Renungan PA BAPA Minggu 23 April 2023 (Misericordias Domini)
Nas Ambilan : 1 Tesalonika 2:11-12
Usul doding : Haleluya No. 107: 1-2
Tema : Hidup sesuai dengan kehendak Allah
Tujuan : Agar kaum bapak semakin memantapkan hati untuk hidup sesuai dengan kehendak Allah
PARLAHOU NI BAPA DO GURU BANI NIOMBAH
Keluarga aima ianan manghagoluhkon pasu-pasu ni Tuhan, na sada hubani na legan, ianan manghagoluhkon holong, marsitungkolan, ampakon ianan riap laho marlajar mangindo maaf pakon manmaafkon. Bani sada keluarga peranni sahalak bapa ihaporluhon tumang laho manjaga keutuhanni keluarga. Sebagai malim, bapa martanggungjawab botul do laho mambobai, mangajari dompak huja sihol iboan keluarga ai. Hagogohan ni keluarga taridah bani sonaha sahalak bapa secara konsisten mampardiateihon haganupan anggota keluargani. Lang sungkup pitah manggoki nafkah (material); sipanganon, siinumon, parabiton, ianan tading, pnl. Peranan ni sahalak bapa na paling vital aima mangidah secara langsung sonaha haporluan ni setiap anggota keluarga boi targoki; holong, rasa aman, ijalo anjaha maharga.
Paulus pataridahkon dirini sebagai sahalak “bapa rohani” bani halak na porsaya i Tesalonika sarupa songon na binahenni bani halak namapansing i Korintus. Tonduy ni Tuhan na marhorja bani haganupan pangidangion ni Paulus i Tesalonika mambahen lambin martambah do pagori ni kuria na baru, na porsaya hubani Tuhan Jesus Kristus. Isobut Paulus do sidea on na baru tubuh (anak-anak rohani). Dob tubuh, tontu seng ipaturut sonin tumang, tapi maningon torus do ipardiateihon, iramotkon goluh partonduyonni pakon pardalananni pargoluhanni haporsayaon ni sidea. Bani renunganta sadarion sihol ipatugah hubanta sonaha tanggungjawab ni sahalak bapa itongah-tongah ni kuria in ampakon rumah tanggani.
Sahalak bapa lang sungkup mangoki haporluan ni keluarga marhitei na marhorja, mangajari gabe teladan na madear. Bapa maningon pasirsirhon panorangni laho marbuali pakon anggota keluargani. Sonai ma Paulus manggambarhon pasal sidea na baru porsaya. Paulus mangidah sonaha hinaporluni mangajarhon pasal hasintongan hubani pagori ni kuria na baru tubuh (basa: na baru gabe kristen) ase marbanggal sidea ibagas harosuh ni Tuhan. Hal on ma mambahen ase tong-tong do ipasir-sir Paulus panorangni hubani sidea secara pribadi. Aido na taridah hita humbani ayat 11 in, sonaha pe kesibukanni Paulus, anggo panorang marbual/konseling pribadi pakon anggota ni kuria in totap do ihorjahon. Ai lang horja sisonin do homa na ihorjahon Tuhan Jesus sanggah i dunia on Ia? Agepe tong-tong do ia padaskon Hatani Naibata i rumah panumbahan/bani humpulan na buei, tapi lang ongga itadingkon parjuppahan secara personal hubani jolma.
Paulus mambere semangat bani sidea na baru porsaya. On ma homa na i horjahon sahalak bapa dompak dakdanakni, ase sanggup mandompakhon dunia on, seng urah mandolei (putus asa), tapi gabe niombah na siap juang bani na manoruskon pardalan ni goluhni. Halak nabaru-karisten porlu tumang mandapothon dorongan ase totap satia hubani Tuhan. Marhitei aido homa Paulus mangapohi sidea sanggah juppah paruntolon. Sedo sihol mambahen pasonang-sonang ahap tapi mambobai ase lambin namadear ma iparlahouhon. Ase hurang do dearni pamanjahon niombah; sebalikni maningon mandorong niombah torus marusaha (mencoba dan mencoba kembali).
Paulus mambere pangajaran marhitei pengalamanni sandiri; aima parjuppahanni pakon Tuhan boi mangubah pargoluhanni. Songon na isobut kata bijak ai; “pengalaman adalah guru yang paling baik”. Sipata marhitei na mandompakhon hamaholon, paruntolon pe hita ase boi do ai hita berbagi (sumber hasaksian) hubani hasoman pasal sonaha Tuhan marhorja ibagas paruntolonta. Tongon ra do sanggah ipatorang hita pasal pangalamanta bei bani niombahta (tarlobih na remaja) hurang do tarjalo sidea anggo ihatahon hita, “ anaha, sanggah etek au songon ham in……”. Tapi porlu do ibotoh hita, sahalak bapa rohani boi mambere semangat anjaha mangurupi “niombahni” laho mangarusi pengalamanni riap pakon Tuhan. Nini Parsalmen, “Roh ma, nasiam anak, tangihon nasiam ma hatangku, ase huajarhon bani nasiam biar dompak Jahowa.” (Psalmen 34:12).
Aha do tujuan pelayanan ni sahalak bapa bani halak naporsaya? Tontu mangihutkon ay. 12 ai, tujuanni aima ase “niombahni” marparlahou na patut dompak Naibata. Sarupa songon sahalak bapa na ibangga-banggahon niombahni, sonai ma homa Goranni Naibata Marsangap anjaha Marmulia marhitei pargoluhanni haganup na porsaya huBani. Kuria na i idangi Paulus maningon tongon-tongon mardalan ibagas hasintongan. Halani ai, sebagai bapa rohani maningon tongtong do homa ipataridahkon gaya hidup na patut sitiruon. Paulus manobut, Tuhan do mandilo hita hubagas Harajaon-Ni ampa Hasangapon-Ni, halani ai ningon do mardalan hita mangihutkon rosuhni uhur-Ni. Bani panorangni holi masukanta do Harajaon ni Naibata aima goluh sisadokah ni dokahni.
Hita haganupan,
Aha do naporlu irenunghon hita humbani Hatani Tuhan on?
Naparlobei, idilo Tuhan do hita ase manggoluh ibagas hapansingon. Iparentahkon do hita manggoluh ampakon marhorja laho manaksihon Tuhan na paluahkon hita. Pardalanan pargoluhan ni halak Karisten tong-tong gabe bukti na nyata ibagas pargoluhan on hubani gok ni uhur, marondos hubani Tuhan marhitei pingkiran sonai homa parlahouta. Sebagai bapa itongah-tongah ni rumah tangga, tontu on do homa na ipangindo Tuhan hubanta; manggoluh ibagas hapansingon. Artini aima maningon marbeda ma pakon na lang mananda Tuhan. Sonaha tongon pargoluhanta bapa? Ibagas hapansingon berarti sir-sir pataridahkon goluh na marhaporsayaon, lang sarupa pakon dunia on. Sipadaohon ni bapa do horja-horja na so patut; horja na boi parsedahon hasadaon ni rumah tangga, hasadaon ni kuria, pnl.
Napaduahon, sitiruon do bapa! Adong do limbaga manghatahon, “lang daoh tubis humbonani” artini ai, sai iusih niombah do parlahou ni bapani.
Aha do na boi sitiruon humbanta? Sahalak bapa na ihormati anjaha ibanggahon keluarga, aima humbani pargoluhanni na sintong anjaha bonar ilobei-lobei ni Tuhan. Aido mambahen istri ampakon niombahni, ampa buei jolma na adong inggot bani mangidah hamuliaooni Tuhan ibagas pargoluhan ni sahalak dalahi na matua. Sahalak bapa aima pemimpin, na manggoluh lang pitah untuk dirini tumang, dihut mambere diri hubani keluarga, kuria, ampa masyarakat huja anjaha ijape ia laho, bani sagala tugas/aktivitas, horja, pargaulan pnl. Tapi parlobei-lobei ipungkah bei ma humbani keluargani. Halani ai, sahalak bapa pataridahkon cara hidup na sehat, sonai homa ibagas haporsayaon, holong ampa haringgason. Haporsayaon ni sahalak bapa maningon sehat; artini sahalak bapa maningon sintong-sintong pataridahkon/mambuktihon haporsayaonni ibagas na dear anjaha sintong ibagas pargoluhannni ganup ari.
Napatoluhon, riap idilo do hita hubagas harajaon ampa hasangapon ni Naibata. Domma ipasir-sir Naibata haluahon hubanta marhitei Jesus Kristus na dob mantaluhon hamateian. Tontu holongNi na sonin banggalni ase ulang adong do hita na kahou anjaha magou. Sebagai sahalak bapa ningon ipataridahkon hita do homa semangat rela berkorban ase riap hita ampakon anggota keluarganta dapotan haluahon ai. Maningon boi do berkorban panorang laho riap mansahap-sahapkon pasal harajoan ni Naibata. Sipata kegagalanni bapa sebagai malim itongah-tongah ni keluarga aima hurang hita mambere panorangta laho martumpu marbuali pakon anggota keluarga. Seng sungkup hape pitah ibere hita kebutuhan sipanganon, siinumon, ni niombahta pnl tapi ningon ningon dihut do kebutuhanni spiritualni ase haganupan hita parsimada bani keluarga besar harajaon ni Naibata. Amen
