Renungan Mingguan Bapa GKPS,  1 Desember 2024 (Advent 1)

Renungan Mingguan Bapa GKPS,  1 Desember 2024 (Advent 1)

Nas                  : Lukas 1:67-80

Usul Doding   : 90:1-3

Tema               : Tuhan membawa kelepasan

Tujuan            : Agar kaum bapak senantiasa berjalan bersama Tuhan dalam terangNya yang ajaib.

“Idop ni UhurNi do Marsinalsal banta”

(Tim Penulis)

Marhitei perikop rap ma hita merenung pakon Sakaria bani pamujionni dompak Naibata paboa: Naibata domma manobus hita humbani habiaran, italuhon Tuhan do uhur sanski marhitei hataNi, pakon Jahowa do na patulupkon hita laho mangidangi. On ma na sihol ipatangkas hita humbani perikop on.

Lukas 1 on patorangkon pasal hatani Naibata na iondoskon marhitei Tonduy Napansing na ipadas bani partubuh ni anakni Sakaria aima si Johannes pandidi. Hata on ma na mangarahkon hita hubani na mangalo-alo parroh ni Jesus Kristus na ipasirsir marhitei na parlobei roh si Johannes pandidi.

Itobus Naibata do hita humbani habiaran.

“Sada na hibiari hita aima habiaran ai sandiri” (Roosevelt) na ipadas Presiden Amerika sanggah panorang pelantikanni bani tahun 1933. Aha na isobutni bani panorang ai halani situasi bangsa Amerika na mandompakkon depresi na borat janah secara massal, habiaran na boi pagalekkon upaya-upaya ni sidea laho pamajuhon perekonomian ni bangsa ai. Tontu anggo habiaran ai do na manguasai bangsa Amerika ai tontu mahol ma sidea bangkit, ai do ase ipasingat Presiden nis idea ase ulang mabiar, ningon italuhon ma habiaran na adong bani bangsa ai baik secara pribadi age kolektif sebagai bangs ana banggal. Halani ternyata uhur biar ampa gobir gabe penghalang do ai banta laho mencoba hal-hal na baru ampa na marguna. Mabiar bani masa depan, kuatir/gobir, hape gabe iparsoya-soya hita panorang sondahan on. Habiaran halani hal na mangecewahon hita, on boi pamagouhon pagarapan.

Ra on do homa na gabe dasar ase si Sakaria lang porsaya bani malaikat Gabriel sanggah na ipadas bani pasal sinrumah ni, si Elisabet na sihol tubuhan tuah, marhitei tubuh sada anak dalahi. Domma dokah sidea paimahon ai. Mase pala be ibere pangarapan pasal ai hape holi gabe paroh uhur biar ampa kekecewaan. Uhur biar ai boi hape gabe munsuh sibajanan hubani dirinta sandiri. Sasintong ni songon na bertentangan do pengakuan ni Sakaria pasal barita malas ni uhur ai, tapi halani porsaya do Ia bani hatani Tuhan, gabe barani do ia laho manghatahon puji-pujian hubani Tuhan, halani ibotohni do aha na iarapkon ni ampa bangsa ai aima partubuh ni Mesias. “Pinuji ma Naibata ni Israel, halani itohu do bangsaNi anjaha ibahen partobusNi” (ay.68).

Adong sada kisah, pasal sada niombah na iculik parjahat sanggah mulak hun sikolah, itutup panonggorni, iikat tanganni dob ai iboan hu ianan na golap, na majangin. Haru, mabiar janah gobir ma dakdanak ai tapi seng dong gogohni laho paluahkon dirini. Parjahat ai mangindo duit na gabe tebus hubani namatorasni dakdanak ai. Patarni sanggah na boi iboban ma ia hu darat bani ianan na torang, ibuka ma panutup panonggorni gabe iidahni ma na dob roh do hape namatoras ni, na dob mambere tobus hubani parjahat ai. Megah ma ia, malas ma uhurta, bebas ma ia pajumpah ma ia pakon inang, bapani. Sonai ma na iahapkon janah na ihaporsayai Sakaria, marhitei na ihatahonni paboa Kristus dob manobus ia marhitei darohNi. Tarpujima Tuhan.

Sambatni ai isobut do, “Ipajongjong do banta tanduk haluahon i rumah ni si Daud, juak-juakNi ai” (ay.69). Jesus tubuh humbani ginompar si Daud, tubuh i Betlehem. Ia roh laho padaohkon sibolis, siparjahat, na sadokah on sihol manolon ampa mangagou sidea. Jesus sihol paluahkon hita, halani ai do talup ma hita mamuji Tuhan. Ai do ase ningon tangkas do banta ise do munsuhta na sasintong ni, aima dosa na sihol masuk janah manrajai pargoluhanta. Hape domma itobus Tuhan hita, marhitei na dob roh Tuhan Jesus hubanta, marhitei darohni na maharga ai. Halani ai ulang be ondoskon hita dirinta hubani parjabolonan ni dosa. Sibolis sihol do manarik hita hubani hamateian ampa naraka. Tapi margogohan do kuasa ni Jesus marimbangsi, halani Ia do na mangkorjahon haluahon banta humbani ganup munsuhta ampa jolma na mangimbang ampa na manghagigihon hita (ay.71). On ma patubuh habaranion banta laho mangimbang dosa, ase manggoluh hita ibagas parsaoran na dear pakon Tuhan irik manghagoluhkon goluh na gok puji-pujian hubani Tuhan.

Naibata mambere hatotapan ni uhur marhitei hataNi

Anggo jolma urah do lupa bani aha na isahapkon ni. Lang sai taringat ganup na dob ihatahon, ibagahkon, ampa na ipadankon. Ase gati do halak kecewa halani lang ihorjahon hita aha na dob ipadankon ampa ihatahon hita. Hape Tuhan marbeda do, totap do Ia, idingat do hataNi ampa bagah-bagahNi hubani bangsaNi humbani panorang na dob dokah humbani padan na basaia. “songon na hinatahonNi marhitei pamanganni nabi-nabi na susi humbani na sapari” (ay.70); “ingatonni do padanNi na mapansing in” (ay.72); ai ma na binulawankonNi bani si Abraham, bapanta ai” (ay.73).

Ra do hita maruhur sangsi dompak Naibata. Songon si Sakaria na sangsi bani hatani Naibata na pinadasni hubani marhitei malaikat ai, gabe hona uhum ia lang boi marsahap ia das hubani na tubuh si Johannes. Tontu uhuman on, laho patangkaskon paboa sipata porlu do hita lang buei marsahap, atap soh marsahap halani anggo buei na isahapkon hita ra buei homa na lepak. Lang na madear janah na padearhon na isahapkon hita, justru boi mambobai hasoman hubani na lang madear. Porlu do hita sip, ase adong panorangta laho manangar janah mamparimbagaskon hata ni Naibata. Ase irajai hita uhurta, ipadaoh uhur sangsi gabe porsaya hubani hatani Naibata. Uhur sangsi ai ningon ipamagou hita humbani dirinta halani boi do ai mambobai hita hubani na mabiar, gobir mandompakkon goluh on. Jalo hita ma hataNi Tuhan, haporsayai hita. Ase margantih ma uhur sangsi gabe uhur na marhaporsayaon, uhur biar gabe marmalas ni uhur ibagas Tuhan. Ganupan ai tarjadi sedo halani jolma tapi halani Tuhan do na mangidopi hita, ase boi hita manggoluh ibagas hapansingon ampa hapintoron sadokah hita manggoluh. Halani ai Tuhan mangharosuhkon ase ganup halak boi porsaya huBani, bani ganup hata ampa padanNi. Tuhan pasti manggoki ganup padanNi. Tangkas do ai, ipadas bani Sakaria paboa, anggo si Johannes anak ni ai aima na laho gabe parlobei ni Tuhan in do, laho patureihon dalan ni Sipaluah. On ma toguhni padanNi Tuhan hubani bangsa na hinaholonganNi. Tontu on ma homa gabe onjolan banta lambin manghaporsayai hatani Tuhan bani goluhta, halani Ia do pasirsirhon haluhahon hu banta.

Naibata patalupkon hita mangidangi ibagas malas ni uhur.

Uhur gobir ampa biar doma igantih uhur na toguh porsaya ampa gok malas ni uhur. On ma ipakei hita laho marugas, mangidangi ilobei ni Tuhan, ibagas hapansingon ampa hapintoron sadokah hita manggoluh (ay.74-75). Megah ni uhurta anggo ibagas parsaoran na madear hita pakon Tuhan. Ibere homa banta kesempatan laho marugas Bani, mangidangi marhitei ganup lahoan ni pargoluhanta. Mangidangi Tuhan tontu gabe ahap na martarimakasih do ai, respon humbanta halak na porsaya na mangahapkon sonin ma banggal ni holong ni Tuhan bani pargoluhanta.

Sonari anggo ikawahkon hita goluhta, domma sibar ja nolihta ibagas na marugas ilobei ni Tuhan? Selaku bapa aha ma peranta bani keluarga, gereja ampa masyarakat? Anggo ibere banta tanggungjawab naha do hita mandalankon ai ibagas na dear ampa humbani ganup gogohta do? Atap marsidalian do hita? Ilempar hita ganup tanggungjawab ai humbani dirinta, i rumah tangganta ra gati do gabe iambil alih inang ma peran ni bapa gabe pambobai, pansari, sipangajari bani niombah pnl. I kuria pe sonai do, ai bahatan ma inang na hadir hu partonggoan ampa parmingguan, lang sai ihaporluhaon bapa be na marTuhan, gabe lang boi gabe pambobai bani keluarga laho padohorkon diri hubani Naibata. Jadi terjadi pergeseran pasal peran ni bapa, na secara sadar atap lang isadari hita doma daoh pargoluhan ni bapa humbani hasintongan ampa hapinroran. Sasintong ni maila ma hita daoh ope parlahouta humbani na gokan dear, jauh dari kata sempurna. Buei ope na maningon iperjuangkon hita bani goluhta on, ase ulang soya hubujuron ni Tuhan Naibata na dob mambere anakNi na sasada in hubanta laho manobus hita.

Pitah halani idop ni uhur ni Naibata do na mambahen roh sinalsal hun datas marayak hita, laho manondangi halak na ibagas hagolapan ampa linggom ni hamateian (ay.78-79). Idop ni uhur ni Naibata on ma na mamalar ampa patalupkon hita ase boi hita mangidangi Tuhan, pahebahon sondang na dob ondos banta ningon marsinalsal laho manondangi hasomanta. Hajongjonganta ningon boi gabe magnet na manarik hasomanta lambin dohor hubani Naibata. Ulang sebalik ni, gabe magnet ni dunia on do use na manarik hita hubani na lang madear, halak na ibagas hagolapan aido use na manarat hita hubani lombang bagas ni hamateian. Halani ai ningon jaga hita ma dirinta, poltik ma jolom hita ni Tuhan na dob manondangi paruhuranta, na dob mambere hasasapan ni dousa marhitei anakNi Tuhan Jesus Kristus, janah doma padas hamubahon ni uhur marhitei juak-juakNi Tuhan, si Johannes. Dingat hita ma ganup ai, ase lambin marbanggal hita ibagas ganup horja na madear, gabe pasu-pasu ija pe hita marianan. Goluhta igoki malas ni uhur ampa damei bani na mangidangi halani doma ipapansing hita marhitei idopni uhurNi. Halani ai ganup goluhta gabe parsombahan ma ai hubani Tuhan halani na madear do na ihorjahon hita bani ganup halak. Sai ipargohohi Tuhan in ma hita laho mandalankon ganup horja marugas i pohon anggurni ibagas hasintongan ampa hapintoran, ase gabe pasu-pasu ma tongon ganup bapa i kurianta ase lambin rarat harajaon ni Naibata, bahen hasangapon ni goranNi, malas ni uhur ampa damei banta kuriani Tuhanta. Amen.