Renungan Mingguan Seksi Bapa GKPS, Minggu 01 Juni 2025 (Exaudi)
Nas : Kolose 3:19
Usul Doding : Haleluya No. 348:1-3
Tema : Membangun Keluarga Harmonis dan Bahagia
Tujuan : Agar kaum bapa mengerti rancangan Tuhan bagi keluarga Kristen, yaitu kebahagiaan dan keharmonisan.
“Cinta yang Tangguh, Bukan Kasar”
Hita haganupan bapa na hinaholongan ibagas Kristus,
Gabe pargotong bani inang sonai homa bapa bani niombah aima sada tugas na sangap sekaligus gabe tanggung jawab na borat. Bani hagoluhan na lambin individualistis sondahan on, buei do bapa na lupa bani hakikat ni parrumahtanggaon songon na sinurahon ni Kristus. Bani ayat renunganta on, Apostel Paulus patangkaskon dua aspek utama goluh ni sahalak bapa/pargotong, aima mangkaholongi pakon lang kasar. On sedo sekedar sipasingat secara moral hubani hita bapa, tapi on secara prinsip teologis aima manggambarhon hubungan ni Kristus pakon kuria-Ni.
Goluh parrumahtanggaon sedo pitah sekedar kontrak sosial, tapi sada parpadanan na pansing i lobei ni Naibata. Sahalak bapa sedo pitah pansari, tapi pemimpin rohani do homa na maningon pataridahkon holong ni Kristus ibagas keluargani. Halani ai riap renungkon hita ma, sonaha ma caranta pataridahkon holong na sintong dompak sinrumahta? Sonaha ma hita mambangun keluarga na harmonis lang marhiteihon kekerasan ampa otoritas, tapi marhiteihon holong ampa halamlamon na humbani Tuhan? Buha hita ma hauhuronta bei manjalo hata ni Tuhan on, halani bapa na sintong sedo pitah gogoh mansari, tapi gogoh mangkaholongi do homa.
Panorang sondahan on, peran ni bapa lambin menantang, bapa ituntut gabe kepala rumahtangga, pencari nafkah, pelindung, sekaligus gabe pargotong na romantis na maningon dingat bani hari ulang tahun ni sinrumahni. Tapi nas renunganta on pasingatkon sada parentah na sederhana tapi bagas: “haholongi nasiam ma parinangon nasiam, anjaha ulang kasar dompak sidea.” Hata “haholongi” bani bahasa Gorik mamakei hata “agape”, na mararti holong na tulus, tanpa syarat, janah gok pengorbanan. On sedo sekedar “holong” songon na bani drama Korea na gok kata-kata manis, tapi holong na taridah ibagas tindakan nyata. Sahalak bapa na mangkaholongi sinrumah sedo na mangkatahon kata-kata manis sanggah dong porluni tumang, tapi na sintong-sintong pataridahkon holongni bani ganup kegiatan ari-ari. Contohni: anggo roh ma sinrumah padaskon keluh kesahni, dear anjaha serius ma manangihon, ulang sambil sibuk manjolom handphone, sirsir mangurupi inang marhobas irumah, dingat bani hal-hal kecil na boi mambahen malas uhurni inang, misalni warna favorit, makanan kesukaan atap hari ulang tahun ni inang sinrumahni.
Na mangihut aima bagian na sipata mahol horjahonon aima “anjaha ulang kasar dompak sidea”. Na gati masa bani sahalak bapa sebagai kepala rumah tangga aima merasa berhak laho “pataridahkon kekuasaan”, halani ai gati do lang malo laho mengontrol emosi sonai homa ego. Hape parentah ni Tuhan aima mambobai keluarga ibagas holong, sedo gogohan sora. Perlakuan kasar sedo pitah marhiteihon kekerasan fisik, tapi sahap na paet/doit, sikap dingin, bahkan silent treatment (lang sirsir markomunikasi ibagas na dear) aipe dihut do mangkorhon na lang madear itongah-tongah ni rumah tangga. Kekasaran aima musuh utama keharmonisan ni rumah tangga. Mase porlu on secara teologis? Halani keluarga aima cerminan relasi ni Naibata pakon kuria. Anggo kasar ma bapa, gabe maseda ma bani pangidah ni inang pakon niombah pasal gambaran ni Naibata na gok holong ai. Sedo pitah mangugahi uhur ni sinrumah hita ijai, tapi dihut do homa parsedahon hasaksian ni haporsayaonta.
Anggo sonai aha ma sibahenonta laho mangkorjahon on bani goluhta ari-ari? Mangkaholongi mararti mamprioritaskon. I tongah-tongah ni kesibukanta i pangkorjanan, pangidangion sonai homa hobi, buei do bapa na magouan fokus bani pandiloon ni na tang siporlunan: aima gabe sijaga ampa siramotkon holong ibagas rumahni. Sungkun-sungkun hubanta: ibotoh inang sinrumahmu do bahasa ia aima prioritas utamamu dob honsi Tuhan? Ibere ham pe panorangmu laho manangihon cerita ampa keluh kesah ni inang sinrumahmu? Ongga pe ham mamuj ampa mampardiateihonsi ibagas holong?
Mungkin piga-piga bapa manganggap sadokah mamboat duit pe mulak hu rumah, domma sungkup ai, tapi holong na sintong lang singgan jai hansa. Tapi, domma nani merasa aman inang sinrumahmu secara emosional i lambungmu? Boi do ia tangis i lobeimu tanpa ihakimi ham? Boi pe ia mengeluh tanpa imarahi? Sasintongni mangkaholongi aima pasirsirhon keamanan emosional ma homa namin dompak inang sinrumah sonai homa dompak niombah.
Dob ai, mangkaholongi mararti ma homa ai manulak sagala bentuk kekerasan, termasuk ma “berlaku kasar”. On sedo pitah soal na manopar/mambogbog secara fisik hansa, tapi dihut do homa sahap na kasar, nada bicara na merendahkan, atap sikap acuh tak acuh na parsedahon semangat. Ra do gatian hita sabaran dompak hasomanta i pangkorjanan atap hasoman na legan marimbang dompak inang sinrumahta. Boi do jenges siromta dompak tetangga marimbang dompak pasanganta sandiri. Holong lang kasar, tapi holong aima paulihon na madear, sedo parsedahon.
Sonaha ma hita pasaudkon on bani goluhta? Sasintongni lang boi hita mangkaholongi anggo pitah marhitei gogohta sandiri do. Holong na sisonai ai boi pataridahonta bani goluhta anggo domma iahapkon hita janah iakuhon hita bahasa na sintong do hita ihaholongi Kristus, janah ibere hita Tonduy Napansing marhorja ibagas uhurta, anjaha manggoluh hita ibagas komitmen sirsir ibobai hata ni Tuhan.
Hal-hal praktis na sonaha ma na boi ihorjahon hita laho pataridahkon ai bani goluhta? Misalni, tiap ari riap martonggo pakon inang sinrumah, mambere kata-kata pujian hubani, ulang hemat bani hata-hata na madear, minta maaf ma anggo marsalah, halani na minta maaf on sedo tanda kelemahan, tapi tanda kedewasaan do, gabe pendengar yang baik, mangurupi horja i rumah, pakon na legan.
Nasiam bapa na hinaholongan ibagas Kristus, nas renunganta on sedo pitah saran atap ojur-ojur, tapi on aima parentah ampa pandiloon na pansing. Gabe pargotong/bapa sedo pitah soal gabe “pria sejati” tapi gabe gambar ni Kristus bani rumah tangga. Ase goki hita ma pandiloon ai marhitei na sirsir mangkaholongi ibagas pambahenan, lang pitah hata. Gabe pemimpin na lamlam/lembut bani rumah tangga, lang gabe penguasa na kasar. Na parpudi aima gabe sihorjahon, sijaga ampa siramotkon holong ma hita ibagas keluarga. Amen.
