RENUNGAN LANSIA
06 September 2026 (14 Dob Trinitatis)
Teks : Lukas 6:45
Tema : Hati yang Baik, Ucapan yang penuh berkat
Tujuan : Agar kaum Lansia tetap menjaga hati yang murni di hadapan Tuhan, sebab isi hati akan tercermin dalam tutur kata dan sikap hidup sehari-hari
Sahap na madear gabe pasu-pasu
Parlobeini
Jesus membere usihan pasal sonaha laho mananda sasahalak marhitei padaratkon na ibagas uhurni bani sada hayu. Hayu na madear pasti do marbuahkon buah na madear anjaha hayu na bajan marbuahkon buah na bajan. Pakon hata na pondok sihol sobuton bahasa sahapta manontuhon hadirionta. “Halak sidear uhur padaratkon na madear na ibagas uhurni; anjaha halak na jahat padarathon na jahat humbagas uhurni. Hatani Naibata on paingatkon hita ase jaga ibagas na padaratkon na humbagas uhurta, ase na madear ma ibagas uhurta janah na iluarhon pamanganta pe na madear ma homa. Halak sidear uhur padaratkon na madear humbagas uhurni, anjaha halak na jahat padaratkon na jahat humbagas uhurni.
Goluhta doskon hayu na marbuah. Buahni ai talar humbani pambahenan pakon na luar hun pamanganta, hasomalan sonai age parlahouta. Humbani buah ai ma na manontuhon hayu na madear do hita atap lang. Sahap na luar hun pamanganta, boi do parohkon pasu-pasu, tapi boi do homa parohkon papa. Tapi uhur na pintor pasti do mambuahkon buah-buah ni tonduy.
Hatorangan
Adong do hata na manghatahon “Saat kita melemparkan batu ke dalam laut, kita tidak pernah tahu seberapa dalam batu itu jatuh ke dasarnya. Demikian juga dengan kata-kata yang keluar dari mulut kita, kita tidak pernah tau seberapa dalam kata-kata itu masuk di hati setiap orang”. Ra do pangahapanta na somal-somal do sahap na iluarhon hita, hape bani hasoman domma gabe patubuh borit ni uhur. Ase hata ni Jesus hubani na mababuei sonai age susian ijia pasingatkon hita ase pangkei ibagas na padaratkon na ibagas uhurta anjaha porlu tumang ase na madear manggoki uhur parbagasta marhiteihonni ai pamanganta pe padaratkon na madear ma homa. Tontu satuju bei do hita pori ihatahon bahasa pitah halak na madear do na padaratkon sahap na madear. Halak na mambaen borit uhur ni hasoman marhitei hatani, aima halani na lang madear do ibagas uhurni; pangahapni ia ma na sintong, sipandeian anjaha lang ipingkiri sonaha paruhuran pakon pangahapanni halak na legan.
Sada pahara na porlu tumang do pasal na manluarhon hata na madear, na mambere gogoh pakon semangat sonai age pangarapan hubani hasoman. Anggo tubuh borit ni uhur ni hasoman halani sahap na luar hun pamanganta, dokah do panorang na iporluhon laho pamalumhon ai. Uhur ampa pingkiran na madear do bonani sahap na madear, na manontuhon sonaha jolma laho mandalani goluhni. Ase jaga hita ma uhur pakon pingkiranta on marhitei na marsaor pakon Tuhan in ibagas tonggo sonai age hatani.
Boi do ibedahon hita na madear pakon na lang madear humbani horja, pangabak sonai age motivasini sasahalak. Anggo halak na madear, na jenges do ibagas uhur pakon pingkiranni. Tongon sedo pahara na urah laho paubahkon parsahap sonai age parlahou halani aha na iluarhon pakon na ihorjahon hita bani goluhta si ganup ari pataridahkon na humbagas uhurta. Bani ayat 43-44 nini Jesus do, “Seng dong hayu na madear marbuahkon na bajan, barang hayu na bajan marbuahkon na madear. Ai humbani buahni do tartandai ganup hayu. Ai seng tarbuat jambu humbani tatada, anjaha seng tarbuat buah anggur humbani rimbang”. Sonai do homa age hita jolma, halak sidear uhur mansahapkon pakon manghorjahon aha na madear. Aha na humbagas anjaha na manggoki uhurni ai do isahaphon anjaha ihorjahon. Halak sidear uhur pasti do totap mamingkirhon, manghasiholhon, manranggihon, anjaha marbuahkon na madear. Domma ibere Tuhan hubanta uhur na bayu. Patut do bani goluhta na dob ipaubah, marhitei parsahap sonai age parlahouta boi sadalan pakon na iajarhon Kristus anjaha domma iuseihon Tonduy Napansing banta ase margogoh hita mandalankon ai haganupan.
Panutup
Hita mananda sada hayu humbani buahni. Ase usihan na ipatugah Jesus laho mananda sasada halak bahasa hayu na madear pasti do marbuahkon na madear anjaha hayu na lang madear marbuahkon buah na lang madear. Na mararti bahasa sahalak na dear humbagas uhurni pasti do pataridahkon na madear anjaha sahalak na lang madear humbagas uhurni pataridahkon na lang madear. Lang adong atap ise pe na mambotoh janah mananda botul das hubagas uhurta sobali Naibata. Boi sahali hita sandiri pe lang manandai botul uhurta sandiri. Halani ai do ase botul-botul uhurta ipaubah gabe uhur na dear janah sipambalosi marhitei na roh hubani Tuhan in. Gabe siirikhon Kristus na dob ipaubah gabe uhur na bayu, parsahap sonai age parlahouta sadalan ma homa songon ajaran ni Kristus, marbuah na madear.
Somalni halak sidear uhur na madear do iluarhon humbagas uhurni, halak na jahat tontu na lang madear do iluarhon humbagas uhurni. Ase porlu tumang do hita mamareksa sahap na luar hun pamanganta on. Sahap na madear pasti do ai parohkon pasu-pasu janah mamboan hu hadearon ronsi malas ni uhur bani na manangar. Goki hita ma uhur pakon pingkiranta ibagas holong ni Tuhan in, ase hata na luar humbagas uhurta mangkorhon hadearon ma bani na legan. Amen
About the Author
