Exaudi, tanggal 21 Mei 2023
Nas : Ester 3:1-6
Usul doding : Haleluya 337:1-2
Tema : Hidup Setia Menyembah Allah
Tujuan : Agar kaum bapa hidup dengan setia menyembah Allah, sebab Allah mendengar seruan orang yang dikasihi-Nya
“ Totap Manombah Tuhan Naibata”
Hita haganupan na hinargani Tuhan Jesus Kristus!
Bani pargoluhan siganup ari, dong sada hal na ianggap ponting tumang sobali arta, aima: kuasa pakon tahta. Ra, halani ianggap ponting janah lobihan humbani hal na legan i tanoh on, mambahen marpala-pala jolma laho mandapotkon kuasa sonai tahta atap jabatan. Lang otik jolma in mamakei ganup cara, misalni mambere sisip, mamakei jalur KKN ase bani kuasa ai. Istilah “serangan fajar – politik uang” gati ma taridah anggo dong pemilihan-pemilihan, baik tingkat nagori das hu tingkat pusat. Ai salah do mangindahi kuasa i tanoh on? Balosni tontu tergantung sonaha mandapotkon kuasa ai janah sonaha homa mandalankon kuasa ai. Bani Buku Podah 9:10-11, isarankon ase dong pambotoh bahasa biar mangidah Jahowa do mulani hapentaran. Jadi anggo lang ibagas biar bani Jahowa, kuasa sonai goluhta gabe horja na parohkon soal pardagingan pitah.
Nasiam bapa hinaholongan ni Tuhan.
Bani perikopni ambilanta on, dong na margoran Mordahai, Ia ginoran pahlawan ni halak Jahudi Mordahai aima halak Jahudi suku Benjamin na dihut tarbuang hu Babel bani masa raja Nebukadnezar, Raja Babel (~ 597 SM). Janah dong homa na margoran Haman, anakni si Hamadeta halak Agagi, na ipatimbul Raja Ahasveros gabe kopala lobih humbani halak na legan. Halak Agagi aima bangsa na gabe munsuhni Israel janah bani panorangni Raja Saul, iparentahkon Tuhan do ia ase manaluhon halak Agagi on, hansa raja Saul mamilih mangayob taban-taban marimbang mangkorjahon parentahni Tuhan (1 Samuel 15:1-33).
Dobhonsi si Haman mandapotkon haporsayaonni Raja Ahasveros, porluma bani ase ihormati ganup jolma. Kuasa sonai tahta na dong bani, gabe alasanni ase ganup jolma ase hormat bani. Lang pitah ai, ia pe manuntut ase ganup juak-juak ni Raja na ihorbangan ni rumah ni raja, marsombah janah manowod hubani si Haman. Hansa, anggo si Mordahai lang ra manowod laho manombah si Haman. Bani Mordahai, pitah Naibatani Israel do na patut isombah (ayat 3-4; 2 Musa. 20:1-17; Mat. 4:10).
Sikap Mordahai ibasa Haman na gabe tindakan pembangkangan. Manringis tumang do uhurni si Haman halani na lang ra ai Mordahai manowod pakon manombah dirini. Ringisni si Haman gabe domdom janah sihol uhurni laho mamboiskon lang pitah Mordahai, tapi haganup halak Israel ma use. Ayat 6, Tapi mahiritu, ninuhurni, anggo pitah hubani si Mordahai tumang ia mangonai tangan; ai domma ipatugah halak hinan hu bani, masuk bangsa ja si Mordahai, halani ai itahihon si Haman ma sihol mamboiskon ganup halak Jahudi na ibagas harajaon ni si Ahasveros rap pakon si Mordahai. Latar belakang halak Agagi pakon halak Jahudi na marmunsuh, mambahen roh gajakni ringisni si Haman. Ringis pakon marahni si Haman lang be pitah personal (pribadi hubani si Mordahai) tapi gabe domdom kolektif (bani bangsa Israel na memang ihagigihon halak Agagi).
Hita haganupan na hinargani Tuhanta Jesus Kristus!
Aha ma na boi iidah hita humbani ambilanta on tene? Nini uhur dong piga-piga poin ponting na boi iidah hita ase martambah pambotoh sonai homa haporsayaonta humbani kisahni si Mordahai na ihagigihon si Haman on, aima:
Na parlobei: kuasa na dong banta, Sali nari, anggo lang tiba dalanni pakon tiba jujurni lang gabe pasu-pasu bani diri sandiri sonai age hubani hasoman na legan. Ai maningon iahapkon hita, aha na dong banta, arta, kuasa, tahta, jabatan pakon na legan aima pasu-pasuNi Tuhan tumang do. Ase mandalankon kuasa pakon na legan ai, aima marhitei hapentaran (hikmat) na humbani Tuhan in tumang do, ase ulang tarbador janah mardousa hita.
Na paduahon: si Haman pataridahkon jolma na surakah, jolma na igoki domdom pakon ringis. Boi do ibayangkon hita anggo dong pemimpin na surakah, gok domdom pakon ringis, tontu output – hataridahanni kuasani aima kesewenang-wenangan, ketidakadilan, penindasan pakon kelaliman tumang. Seng mungkin parohkon damei. Halani ai itadingkon ma model pemimpin na sinongon on, maningon pataridahkon buah na madear ma modelni pargoluhanta bei.
Na patoluhon: si Mordehai tampil gabe contoh jolma na totap setia hubani Tuhan Naibata, age buei tumang tantangan na idompakkon. Lang mosor haporsayaonni age pajumpah bani kuasa na sewenang-wenang. Lang ra ia manowod sonai homa manombah dunia on. Ia pataridahkon ketaatan total dompak Tuhan Naibata. Sikap ni Mordahai on ma na maningon itiru janah iihutkon jolma sondahan on, ase tongon gabe siihutkon Tuhan Naibata, na manowod sonai manombah Tuhan in tumang. Amen.
