Bahan Renungan PA Bapa, XV DOB TRINITATIS, 17 September 2023
Nats : Yehezkiel 34:17-31
Usul Doding : Haleluya No. 102:1-3
Tema : Kita adalah Umat Allah
Tujuan : Agar kaum bapa semakin menyadari sebagai umat Allah, Ia senantiasa memelihara kehidupannya
BANGSA NA PORSAYA BANI NAIBATA, MALUAH DO
Horas hubani nasiam bapa GKPS nahinaholongan ni Tuhan Jesus Kristus. Tarpuji ma Tuhan na mambere panorang banta na laho manjalo Ambilan na madear in. Ambilan na sihol jaloonta bani panorang on aima nalaho mangidah pasal Naibata na pataridahkon holongNi hubani bangsa Israel. Bani buku Hesekiel on adong dua gambaran na ipataridahkon Naibata pasal holongNi hubani bangsa ai. Na parlobei, holong ai ipataridahkon Naibata marhitei na ipaturut Naibata bangsa ai talu hunbani bangsa Babel. Tontu lang halani lang margogoh Naibata laho pamonangkon sidea, tapi tujuan Naibata aima ase bangsa ai na rosuh mangkorjahon hasamboron gabe sadar pasal goluhni sidea na domma daoh humbani harosuhni Tuhan. Boi do ai ibasa hita sonaha parlahou ni bangsa on bani Hesekiel 33:21-29. Na paduahon, age ibagas hasunsahan bangsa ai halani ibagas habuangan halani talu humbani bangsa Babel, seng ipaturut Naibata sidea, gariada gabe manringis do homa Naibata hubani bangsa Babel halani ipatoruh sidea homa Naibata, seolah halani lang margogoh Naibatani bangsa ai ase talu sidea, janah bangsa ai pe gabe lang maharga ibahen sidea. Pasal on pe boi do ibasa hita bani Hesekiel bindu 34:1-16.
Bani nats na ibasa hita nokan, na gabe fokus banta aima pasal holong ni Naibata na paduahon ai. Lang marosuh Naibata bani bangsa Babel na pataridahkon ginjang ni uhur halani partaluni Israel. Maringis tumang Naibata hubani bangsa Babel ai mardingat, ulanglah mambere uhur sidea laho mambere pangurupion, gariada sipanganon, ianan sidea tading bahkan ianan mambuat minum pe iparseda. Naibata na isombah sideape dihut ipatoruh. Nini uhur ni sidea, anggo margogoh do Naibata na isombah bangsa Israel, mase boi talu sidea marporang? Mase ipaturut Naibata ni sidea madabuh hu habuangan? Intini ipatoruh bangsa Babel ma bangsa Israel ai janah seng margogoh Naibata na isombah sidea. Tapi lang ipaturut Naibata bangsa Israel manjalohon parlahou ni sidea na sisonai ai. Songon goranni si Hesekiel na mararti Naibata na mambere gogoh, sonai ma Naibata mangurupi ampa na mampargogohi bangsa Israel ase luar hun tanoh habuangan. Cara ni Naibata laho mangurupi bangsa Israel aima marhitei na mambere uhum bani bangsa Babel, janah ipabangkitNi do sada parmahan, ai ma juakjuak-Ni si Daud na laho mamimpin bangsa Israel. Tongon, marhitei haporsayaon hubani Naibata marhitei si Daud na ipilih Naibata laho marmahani/ memimpin sidea, gabe mangahapkon malas ni uhur ma bangsa ai. Manjalohon hadameion pakon gok pasu-pasu. Boi iidah hita ai bani Psalmen bindu 23.
Nasiam bapa na hinaholongan ni Tuhan Jesus Kristus. Bani pargoluhanta on boi do sada panorang ijalo hita paruntolon ampa sitaronon na borat, na mambahen pusok uhurta. Tapi bani ambilan on, boi do hape paruntolon ampa sitaronon na ijalo hita ai cara ni Naibata na laho mambahen hita ase sadar pasal pargoluhan na sonaha do na ihorjahon hita sadokah on. Tontu maksudNi aima songon bangsa Israel nokan ai, seng halani lang holong Naibata banta, tapi, holong na ipataridahkonNi aima holong ase manjalo haluahon hita bani ari simagira in. Songon na ihatahon Tuhan Jahowa bani bangsa Israel bani Hesekiel bindu 33 ayat 11, songon sintongni manggoluh Ahu, nini Tuhan Jahowa, sabonar seng marosuh uhur-Hu mangidah hamateian ni parjahat, tapi ase mulak do parjahat ai manadingkon dalanni, ase manggoluh ia. Jadi, boi do marhitei paruntuolon atap sitaronon na ijalo hita bani panorang on gabe idingati hita domma sonaha pargoluhan atap haporsayaonta hubani Tuhan Naibata sadokah on. Sadokah goluh ampa pasu-pasu na ibere Naibata banta, lambin mambahen hita dohor hubaNi do, atap homa sebalikni. On maningon gabe perenungan na bagas banta bani panorang on.
Bani hatorangan na paduahon na ijalo hita nokan ai, hataridahanni holong ni Naibata ai ipatuduhNi do bani bangsa Israel bahasa lang ipaturutNi halak na legan mambahen gabe lang maharga sidea ibani bangsa sekitarni. Arti hata holong banta bani hatorangan na paduahon on aima, age pe hita ibagas situasi na borat bani panorang on, seng ipaturut hita tarbador janah gabe lang maharga hita ilobei-lobei ni hasomanta. Mase? Hita on aima bangsani Naibata. Maharga tumang do hita Bani. Ase, anggo adong halak na mambahen pusok uhurta janah gabe lang maharga hita ilobei ni sama hita halani hahuranganta ai, adong do Naibata na gabe hasomanta na laho mangolati sidea ampa na mampargogohi hita domu hubani caraNi. On ma sijolomonta na gabe bangsaNi Naibata. Tontu, bani status na ijalo hita on maningon jaga ma hita!
Ipilih Naibata do si Daud ase gabe parhiteianNi laho mambobai bangsa Israel luar bani sitarononni. Tapi, boi do tokin hita marpikir, sonaha anggo lang ra janah porsaya ma bangsa ai bani pambobaini si Daud na domma ipilih Naibata gabe juakjuakNi laho paluahkon sidea humbani habuangan ai, maluah do sidea? Tontu balosni lang! Halani domma ibere dalan laho luar, tapi seng idalani. Sonai homa hita, asipe hita domma manjalohon status bangsani Naibata janah iurupi Naibata do hita anggo dong jolma na mambahen hita lang maharga, tapi, bani pambobaini Naibata lang ihaporsayai hita, tontu totap do hita lang boi maluah humbani sitarononta ai. Halani bani Johannes bindu 3 ayat 16 ihatahon do ijai, bahasa holong do tongon Naibata bani dunia on, ase marhitei Anak-Ni na sasada in iberehon banta na gabe tobus dousata. Na gabe sungkun-sungkun sonari, anggo lang porsaya do hita, seng mararti hasasapan in, janah totap ma hita gabe bangsa na magou. Tapi, anggo porsaya do hita bani pambobai Ni Naibata, maluah ma hita. Amen.
