TATA IBADAH NATAL SEKSI BAPA GKPS 2017

TEMA:
Ibohali Manghobaskon Horja na Madear. (2 Timoteus 3:17)

SUB TEMA:
“Ajari ma Kuria in gabe Sipangidangi Ibagas Hapentaron, Haporsayaon ampa Bulus ni Uhur ase Lambin Torsa Kuria in, Mangkorhon Hadoharon pakon Hadearon i tongah-tongah ni Gareja, Masyarakat ampa Negara (2 Petr. 1:5; Ef. 4: 13-15)

PERSIAPAN
Pengkotbah, Panitia mambahen persiapan kebaktian.
Pahatahon Giring giring/Lonceng Natal
Martonggo i konsistori na binobanhon ni Parambilan.

PROSESI + PAGARAHON LILIN (iiringi musik organ)

KEBAKTIAN

(Nab. = Naboru Gan. = Haganup Dal. = Dalahi)

Praeludium

Mandoding Haleluya No. 317: 1+3

Gan. : Martumpu ma hita malas ma uhurta,

Laho ma hita hu Betlehem.

Tonggor malekat mamuji Tuhanta,

Sai sombah puji Ia, sai sombah puji Ia,

Sai sombah puji Ia, Rajanta in.

……………….…… musik ……..……………

Nab. : Tuhanta na sangap tubuh i dunia,

Dal. : doskon songon hita jolma on.

Gan : Roh do Tuhanta, Sipaluah hita,

Dal. : Sai sombah puji Ia,

Nab. : sai sombah puji Ia,

Gan. : sai sombah puji Ia, Rajanta in.

2.Votum – Introitus – Tonggo

Mandoding:

P : Ibagas Goran ni Naibata Bapa, pakon Tuhan Jesus Kristus ampa Tonduy Napansing, Sitompa langit pakon tanoh on. Amen.

On ma ari na dob ibere Tuhan hubanta laho marmalas ni uhur. Halani ai Roh ma nasiam riap marmalas ni uhur ma hita, Puji Hita ma Tuhanta!

K : humbani ganup hosahta,

P : humbani gok ni uhurta,

Gan. : ampa humbani gok ni gogohta.

Gan. : (mandodingkon)

U…………. Sai hupuji Ham O Tuhan,

U…………. Sai hupuji Ham O Kristus.

P : Naibata totap do mangkaholongi hita. Seng marnarotap holong ni ateiNi.

K : Totap do iparmahani Biri-biri-Ni, tarlobih biri-biriNi na magou. Ipindahi Ia do, biri-biri na ibagas hasosakan janah naborit.

P : Tarimakasih ma hubani Naibata na totap mampardiateihon kuriaNi. Puji hita ma goranNi

Gan. : (mandodingkon)

U…………. Sai hupuji Ham O Tuhan,

U…………. Sai hupuji Ham O Kristus.

P : Martonggo ma hita!

Ham Tuhan Naibata Bapanami na marhabangsa i nagori atas, ipuji janah ipasangap hanami do Ham. Sirsir do Ham patoruhkon diri-Mu marhitei partubuh ni AnakMu Jesus Kristus ibagas hadoyukon, bai harang ni pinahan i Betlehem, ase gabe bayak hanami. Ajari Ham ma hanami marhitei TonduyMu Napansing in, ase lambin marbanggal hanami haganup ibagas panandaion bani holong ni ateiMu, na dob padomuhon hanami huBamu, mambahen gabe jumpahan haluahon hanami. Idop ma uhurMu, ipadas hanami tonggonami on ibagas Jesus Kristus, Hata na dob gabe daging janah marianan i tongah-tongahnami. Amen.

Mandoding Haleluya No. 315: 1-2

Sangap, sangap bani Jesus Tuhankin,

Na roh do Ham hun surga hun rumah-Mu.

Sangap, sangap bani parroh-Mu hu tanoh on,

Gabe doskon jolma Tuhan parholong in,

sangap, sangap.

……………….. musik ………………………..

Haganup parmahan jalo ma tongon,

barita malas uhur hun surga in.

Ai saborngin on do tubuh Tuhan Jesus in,

ai tibal do Ia bani palangka in,

sangap, sangap.

Liturgi I: Refleksi Panompaon
Tonggor ma …..

Poltak do mata ni ari bai sogod ni ari,

Ganup binatang na manjulur,

Sonai homa manuk manuk

Marmogah mogah do sidea bai sogod in

Namur matektek bai sogod ni ari

Jagiah ni in jadi-jadian ni Naibata.

Ampar do hajengeson in

Omei gorsing tokka ma sabion

Bahen panganon ni jolma.

Sonai homa age bah mardalan…

Manggoluh buei tumang masam ni ikan

Bahen panganonni jolma

Hatahononta do diatei tupa bai haganupan in

Mandoding Haleluya No. 468 : 1

Jenges ni in ganup na tinompa

na jinadihon ni Naibatanta i dunia on Ibahen marmusim panorang Milas, udan, ari marsuan, i dunia on

Jumpah hita do totap ari na baru

Bulan na baru, sonai age tahun margantih tahun

Ibotoh hita ma bahasa lambin magodang do haganup

Umur ni jolma…. sonin ma ibotoh hita mamilangi ari-ari in.

“Bah banggal” manjaliri sabah,

Buei tumang ihan, sonai homa harangan na maratah

Alogou na marombus, borgoh tumang

jorgit angkula …

Sonin ma talup hatahononta diatei tupa bai haganupan tinompa ni Tuhan in.

Mandoding Haleluya No. 399: 1-2

Tubuhon poyon-poyon, i tongah juma in,

manggargar manuk-manuk, bai parasaranniin.

Marbagei pakon ihan, ibagas laut in,

‘ge tinompa na legan, seng targorani in.

Ganupan iparmudu, Tuhanta Naibata,

lobihan iparmudu, ganupan hita da.

Sonai ge halayakon, ibere do homa,

talup hatahononta, diatei tupa ma.

Ibere do panondang mataniari in,

bulan ampakon bintang panondang borngin in.

Udan logou ni ari, pagantih soluk in,

sonin ma ganup tingki pajagar tanoh in.

Ganupan iparmudu Tuhanta Naibata,

lobihan iparmudu, ganupan hita da.

Sonai ‘ge halayakon ibere do homa,

talup hatahononta diatei tupa ma.

Liturgi 2: Refleksi Pasal Hadosaon
Tuhan, Bapa nami ibagas Jesus Kristus,

Gati do hanami marondos hu Bamu

Ase ham na patorsahon goluhnami

HataMu ronsi aturanMu na idalankon hanami

Tapi Bai pargoluhannami siganup ari

Gati do hanami manlembang humbani dalan-Mu in,

Hisap-hisap ni dagingnami sandiri isuhuni hanami.

Marsahap do Ham bai panggora ni uhurnami

Tapi gati lang itangar hanami.

Dob ni goluhnami lang songon na isurahon Ham, Tuhan.

Bapa, sasap Ham ma dousanami.

Sihol do uhurnami ase Ham ma na manopa hanami

Domu hubani harosuh ni uhur-Mu.

Tapi Tuhan, mahol do dalanonnami in.

Lang marhasabaron hanami

Borit do pangahapnami sipata anggo mandalankon na madear

Halani bahat do tantangan mandalankon in.

Ajari Ham ma hanami Tuhan, ase songon hataMu na mangkatahon :

“Martuah ma halak na manangar hata ni Naibata anjaha na marimbagashonsi.”

Dapotan malas ni uhur ma tongon hanami Tuhan bani na mandalankon rosuh ni uhur-Mu

Songon panopa pisou,

Dob honsi itutung bosi ai, ipogpog

Dob ai itutung use, dob ai ipogpogi ase gabe pisou sipakeion

Sonai ma hasabaronnami Tuhan

Mandompakhon goluh on marhasabaron ase lambin roh dear ni pargoluhannami.

Janah marguna gabe maharga i lobei-lobeiMu

Bapa, tolong Ham ma hanami Tuhan

Ase anggo adong pe na koras paruhurannami,

Marondos hanami Bamu Tuhan,

Ase Ham ma na manopa hanami

Ase songon na hinarosuhkon Mu pargoluhannami

Bapa, Tuhannami bahen Ham ma hanami sipambalosi bani hata-Mu

Janah tarbuka pingkirannami age haporsayaonnami pitah mambalosi Ham.

Ajari Ham ma hanami ase ra martoruh ni uhur hu-Bamu

Na ra marlajar, na ra manangihon ronsi mangkorjahon hata-Mu,

Age pe domma sompat maseda Tuhan, ra do hanami topaon-Mu use.

Mandoding Haleluya No. 44: 1-3

Pamalas uhurta do partubuh ni.

Jesus Sipaluah haholongankin.

Ai buei do dousa parlajouan pe,

Manunsahi hita ronsi matei bei,

manunsahi hita ronsi matei bei.

Maparah tumang do hamagouan in,

Anggo lang roh Jesus Sipaluah in,

anggo lang roh Jesus Sipaluah in.

Liturgi 3: Bagah-bagah pasal Partubuh ni Sipaluah

Jesaya 40:1-2 Apohi, apohi hanima ma bangsangku! nini Naibata nasiam. Hatahon hanima ma ibagas halamlamon bani Jerusalem, anjaha dilohon ma hubani, paboa marpunsa ma parjabolonan bani, domma isasap salahni, domma ijalo humbani tangan ni Jahowa lompit dua gantih ni ganup dousani.

Jesaya 40 :3 Sora na dilo-dilo: Pasirsir dalan ni Jahowa i halimisan, bahen pintor dalan na bolon bani Naibatanta i tanoh dorging-dorging!

Jesaya 40:4 Ganup lombang pagijangon do, anjaha patoruhon ganup dolog ampa buntu-buntu; tanoh na marholbung-holbung padosdoson do, anjaha gabe pamah dolog batu.

Mika 5:1 Tapi anggo ho, ale Betlehem Efrata, age pe etek ho i tongah-tongah ni marga Juda, humbam do roh bangku na gabe panggomgomi bani Israel, anjaha harorohanni humbani na hinan, humbani ari na basaia.

Sakaria 9:9 Marmalas ni uhur tumang ma ho, ale boru Sion, marolob-olob ma ho, ale boru Jerusalem! Tonggor ma, na roh do Rajamin marayak ho; parpintor anjaha siparmonang do Ia. Toruh do uhurni anjaha mangajak halode, anak ni halode boru-boru.

Mandoding Haleluya No. 41: 1+3

Domma jumpah use ari pesta in partubuhon ni Tuhanta Jesus in;

Turun hape Ia roh hun surga in, roh manohu hujon.

Hasangapon bai Naibata, damei-damei bani jolma.

Megah uhur ni Naibata hajolmaon use.

Sombahnami hu Bamu na dob roh on, Ham siboan damei hu dunia on;

Sai pasorap Ham bai uhurnami on, dameiMu, o Jesus!

Hasangapon bai Naibata, damei-damei bani jolma.

Megah uhur ni Naibata hajolmaon use.

Liturgi 4: Refleksi “Holong Ni Naibata na Layak Mambere”
Tuhan, Naibatanami,

Buei do sibere-bere-Mu bani jolma manisia.

Tapi, adong do sibere bere-Mu na tang sibanggalan

humbani sibanggalan pambere-Mu hubannami,

Ibere Ham do Anak-Mu halani holong-Mu bannami haganupan jolma.

Ibere Ham do Anak-Mu Jesus Kristus gabe Sipaluah bannami,

Ase porsaya hanami hu-Bani Anak-Mu

Ase dapotan hagoluhan hanami,

Janah manggoluh ibagas na sasintongni

Songon goluh ni Kristus Jesus i dunia on

Tuhan,

Diatei tupa ma bani sibere-bere-Mu in

Sibere-bere na pagoluhkon hanami,

Na mambahen lambin iarusi hanami pasal hagoluhan na sintong.

TUHAN, Naibatanami,

Na lang mahol tumang tandaonnami.

Nuan domma ipatandahon Ham diri-Mu lambin tangkas

Marhitei Jesus Kristus Tuhannami.

Ia do na dob manobus hanami

Na mabere goluh na bayu,

Ase adong na gabe sijolomonnami ganup ari

Tuhan tarimakasih ma Bamu. Amen.

Kristus, TUHAN,

Ham do na Roh hu Dunia on,

Ham do namanopot hanami.

Kristus, Tuhan

Roh do Ham humbani hasangapon-Mu

Roh hu dunia on bai hadoyukonnami.

Roh do Ham Tuhan mambere tanganMu lao manogu hanami.

Laho padameihon hanami pakon Naibata,

Padameihon hanami samah hanami.

Kristus,TUHAN Roh do HAM manohu hanami

Ase roh hanami huBamu.

Mandoding Haleluya No. 39: 1-2

Sonang ni bornginni in, sanggah roh Jesus in;

Sonang modom do halak ganup,

dua mando na puho in rup.

Mangoromi AnakNi, Jesus Tuhanta in.

Dear ni bornginni in, sanggah roh Jesus in.

Bai parmahan i Betlehem in,

ipatugah na hun surga in;

Domma roh Sipagoluh, Jesus, Tuhanta in.

Liturgi 5: Refleksi Natal
Kristus, TUHAN,

Sai isondangkon Ham do sondang-Mu in

tapi sai mardalan bai na golap do hanami

maidop ma Ham bannami Tuhan, sasap Ham ma dousanami.

Tuhan, sai ipindahi hanami do panondang in

Tapi hotop do hagolapan in monang bai hadirionnami

Sasap Ham ma dousanami

Tuhan, dihut do hanami tarsonggot bani barita ni malekat in,

Tapi ra do sipata pingkiran age panlangkahnami bai na jahat.

Sasap Ham ma dousanami.

Iakui hanami do damei ni Natal bani panorang on,

Tapi gati do hanami lang mangindahi dalan hadameion na hunBamu.

Sasap Ham ma dousanami.

Tuhan, bai panorang Natal on sai Ham ma pabayuhon goluhnami

ase marhasongan hanami kuria-Mu janah manggoluh ibagas habayuon na humBamu.

Tuhan, holong ma Ham bannami,

maidop ma uhur-Mu age hubani hasomannami na ibagas naborit

age bani hasomannami na marpusok ni uhur bani panorang natal on

lungun janah tariluh sidea Tuhan, sai apohi Ham ma sidea.

Tuhan, maidop ma Ham bani hasomannami

na ibagas sitaronon nuan, halani parmaraan ampa musibah

holong ma Ham Tuhan…

mangarap do sidea marmalas ni uhur bai panorang natal on

tapi madotei do pangahap ni sidea,

urupi Ham ma sidea Tuhan. Pargogohi Ham ma sidea.

Tuhan bai borngin na mapansing on

janah borngin na gok ibagas damei on

ulang paturut Ham sidea tangis tariluh

Tuhan, sai Ham ma na manramotkon

sidea na loheian ibagas borngin on. Ase gok damei sidea.

Ramothon Ham ma sidea Tuhan ase dihut sidea mangalo-alo Anak-Mu in

Mandoding Haleluya No. 313: 1-3

Dal. : Humbai pulou ‘ge banua sai tarbogei do torus.

Doding na mamuji Tuhan Sipanobus jolma in.

Gan. : Gloria, puji ma Tuhanta.

Gloria, puji ma Tuhanta.

Nab. : Haganupan na i surga pasangapkon Naibata.

Rap mandoding do sidea i lobei ni Naibata.

Gan. : Gloria, puji ma Tuhanta.

Gloria, puji ma Tuhanta.

Gan. : Soridadu ni Tuhanta hormat bani Naibata.

Haganup puji-pujian ondos bani Naibata.

Gloria, puji ma Tuhanta.

Renungan Natal

Mandoding Haleluya No. 314: 1-2 (irik patumpuhon galangan)

Doding ni malekat in, pasangapkon Tuhan in.

Na mambere hasonangan, Raja na dob tubuh in.

Haganupan bangsa-bangsa, sai mamuji bani Tuhan,

Jesus na hun surga in tubuh i Betlehem in,

Doding ni malekat in pasangapkon Tuhan in.

Ganup na i surga in, sai manombah Tuhan in.

Tuhan Jesus jadi jolma, roh bai hajolmaon in.

Lao mamboban haluahon, ganup dousa isalpuhon.

GoranNiin Immanuel, rapkon hita Tuhan in.

Doding ni malekat in, pasangapkon Tuhan in.

Tonggo Galangan – Tonggo Panutup – Tonggo Riap – Pasu-pasu
P. Kuria ni Tuhanta, riap ma hita mangondoskon galanganta hubani Tuhan Naibata. Martonggo ma hita:

Ham Tuhan Naibata Bapanami, diatei tupa ma Bamu halani domma roh Ham paluahkon hanami. Nuan Tuhan igalangkon hanami do hadirionnami, ampa hinadongannami, sai manumpaki ma ham, ase lambin rarat hataMu i tongah tongah ni kuriaMu i sab dunia on. Sai pasada Ham ma Kuria-Mu Tuhan.

K. Bere Ham ma dameiMu in, ase boi homa hanami mangidangi Ham marhitei pangidangionnami hubani haganup jolma janah ase gabe pasu-pasu hanami on haganupan.
Naibata ma haporusanmu arian pakon borngin, tangi ma bani hata ni Tuhanta, ai martuah do Ham anggo tanginan ham bani hata ni Naibata anjaha mangkorjahon ai. Ulang ma ham targoda bai hajengeson ni dunia on ai hamagouan do ujungni tapi tangi ma ham bani podah ni Tuhanta. Marhitei idop ni uhur-Ni ibagas Jesus Kristus maluah ma ham.
Riap ma hita mangkatahon tonggo na niajarhon ni Tuhan Jesus hubanta

P.K. Ham Bapa nami na i nagori atas ……. Amen.