Minggu 6 Agustus 2023 (9 Dob Trinitatis)
Nas : Parambilan 7: 1-12
Usul doding/lagu: Haleluya No. 327: 1-2
Tema : Hikmat yang Benar
Tujuan : Agar kaum bapa semakin hidup dalam hikmat yang benar
Manggoluh ibagas hapentaran na sintong
Parlobeini
Adong do umpama bani bahasa Indonesia manghatahon: “gajah mati meninggalkan gading, harimau mati meninggalkan belang, manusia mati meninggalkan nama”. Umpama on sihol paingatkon bahasa aha na binahenni jolma sadokah goluhni marhitei pambahenan na madear atappe na lang madear gabe sidingaton (memori) na lang boi tarlupahon. “Nama baik” atappe barita na madear aima hataridahanni pandiloonta sebagai halak Kristen bani ganup hata ronsi pambahenannta anjaha bani pangarusion na lobih bagas bahasa barita na madear ai aima marhitei na gabe pasu-pasu hita dompak hasoman na legan. Tontu on do homa na gabe tean-tenanan na maharga humbani sahalak bapa bani niombahni ibagas hapentaran na sintong na humbani Naibata.
Hatoranganni
Bani mungkahni Parambilan manokanhon sonaha porluni barita na madear: “rahanan do barita na madear ase minak na morum” (ay.1). Minak na morum manggambarhon hauntungon na boi jumpah i tanoh on. Barita na maharga lang iboan tubuh. Sanggah luar hita on humbani partapaan ni inangta bei, dos do haganupan aima sada dakdanak na lape ope boi inilai madear atap lang madear. Sanggah marujung goluhta hun tanoh on, ijaima barita na madear atappe barita na lang madear ai itotapkon; songon na sinobut ni si Parambilan bani ayat na paualuhkon: dearan do na manginteihon hadobanni humbani parmulaanni. Somalni sanggah laho hita hu rumahni na marpusok ni uhur, tubuh do ibagas pingkiranta pori marujung ma holi goluhta barita na madear do tadingkononta atap barita na lang madear; “ai ijai taridah ujung ni sagala jolma manisia, anjaha halak na manggoluh patut ma parimbagaskononni ai”, nini si Parambilan (ay. 2)
Irik hujai Parambilan paingatkon laho mamilih pahara siporlunan na laho sihorjahonon bani goluh on; dearan do mangapohi na marhoru ampa na marpusok ni uhur marimbang na marpesta-pesta, dearan do manangihon pinsang-pinsang humbani na manangar doding ni halak na oto, dearan do paruhur na sabar humbani si gijang uhur. Haganupan ai aima pahara sidearan sihorjahonon. Mase isobut parambilan haganupan ai pahara sidearan sihorjahonon bani goluh on, tontu sedo pitah halani haganupan ai aima na iharosuhkon Naibata tapi marhitei na mangkorjahon ai, hita domma gabe pasu-pasu bani na legan. Sebalikni, anggo hita mamilih mankorjahon pahara-pahara na marlawanan hunjai, ai justru mamboan harugian bani goluhta. Goluhta lang be gabe pasu-pasu.
Sadalan hujai Parambilan patugahkon bahasa haganupan do adong panorangni. Sonaha pe ganjangni panorang pasti do adong ujungni panorang ai. Pori pe umurta das hubani na saratus taun i tanoh on, pasti do adong panorangni na ija hita maningon marujung goluhta. Halani ai do parambilan manuliskon sada prinsip na dear tumang: “Dearan do na manginteihon hadobanni humbani parmulaanni” (ay. 8a). Halak na manggoluh ibagas hapentaran na sintong aima na humbani Naibata mangidah Naibata bani haganup panorang anjaha mangatur haganupan ibagas na dear. Mandalani panorang on ibagas na dear na mararti do ai bahasa hita ibagas na pasirsirhon bani hadobanni atappe ujungni na dear homa. Halani ai panorang sonari sanggah manggoluh ope hita maningon do igoki janah idalankon hita ibagas na dear. Ulang gap mamingkiri bani panorang na dob salpu na lang tarulaki hita. Aha do na boi sibahenonta? Hinaotikni marhitei panorang na ibere ope hubanta daoh ma humbani ungut-ungut.
Hahonaanni
Hata ni Naibata marhitei Parambilan pagolpahon hita bani panorang on ase manggoluh ma hita ibagas hapentaran na sintong na humbani Naibata. Sebagai malim janah usihan i tongah-tongah ni keluarga, gareja ampa masyarakat, marlajar ma homa age bapa laho mamilih mangkorjahon pahara-pahara na dear anjaha siporlunan, ase barita na madear matongon na boi isaksihon niombah age keluarganta secara khusus anjaha marhitei kehadiranta boi gabe pasu-pasu laho pasangapkon goranni Naibata. Tontu hapentaran ai boi jumpah marhitei hapongkuton pakon pangajarion bani hata ni Naibata na binere ni Naibata bani ganup na porsaya. Bani ujungni, tontu isadari hita ma bahasa laho mamilih anjaha manontuhon na sihol sidalankononta bani goluh on, barita na madear atap barita na lang madear hita mamorluhon hapentaran na sintong aima na humbani Naibata. Hapentaran na sintong mambobai uhur pakon pingkiranta laho mamilih pahara na madear anjaha na sintong sadokah goluhta i tanoh on.
Minimal kita harus memilki pola pikir yang tidak suka menggerutu melihat kondisi orang lain yang jauh lebih baik atau jauh lebih beruntung. Kita harus memiliki hati yang sabar, karena panjang sabar itu lebih baik daripada tinggi hati.
