PA LANSIA
Minggu, 07 Juni 2026 (1 Dob Trinitatis)
Nas : Psalm 71:9-18
Tema : Terus memberitakan karya Tuhan di Masa Tua
Tujuan : Agar kaum lansia mendapatkan penghiburan, kekuatan dari dorongan spiritual karena tetap percaya dan bergantung kepada Allah di setiap tahap kehidupan.
Doding : Haleluya 266:1-2
Mangambilankon Halongangan na Binahen ni Tuhan
Parlobeini
Psalm 71 on aima salah sada psalm na boi mandadap uhur, tarlobih hubani halak na dob lanjut usia. Marbeda pakon psalm na legan na manuratkon ise panuratni, bani psalm on lang isobut ise na manuratkon. Tapi buei penafsir na mangkatahon paboa psalm on aima isuratkon raja Daud bani panorang sanggah dob matua ia. Ijia Daud seng be sahalak kopala porang na poso ope janah barani tarlobih songon sanggah mandompakkon si Goliat ia. Seng be raja na gogoh ia na mambobai bangsa Isarel hu parporangan. Tapi ia domma gabe sahalak na matua na lambin roh galekni ma angkulani. Na mambaen pusok uhur, ia mandompakkon ancaman humbani keluargani sandiri. Anakni, si Adonia, sihol marusaha laho mandapotkon hotakni age lape panorangni. Songon si Absalom na hinan, si Adonia on mamakai hagalekon ni bapani na dob matua ai. Halani ai munsuh-munsuh ni Daud mangkatahon paboa na dob itadingkon Tuhan do ia (ay 11). Sidea ai mangkatahon paboa bani hatuaon ni si Daud ai gabe tanda paboa ia domma lang adong gunani be, janah lang be mandapot pangurupion humbani Tuhan. Hansi pe ibagas situasi na idohkon ia, Daud seng madabuh janah gunom bani pandoleian. Sobalikni, ia manuratkon hasaksian ni haporsayaon ni on na sonin jenges ni. Ai do ase psalm on sedo tangis-tangis sahalak na matua ibagas pandoleian, tapi gabe pangakuon sahalak juak-juakni Naibata do on na totap porsaya hubani Tuhan na satia das hubani ujung ni goluhni. Janah buei do parlajaran na maharga banta humbani nas on tarlobih hubani orangtua na mamasuki bod ni ari-ari goluhni.
Hatorangan
- Age lambin bois gogoh, Naibata totap gabe parlingodan
Daud martonggo, ulang ma ambukkon ham ahu, bani na lambin bois gogohku ulang ma tadingkon Ham ahu. Kalimat on tubuh humbani pengalaman na nyata. Daud mangahapkon gogoh bani angkulani lang be songon gogohni na hinan. Isadarini do paboa umur ai domma mambuat sebagian humbani gogoh ni ai, lang be hinsah, janah lang be songon na hinan boi ganup. On ma na ningon ijalo ganup jolma. Sanggah poso halak, ianggap do ia margogoh janah boi do ia manlangkah sahalaksi. Boi marhorja, marusaha, hinsah hujai hujon mangkorjahon bagei horja seng dong na mangambati. Tapi irik tambah umur, angkula pe mambere tanda-tanda paboa hita lang be sarupa songon na hinan. Buei do lansia na maruntol halani naborit, pangidah pe doma rambon, pardingat pe moru. Dong homa na mabiar halani gabe beban bani keluarga. Tapi Daud mangajari age sanggah moru pargogoh, tapi panramotion ni Naibata seng anjai moru. Pardiatei hita ma hata ni si Daud, ia sedo mangkatahon ‘gogoh ope ahu’ tapi isadari ni do paboa na dob lambin galek do ia, iakuhon do ai ilobei ni Naibata. Hunjon marlajar hita paboa haporsayaon na sintong sedo sipakulah-kulah songon na gogoh. Tapi haporsayaon na sintong aima mangakui hagalekonta janah porsaya bani hagogohon ni Naibata. Sadokah ni goluh Daud domma mangidah hasatiaon ni Tuhan. Iramoti Tuhan do ia sanggah na marmahan biri-biri. Ipamonang do ai sanggah mandompakkon si Goliat. Ihasomani Tuhan do ai sanggah na iayak-ayak si Saul. Ihasomani janah ipasu-pasu Tuhan do Ia sanggah mambobai bangsa Israel. Halani ai ma ase pos do uhur ni Daud paboa Tuhan na sarupa ai do na seng anjai manadingkon ia age sanggah dob matua ia.
Sonai ma homa hita halak na porsaya, lansia. Ra domma mubah angkulanta. Hatalupon ampa gogohta mangkorjahon horja pe doma moru. Buei ma na lang boi idalankon hita. Tapi Tuhan na manjolom tanganta sanggah poso hita ai do homa tangan na manjolom janah manatang hita bani panorang na dob matua hita. Anggo holong ni jolma boi do moru, marubah halani domma moru hajengeson ni saparangguan halani lambin matua ai. Tapi anggo holong ni Tuhan seng anjai marna matua. Gogoh ni Tuhan seng anjai lambin roh galekni. Janah hasatiaonNi seng anjai maronti.
- Sanggah lang iparnalang hasoman hita, Naibata totap do mambere pangarapan.
Daud manghatahon, ipahata-hata munsuh ni ia, iuhurhon hosahni. Iidah munsuh-munsuh ni si Daud hasunsahanni si Daud janah langsung do sidea mangkatahon paboa Tuhan domma manadingkonsi, seng be ihasomani ia. Hunjon ididah hita, paboa cara pikir duniawi sonai ma, age das bani panorang nuan on. Buei do halak mangukur keberhasilan ai marhitei hagogohon ni angkula, habayakon, jabatan, atau hasil na idapot. Sanggah domma matua sahalak ai, borit-boritan, lang be aktif, gati do ianggap simbuei paboa panorang hatuahonni domma salpu. Hape Naibata seng sonai pangidahni hubani jolma in. Bani panonggor ni Naibata, nilai ni sasahalak ai sedo itontuhon marhitei umur ampa aha na boi ihorjahonni, tapi sonaha do hubungan ni hubani Naibata. Halani ibagas hagalekon do Tuhan marhorja. Ibagas husunsahan ai do Tuhan hadir. Age sanggah ibagas hatuaon pe adong pe rencanani Tuhan ai. Ra, halak na porsaya in pe dihut do marpingkir paboa Tuhan domma manlupahon sidea. Tarlobih ma ai sanggah na lape ibalosi Tuhan tonggonta, naborit lang marna malum, lungunan janah lambin borat ma pangahapni. Psalm on laho paingatkon hita paboa sitaronon ampa paruntolon age sanggah ihatuaon ai sedo gabe alasan paboa lang hadir Tuhan bani goluhta. Marlajar hita humbai aha na ipataridahkon Jesus sanggah bani hayu parsilang Ia, irehei janah ihata do Ia, janah ianggap sidea paboa Jesus domma itadingkon Naibata. Hape justru halani hayu silang ai ma Naibata sanggah na marhorja laho mandalankon haluahon ni dunia on. Halani ai ulang ma iukur hita holong ni Tuhan ai marhitei keadaan ni goluhta. Kadang lang iarusi hita na sanggah marhorja do Tuhan bani pargoluhanta. Dearan ma lah hita porsaya janah marondos bani Tuhan. Naibata na dob mangkasomani bangsa n martaun-taun dokahni tontu lang mungkin dob matua bangsa ni ai itadingkon sidea halani hatuaonni sidea. Pangarapan ni halak na porsaya sedo marsigantung bani keadaan nab oi marubah-ubah tapi hubani Naibata lang ongga mubah ai do.
- Sanggah lambin lopak pe ubanni, misi ni goluh seng ope maronti
Age pe lambin lopak ubanku, Naibata, ulang ma tadingkon Ham ahu das hubani na hubaritahon gogohMu hubani ginompar na mangihut on. Luar biasa do hatani raja Daud on, legan do ia humbani halak simbuei. Ia seng mangindo umur na ganjang ampa sonang goluhni. Seng homa ipangindo hajorgiton ase boi lambin roh dokahni mandaihon goluh on. Lang homa ipangindo habayakon na marlobih-lobih. Na ipangindo ni aima panorang ase boi torus gabe saksi ni Naibata. Isadari Daud do paboa hatuaon ai sedo ujungni pangidangion. Tapi hatuaon ai aima panorang mamemehon haporsayaon. Halani ai sadokah marhosah ope, adong ope horja na ningon ihorjahon. Adong ope generasi na porlu manangar pasal hasatiaon ni Tuhan. Buei ope ginompar, pahompu, nini nono, na porlu mangidah haporsayaon siusihon. Buei ope halak na mamorluhon podah, mampargogohi hasoman ampa podah-podah partonduyon. Buei do halak na manganggap panorang pensiun aima ujungni marhorja janah lang be mambere hasil atap lang produktif. Tapi bani parsaoran bani harajaon ni Naibata lang adong istilah pensiun humbani pandiloonta gabe saksini Tuhan.
Sahalak lansia ra lang boi mandalankon horja pangidangion na borat. Tapi boi ope ia martonggo. Boi be mambere podah, mangajari, patoguhkon hasoman, ampa mambaritahon hasatiaon ni Tuhan. Gatinan do use, hasaksian ni lansia ai arganan do ai marimbang buei teori. Pengalaman puluhan taun mardalan rap pakon Tuhan gabe bukti na manggoluh paboa Tuhan sintong do satia. Iporluhon dunia on ope hasaksian na sonai ai. Porlu ope bani halak na poso ope, na lape lansia, hata na pindasni lansia na mangkatahon, domma mardalan au rap pakon Tuhan na saindokah, humbani haetekonku nari, tongon seng ongga Jesus ai mengecewahon bangku. Aima warisan haporsayaon na harga tumang bani generasi nuan pakon na sihol roh ope.
Pangujungi
Humbani psalm on hita marlajar paboa panorang hatuaon ai sedo hal na majangin, sedo lambin moru bani partonduyon, tapi aima panorang lambin mananda janah mambaritahon pasal pambahenan ampa hasatiaon ni Tuhan. Age sanggah lambin bois gogohta, Tuhan ma parlingodanta. Sanggah ihatai halak pe hita, Tuhan ma pangarapanta. Lambin lopak pe ubanta, lang ope maronti horjanta. Halani ulang mabiar mandompakkon hatuaon ai. Angkula boi do lambin galek, langkahta lambin nanget, jambulan lambin lopakni, tapi haporsayaon lang boi luntur, pudar, Das hubani na bois hosahta, ujungni goluhta, paturut hita ma goluhta on ipakei Tuhan laho marsaksi pasal Tuhann a totap satia sanggah poso hita das hubani na matua. Halani Ia do bonani janah ujungni pargoluhanta. Tarpuji ma Tuhan simada hita. Amen.
About the Author
