari, janah ibahen jolma suluh laho manorangi ibagas na golap. Hal on pataridahkon bahasa marmusim, marpanorang do hape na I tanoh on, adong golap janah adong siang. lang adong na totap ai, tapi Sondang ni Tuhan ma na manorangi sidea sadokahni dokahni, na totap mamasu-masu janah pamals uhur ni halak na porsaya.

Hata ni Naibata patotapkon uhur ni halak na porsaya: “hatengeran ni uhur anjaha sintong. (ayat 6-8)

Bahat do jolma sangsi pasal kuasa ni hata ni Tuhan bani goluhni. Johannes manaksihon bahasa dohor ma ariniTuhan. Jadi halak na manramotkon ai bani goluhni jumpahan hatuahon. Sonaha do sikap ni Johannes ijin ia mambogei hata ni Naibata na ipadas ni malekat ai

Ahu, si Johannes, do na mambogei anjaha na mangidah na masa in. Jadi dob hubogei anjaha huidah, manrogop ma ahu anjaha marsombah hu lobei ni nahei ni malekat, na patuduhkon ai hu bangku.

Sonaha do balosni Malekat ai bani Johannes sebagai hasoman juak-juak? (ayat 8-12)

Jadi nini ma dompak ahu, “Ulang sonai! Ai hasomanmu juakjuak do ahu anjaha hasoman juakjuak ni saninamu, nabi-nabi ai, ampa na manramotkon hata ni buku on. Naibata ma sombah!”

Dob ai nini ma dompak ahu, “Ulang ma lak hata panjahaion ni buku on! Ai dohor ma panorangni.” Halak sihorjahon hajahaton inunut ma mambahen na jahat, anjaha halak na butak lambin mambutaki dirini; tapi halak parpintor mangkorjahon hapintoran, anjaha halak na pansing papansing dirini

Hatotapan ni padan ni Tuhan bani goluhta

Ra do halani borat ni sitaronon ni goluh boi do raguatap sangsi hita bani padan ni Tuhan. Ia do bona ni pakon ujung ni na simada kuasa bani dunia on ronsi ujung ni magira. Halani air a do lang tahan hita mandompakkon haganupan ai, ra do bulisah, mandolei, bahkan surut hita humbani haporsayaonta. Tapi jaminan na patotapkon uhurta isobut marhitei teks ta on: “Tonggor ma, podas do Ahu roh! Huboan do upah, laho mambalas hubani ganup halak romban hubani na hinorjahonni bei. Ahu do Alpa pakon Omega, Na Parlobei pakon Na Parpudi, Bonani pakon Ujungni.

Martuah ma sagala na mamburihi hiouni, hata hiou aima bahasa alinan sonaha do totap hita manjaga uhur pakon pingkiranta, parsahap age pangabakta ase totap tikpak ilobei ni Tuhan. Ai do hape na jumpahan hatuahon bani ujungni. Halak na sonon gabe marhak sidea marrupei bani hayu hagoluhan ai, anjaha boi masuk hun horbangan ai hubagas huta ai. Janah ipatorang do paboa adong do oma na lang boi marhak masuk aima: i darat ma anggo baliang pakon sipartabas pakon parbangkis pakon pamunuh pakon parnaibata na legan ampa sagala na mangkarosuhkon anjaha na mangkorjahon ladung. Anggo itulimati hita teks on, jangin tumang ma hape anggo das na dihut do hita bani hulanan na masambor on. Halani ai paareksa hita ma uhur, pikiran parsahap pakon horjanta sihorjahon hata ni Tuhan do ham na manjaga totap hapansingon ni goluh atap na masambor ai do lalap manrahut pargoluhanta sadokahni on. Ulang das jumpah panorangni roh konsi Jesus paduahalihon ai totap pe ham bai habutakon. Ihatahon Jesus do: “Ahu, Jesus, marsuruh malekat-Ku bani nasiam, manaksihon on bani kuria in. Ahu do Urat pakon Marga ni si Daud, Bintang buha siang, na marsinalsal in. Jadi ihatahon Tonduy pakon tunangan ai ma, “Roh ma Ham!” Anjaha na mambogei ai pe ihatahon ma, “Roh ma Ham! Barang ise na horahan, roh ma; na marhasihol, ijalo ma bah hagoluhan in seng pala marpamboli.” Idopni uhur ni Tuhan domma ijalo hita secara gratis lang pala marpamboli, domma ipaluah ham marhitei daroh ni Jesus na dob madurus mangkopkop hita. Ulang das lang ihargahon hita ai, halani ai sonari ma panorangni ulang sompat salpu ari paridopan ai. Ibagas Jesus haganup “horah” na idompakkon hita I dunia on boi do sabou in ganupan. Ulang das taruyun, magou hita bani ulah na lang tama. Totap ma hita manggoluh romban hubani hata ni Tuhan.

Bahan Perenungan pakon diskusi:

Aha do tantangan na tarborat bani goluhta panorang on? Ongga do ham mandolei janah mandaoh humbani Tuhan halani tantangan ai?
Pori pe ibere Tuhan ham jabatan, halobihon, kuasa, habayakon atap habetengon aha pe, ulang das gabe ipados hita dirinta pakon Naibata gabe uhur- uhurta bani hasoman. Marlajar ma hita bani balosni malekat ai. Halani roh Johannes marsombah hubani. Balosni ulang sonai, hasoman juak juak do ahu. Sada malekat na itompa Naibata lobihan humbani jolma lang gabe ipagijang dirini ilobeini jolma. Artini ai Anggo ibere Tuhan bamu halobihan lang homa ai hiteimu mambahen dirimu gabe Tuhan bani halak na legan. Ingat ham maningon gabe hasoman do hita bani halak na legan janah marsombah tunduk bani Naibata ibagas Kristus.
Anggo itulimati hita pardalann ni goluhta adong do pe nani goluh na idarat hata ni Tuhan naihorjahon hita panorang on? (igambahhon bani hulananni: anggo baliang pakon sipartabas pakon parbangkis pakon pamunuh pakon parnaibata na legan ampa sagala na mangkarosuhkon anjaha na mangkorjahon ladung). Tadingkon hita ma on halani lang parrupei ham bani hagoluhan sisadokahni dokahni.
Tenger ma uhurta Naibata do bona ni pakon ujungni pardalan ni goluhta Lang ipaturut hita mardalan sahalak hita tumang, ihasomani do hita ganup ari asal ma totap hita ibagas hataNi. Domma ipasirsir Tuhanbanta hagoluhan nasadokahni dokahni. AMEN.