Renungan Mingguan Seksi Bapa GKPS, Minggu, November 2024 (Akhir Tahun Gerejawi)
Nas : Yesaya 60:1-4
Usul Doding : 262:1-3
Tema : Bangkit dan menjadi terang
Tujuan : Agar kaum bapak menjadi pelopor untuk bersinar dan menjadi terang bagi dunia.
“Jongjong janah Marsinondang ma”
Perikop on aima humbani bagian na patoluhon bani Buku Jesaya, bindu 56-66, na isobut ‘Trito Jesaya’. Nabi Jesaya mangkaporsayai paboa Tuhan aima satia. Anggo Naibata domma marbagah-bagah haluahon ampa haganup na madear na sihol patupaonNi, sai na gokanni do in. Pangarapan na ibahen Naibata aima pangarapan na sejati, sintong sedo PHP (pemberi harapan palsu) Ia. On ma na igoran pangarapan. Pangarapan na sonon sedo na ibaen-baen jolma, na irancang ni na pentar-pentar ase sodap tangaron ni simbuei. Bani perikop on nabi Jesaya mangidah realitas bani 2 lingkup na marlegan. Naparlobei, bani hal duniawi, na taridah bani panonggor, isaksihon bani sejarah pardalanan ni bangsa ai, bani tingki ai seng buei na madear janah seng adong siarapkonon na madear nab oi iidah halani bani panonggorni hagolapon do, hasombuhon ampa ipaturut do goluh ibagas hasunsahan.
Tapi humbani mata haporsayaonni, nabi Jesaya on mangidah, adong sada huta na dear salian, megah, na marosuh ganup halak na mangidahsi, ramei janah mardohar. Tubuh sungkun-sungkun na ija do na sintong? Tontu na boi iahapkon na lobih nyata daripada na lang nyata. Aha na isobut ni nabi ijon, memang lang nyata ope secara fisik halani bagah-bagah ope ai. Tapi halani hata on aima na roh humbani nabi ni Naibata, ningon boi na manangar hata ai mangkaporsayaisi, halani ai do humbani Naibata. Ibotoh nabi ai paboa mahol ope mangidah na ipadasni ai halani lape tarbuka haduasi panonggorni, sada open a tarbuka, halani ai iporluhon do dorongan semangat ase boi tarbuka haduasi panonggor nis idea paboa na ipadas ai boi do masa janah tarjadi, ai si mada kuasa do Jahowa na padaskon ai hu bani bangsaNi.
Secara historis, panonggoran ipadas hubani bangsa ai, dob mulak sidea hun habuangan Babel, marhitei raja Persia, Arthasasta (464-423 sM). Ganup raja Persia dob mambahen na madear hubani bangsa ai. Bujur do sidea, janah ihormati sidea Naibata Jahowa. Janah idukung raja Persia ai do ase ibangun halak Israel use kota ampa rumah panombahan ai (bd. Hes.7), na mamarentahkon si parhorja bani harajaon ni laho mandukung dana laho restorasi ni kota ampa rumah panombahan ai. Nabi Jesaya padaskon panonggoran on marhitei puisi, ia padaskon dua hal na marlegan marhitei hut ana lugun gabe kota na ramei, hut ana itadingkon hinan gabe hut ana ihasiholi halak, buei halak na sihol roh laho mangidah ianan na majenges ai. Tontu sasintong bani sejarah seng ongga tarjadi on, seng ongga mulak be Jerusalem songon ‘gijang’ ni na hinan. Seng anjai mulak ai be songon na parlobei ai. Tapi nabi padaskon Jerusalem na isobut ijon aima Jerusalem na ilobei ni mata ampa pingkiran ni Tuhan. Sasintong ni sihol padas ijon sedo Jerusalem secara fisik na gabe pusat perhatian ni jolma humbani bangsa-bangsa tapi hubani Mesias na sihol roh ai do, na gabe panondang na menarik perhatianni bangsa-bangsa janah sihol roh huBani. Ai do ase panonggoran on aima laho patugahkon situasi na ideal, na mambere pangarapan hubani halak na galek ibagas haporsayaon ampa pangarapanni na hampir putus asa.
Bani ayat 1, “jongjong ma, marsinondang ma ho! Ai domma roh panondangmu anjaha hamuliaon ni Jahowa domma poltak i baboumu.” Halak na mulak hun habuangan Babel, ampa humbani ianan parserakan na mulak hu huta ni sidea. Na sihol mangidah huta ni sidea songon na hinan, pasti ma kecewa atau lepak adangan ni sidea. Domma martaun-taun itadingkon sidea, tontu lang be songon na hinan sanggah na iiankon sidea. Domma roh panondang janah hamuliaon na humbani poltak ibabou ni sidea. Ayat ningon iidah lang marhitei panonggor, tapi marhitei haporsayaon, paboa Naibata Jahowa domma roh janah marianan i tongah-tongah ni sidea. Ia ma noginoran Panondang. Nabi Jesaya porsaya botul do bani hagogok ni padan ampa bagah-bagahni Naibata, aima Naibata na satia do Ia, janah ganup napinadasni hu bani bangsaNi sai na saut do ai bani panorang na laho roh.
Bani ayat 3, “jadi roh ma bangsa sipajuh begu-begu marayak panondangmu”. Ganup bangsa na i dunia on na iwakili pambobaini sidea, sihol ma roh hubani panondang ai, songon sada huta na i atas dolok seng tarponopkonsi sondangni. Hajongjongan ni Naibata, sondang ampa hamuliaonNi na iondoskon hubani bangsa ai, lang tarponopkon janah aima na menarik perhatian ni buei halak, parlobei panonggor ni sidea secara fisik, dob di panonggor partonduyon ni sidea pe sihol mangindahi Naibata. Kuasa sondang na humbani Naibata mangarahkon bangsa-bangsa laho manjalo sondang ampa haliharon na humbani Naibata.
Bani ayat paopatkon, “mangkawah ma ho inggot, anjaha tonggor ma; ganup do sidea martumpu, marrohan bam. Roh do anakmu humbani ianan na daoh, anjaha borumu iboan bani abing-abingan.” Menurut pandangan ni nabi Jesaya, bangsa-bangsa na markuasa bani panorang ai, tarmasuk ma raja Persia aima na gabe parhiteian laho mangurupi Naibata manggoki padanNi. Sidea ai na mambere ganup na porlu sanggah bani pardalanan ai age dob das sidea bani huta ni sidea ai. Gambaran kekeluargaan na sonin dear, bangs ani Naibata gabe riap sapanganan pakon bangsa-bangsa na legan na roh humbani ianan na daoh, sidea ai ihatahon gabe anak pakon boru ni halak Israel, iboban bani abingan ni sidea. Jumpah parsaoran na madear bani ganup na bangsa halani pambahenan na madear. Tubuh panrahut na jenges iantara halak na ipatumpu janah hubani Naibata. On ma na gabe hataridahan na totap do marhorja Naibata ibagas pardalanan ni goluh ni bangsaNi janah mambahen dear pargoluhan ni sidea.
Perasaan kecewa, lang malas uhur ni bangsa ai mulak hu Jerusalem halani lang sesuai angan-angan ni sidea pakon kenyataan. Sidea mangarap paboa Jerusalem ai jenges, halani doma itadingkon sidea martaun-taun, sihol ma namin bani panorang na tongkin tor boi dear ganup homa sonang sidea lang pala marnaloja sidea laho mangkobaskon padear huta ampa rumah panombahan ai. Naibata sedo ra paubahkon rencanaNi pasal bangsa ai. Totap do rencana na madear sihol pasuton ni Naibata bani bangsa ai.
Age bani panorang pargoluhanta nuan on, gati do jumpah hita kenyataan tak seindah Impian, harapan. Harapanta na dear, sonang, sungkupan lang dong na hurang. Ganup na porlu boi targoki. Hape kenyataan buei do hamaholon, tantangan, hahurangan janah ibutuhkon do perjuangan, pengorbanan ampa hapongkuton laho mandompakkon pargoluhan ai. Anggo lang sesuai hubani bagah-bagah ni Naibata ijumpahkon hita bani goluhta, sonaha ma sikapta? Huja ma hita laho? Mandolei ma hita? Tontu, ningon tangkas do banta, paboa bagah-bagah pasal haluahon, hadoharon, na madear, na humbani Naibata ai, ningon ijalo janah ihaporsayai hita marharohan humbani Naibata do ai, anjaha ihaporsayai hita paboa na igoki do holi domu panorangni Tuhan. Halani ai lang boi etek uhurta, ningon banggal ma uhurta, ai ipardimata, isarihon janah ipardiatei Naibata do hita. Tuk do gogohni laho pasautkon ganup bagah-bagah ni bani bangsaNi, halani gok Bani ganup pargoluhan na adong i tanoh on. Ibagas malas ni uhur ma bangsa ai laho pasautkon bagah-bagah ni Naibata padearkon Jerusalem ampa rumah panombahan ai.
Perikop on mangajari hita ase gok bani pangarapan. Pangarapan ijon maronjolan bani realitas, tapi sedo realitas na adong i tanoh on, tapi realitasni Naibata do. Halani Naibata Jahowa do hita talup mangarap. Dasar harapan bani halak na porsaya sedo bani gogohni, pingkiranni, hapentaronni, habayakonni, halani anggo ai do seng margogoh ai, tongkin tumang bois do ai. Tapi Naibata, Simada Kuasa ampa Simada haganup ai do dasarta mangarap, na seng anjai kecewa ganup halak na mangarap bani. Jahowa do mambahen boi hita marpangarapan, maronjolan bani kuasaNi do ase marhasonangan hita bani pargoluhanta on.
Lambin tangkas ma panandaion ni bapa bani pambahenan ni Naibata bani pargoluhanni, Naibata na bujur na totap padaskon bagah-bagah ampa haluahon hubani halak na porsaya. Haluahon na humbani Tuhan sihol do pasauton ni bani pargoluhan ni ganup halak na porsaya. Ningon isambut bapa na i kurianta ma on ase lambin marhidorat hata ni Naibata bani kuria ampa i tongah-tongah ni keluarganta. Gabe bapa na manghaporsayai Naibata janah na sai mangarap bani bagah-bagah ni Naibata na madear bani pargoluhanni. Gabe iihutkonon ampa sitiruon bapa bani kurianta halani domma ipapuho ampa isondangi Tuhan Jesus hadirion ni ganup bapa. Lambin roh buei ma bapa na mambere diri laho marhasadaon, marsaksi ampa mangidangi i kuria. Ulang ma gabe siarahkonon, tapi sipangarah ma, ulang gabe na ibobai tapi ningon gabe pambobai ma. Ulang ma marpangantan marpambahenan na madear bapa bani kuria in, halani domma iahapkon bapa hinabanggal pambahenan ni Naibata bani pargoluhanni bapa. Ulang ma iintopi semangat na humbani Naibata ai, marhitei kuasa Tonduy Napansing na dob marhorja bani goluh ni bapa. Puho janah marsinondang ma.
Bapa i tongah-tongahni kuria lambin mangahapkon paboa domma poltak sondang hamuliaon humbani Naibata domma sogop bani sidea. Songon bangsa Israel na lang mangahapkon pambahenan ni Naibata hansi pe domma luar sidea hun habuangan Babel. Ra pangahap na sarupa iahapkon bapa bani kurianta na lang sai tangkas taridah sondang ai marhitei na hurang ringgas bapa bani ibadah i kurianta. On ma golpa-golpa ase mardingat use bapa paboa domma adong kuasa ni Tuhan na sogop bani ganup bapa, ulang iparnalang hita kuasa ampa pasu-pasu ni Tuhan na mangiring-iring goluhta bei. Sirsir ma bapa, mambere diri laho mandalankon tugas ampa pandilooan i kurianta laho padearhon ampa pararatkon sondang na humbani Naibata ai bani lingkungan sekitarta. Ulang be marnah mundur hita, hinsah janah ringgas ma hita mambere ganup na adong banta laho patorsahon kuria ni Tuhan. Amen.
