TATA IBADAH KEBAKTIAN MINGGU PASKAH 12 April 2020

download disini==>Tatib Paskah 2020 model B

TATA IBADAH KEBAKTIAN MINGGU PASKAH

12 April 2020

 Tema:

Diperlengkapi untuk melakukan perbuatan baik. (2 Timoteus 3:17)

Sub Tema:

“Persiapkan Jemaat menjadi Pemimpin yang Rendah hati, Takut akan Tuhan, Taat kepada Ajaran, Berperilaku Baik, agar Nama Kristus

semakin Dimasyhurkan.” (Matius 5:18-19; Markus 9:35)

 Votum – Inroitus – Tonggo

1. Ibagas goran ni Naibata Bapa, pakon Tuhan Jesus Kristus ampa Tonduy Napansing sitompa langit pakon tanoh on. Amen

O hamateian, ija do hamonanganmu? O hamateian, ija do sorodmu? Tapi tarimakasih ma bani Naibata, na pamonang hita marhitei Tuhanta Jesus Kristus. Haleluya, Haleluya, Haleluya!

1. (Mandodingkon) Haleluya, Haleluya, Haleluya!
2. Martonggo ma hita! Ham Tuhan Jesus Kristus Tuhannami. Tarimakasih ma Bamu halani domma italuhon Ham hamateian, dousa pakon sibolis in marhitei parpuhoonMu. Seng be mabiar hanami mandompakkon hamateian. Domma itogu Ham hanami humbani hagolapan hubani haliharon, janah ipaluah Ham do hanami humbani hamateian hubani hagoluhan. Rajai anjaha pargogohi Ham ma hanami marhitei TonduyMu, ase ibagas haporsayaon na manggoluh ampa pambalosion na sintong hanami mamuji Ham Tuhan Jesus siparmonang. Amen.

 Mandoding Haleluya No. 68:1-2 “Hatuahon do, Hamegahon do”

Hatuahon do, hamegahon do, parpuho ni Tuhan in

Roh Sipagoluh, bani pardousa, megah, megah ma uhurta in

Roh Sipagoluh, bani pardousa, megah, megah ma uhurta in

Hatuahon do, hamegahon do, parpuho ni Tuhanta in

Monang do Jesus, talu sibolis, mega-megah ma uhurta in

Monang do Jesus, talu sibolis, mega-megah ma uhurta in

3. Hasasapan Ni Dousa
   1. Martonggo ma hita, sopotkon hita ma dousanta hubani Tuhan Naibata.

Ham Tuhan Naibata simada sagala na adong, sibotoh haganup anjaha Naibata parpintor. Iajari Ham do hanami manghamalaskon pasu-pasu na dob ipaondos Ham hu bannami. Tapi gati do lang ihasonangkon hanami sibere-bereMu, janah iajamkon hanami gogoh, pingkiran sonai uhurnami sandiri laho mansuhuni sura-suranami. Jajat hurang podas do pangahapnami martambah sinadongan gabe ipindahi hanami parhiteian na so tiba dalanni. Lang homa ipakei hanami panorang nabinereMu in ibagas gok tanggungjawab. Gati do lolei hanami laho mangindahi Ham halani mamparayak arta na laho salpu in. Ham Tuhan marpangulaki ma uhurMu mangidah ganup dousa pakon hajahatonnami in. Hartuki Ham ma uhurnami ase ulang inunut hanami be mangkorjahon ganup dousa pakon ganup na jahat in. Topa Ham ma uhur na bayu marhitei TonduyMu, ase tongtong hanami manggoluh ibagas hapintoronMu. Ibagas Kristus Jesus Sipaluah in, sasap Ham ma dousanami anjaha jalo Ham ma tonggonami on. Amen

1. Tangar anjaha haporsayai hita ma Hata ni Naibata, bagah-bagah pasal hasasapan ni dousa, “Anggo isopotkon hita dousanta, hatengeran ni uhur anjaha bonar do Ia manasap dousanta, ampa paborsih hita humbani haganup hagedukon.”

Ibagas holong ni Naibata, domma sasap haganup dousanta. Halani ai, pataridahkon hita ma tanda-tanda ni pargoluhan na bayu. Hasangapon ma bani Naibata i babou.

1. Amen

 Mandoding Haleluya No. 73:1-2 “Domma Talu Hamateian”

Domma talu hamateian ibaen Tuhan Jesus in

Ai manggoluh use Tuhan songon hinatahonNin

Haleluya, haleluya domma puho Jesus in

Haleluya, haleluya domma puho Jesus in

Roh manorih hu tanoman parinangon in hujin

Seng ijin be Jesus Tuhan, domma puho in hunjin

Haleluya, haleluya domma puho Jesus in

Haleluya, haleluya domma puho Jesus in

5. Manaksihon Hata Haporsayaon

 Mandoding Haleluya No. 70:1-2 “Ale Tonduyhu na Puho Tuhanmu”

Ale tonduyhu na puho Tuhanmu,

domma itaban do nagori toruh

Megah uhurmu martuah ma ho, rap pakon Jesus manggoluh ma ho

Rap pakon Jesus manggoluh ma ho

Talu sibolis ibahen Tuhanta,

‘ge hamateian, ‘ge dousa ganupan

Ihamalaskon uhurta ma in, pagoluhonNi do hita ganup

PagoluhonNi do hita ganup

7. Ambilan : Mateus 28:1-10
8. Peristiwa pasal parpuhoon ni Jesus ai ma klimaks ni sagala peristiwa na adong bani Bibelta. Parpuhoon ni Jesus gabe peristiwa na banggal janah gabe pusat barita na gok misteri das hubani panorang on.
9. Teks on ipungkah marhitei sada hasaksian: “Tapi sanggah mulai ope marlangat-langat ari, bani ari parlobei dob salpu Sabat, roh ma si Maria Magdalena ampa si Maria na sada nari manonggor tanoman ai” (ayat 1). Aha do na ipingkiri parinangon na roh hu tanoman ai? Dong do nani pangarapan ni sidea na sihol puho Jesus? Tontu lang sonai uhur ni sidea. Roh sidea hu tanoman ai marhasoman pusok ni uhur sihol maminaki bangkei ni Jesus gabe tanda penghormatan ni sidea hubani Jesus. Na sihol horjahonon ni sidea ai ma mangihutkon hasomalan ni na manggoluh dompak sahalak na dob marujung goluh. Halani ai, aha nari mando na dong? Domma marujung haganupan. Ase, barita Paskah ipungkah humbani sikap na lang marpangarapan.

iii.  Dob das sidea i tanoman, “masa do lalou bolon, ai tuad do malekat ni Tuhan hun nagori atas, idohori ma batu ai, iguling ma ai lanjar hundul i atasni …” (ayat 2-6). Kehadiran ni malekat on ai ma bukti campur-tangan na humbani Naibata sandiri. Marhiteihon ni ai, pusok ni uhur ni parinangon ai margantih ma gabe malas ni uhur. Iparentahkon malekat ai do ase itadingkon sidea tanoman ai, halani seng ianan na sonai ai na gabe ianan parjumpahan ni sidea pakon Jesus; “Jadi podas ma sidea misir hun tanoman ai, mabiar janah marmalas ni uhur tumang; marlintun do sidea laho patugahkon ai bani susian-Ni ai” (ayat 8). Barita Paskah mararti do ai transformasi iman, na mambahen pusok ni uhur gabe malas ni uhur janah na mambahen uhur na rotap gabe marpangarapan na gok.

1. Hata na parlobei ihatahon Jesus hubani parinangon ai: “Damei ma bani nasiam” (ayat 9). Ase, realitas Paskah ai ma damei atap syalom, ai ma maluah humbani haganup uhur biar. Ihatahon Jesus do use: “Ulang nasiam mabiar, laho ma nasiam patugahkon bani susian-Ku, ase laho sidea hu Galilea. Ijai ma idahon ni sidea Ahu!” (ayat 10). Mase hu Galilea? Bani panorang ai, huta Galilea ai ma ianan na terbelakang janah galek secara ekonomi. Bani mungkah ni pangidangion-Ni, ipungkah hun Galilea; janah dob puho Ia, sihol do Ia use mulak hujai. Na sihol patugahon-Ni ijon aima bahasa goluh ni Jesus humbani mungkahni das hubani ujungni seng ongga mubah. Halani ai, barita Paskah patugahkon pasal Jesus na sirsir gabe sipangapiti (pembela) ampa Sipaluah hubani sagala jolma na galek janah tarbuang. Amen

                                                               (Pdt. M. Rumanja Purba – Ephorus GKPS)

8. Patumpu Galangan

Paima iondoskon hita galanganta, tangar hita ma lobei hata ni Naibata na gabe onjolan banta laho manggalang, aima na tarsurat bani:

Psalmen 50:14, “Galangkon ma banggal ni uhur bani Naibata anjaha galari ma bagah-bagahmu bani Sitimbulan in”.

Sonari ondoskon hita ma galanganta!

9. Tonggo Galangan – Tonggo Panutup – Pasu-pasu

1. Martonggo ma hita! Ham Tuhan Naibata Bapanami, paridop ni uhur, harohan ni sagala pasu-pasu. Tarimakasih ma isombahkon uhurnami hu Bamu halani hun Bamu do ijalo hanami pasu-pasu na gokan dear pakon na laingan. Bani panorang on isombahkon hanami hu Bamu na gabe galangannami, dirinami pakon hinadongannami na dob binereMu in. Pasu-pasu Ham ma galangan na sinombahkonami on, gabe galangan na mapansing na mambahen harajaonMu lambin marhataridahan i dunia on. Ungkap Ham ma uhurnami marhitei TonduyMu, ase lambin ididah, ibotoh janah ihamalaskon uhurnami buei ni silayak-layakMu, na dob ijalo hanami pakon na sihol bereonMu ope hu bannami. Ajari Ham ma hanami laho mangondoskon galangannami na patut galangkononnami hu Bamu. Jalo Ham ma galangan pakon tonggo elek-eleknami on, ibagas Jesus Kristus Tuhannami. Amen.
2. (mandodingkon) Marhitei diatei tupa…..psb
3. Ham Tuhan Naibata paridop niuhur na sumurung. Puji-pujian pakon tarimakasih do talup sombahkononnami hu Bamu, halani marhitei idop ni uhurMu, itubuhkon Ham do hanami paduahalihon hubani hagoluhan na gok pangarapan, marhitei parpuhoon ni Jesus Kristus humbani na matei. Domma italuhon Ham sibolis, hamateian pakon nagori toruh. Na mangelek ma hanami hu Bamu ase pargogohi Ham ma hanami laho mangkagoluhkon hamonanganMu in. In ma homa na patotapkon uhurnami laho marhasadaon, marsaksi, pakon mangidangi, bani ari-ari ni goluhnami. Maidop ma uhurMu, balosi Ham ma tonggonami on, na ipadas hanami ibagas goran ni AnakMu Jesus Kristus sihopkop hanami. Amen

Ham Bapanami na i nagori atas…..psb

1. (mandodingkon) ai Ham do simada…..psb
2. Laho ma nasiam, janah “Baritahon nasiam ma i tongah-tongah ni sipajuh begu-negu hamuliaonNi, i tongah-tongah ni bangsa-bangsa halongangan na binahenNi ai.

Jalo ham/hita ma pasu-pasu humbani Tuhan Naibatanta:

Ipasu-pasu anjaha iparorot Tuhan Naibata ma ham/hita.

Isondangkon Tuhan Naibata ma bohiNi hu bamu / hu banta janah maidop ma uhurNi mangidah ham/hita.

Idompakkon Tuhan Naibata ma bohiNi hubamu / hu banta janah ipasorap ma dameiNi bani tonduymu / tonduyta bei. Amen

P+K.     Amen, Amen, Amen (Idodingkon)